1 (Legic galeŋawac; Korawac ɋelihéra ionac legic ʒéra.) Ic embac momac yanda ini méragina qema ewa ségiségiyaguc qacma Anutu mepésimu. 2 Eŋeŋa miŋina Yawenéŋ kuc buŋa eeyaguc kecma baec séc ic embac ionac ic kewu waŋ énécmima kecʒac. 3 Yawenéŋ baec séc ic embac momac yanda imi nonac muru onopocma, baera baera ic embac imi weleŋ qenénécmimu niŋac hénanina duandiaiguc onoporec. 4 Neŋaŋ niŋac wamma mératécac baec imi gésima aŋgé tiyec. Imi mia siŋ niŋmianʒac Yakobo iwac ʒézé ségiségiyawac buŋa wanʒac. (Ohec)

5 Anutu ségiségi legic héimini eŋanʒac. Tomuŋ hihini qacma eŋanʒac.* Dimuaru eŋec ʒéma eminiŋgic ac ʒéra haréwéc waŋec; 1) Sésépac acwac katapa huama Zioniguc eŋgic imuac niŋɋeli mimia (2Sa 6:1-19). 2) Anutunéŋ mama yaréiguc Israel méra énécmima muŋguc kurumeŋu eŋec. 3) Yesu mama aiya metecgéma kurumeŋiguc eŋec. 6 Mepésimigic, Anutu mepésimigic, mepésimigic, ic kewunina mepésimigic. 7 Hénia imi yomuhuc; Anutunéŋ baec ic embac momac yanda neŋaŋ ic kewu kecʒac. Legic ʒéra niŋtegic qiŋtegicyaguc mepésimimu.

8 Anutunéŋ baera baera inicgaleŋ wamma ic kewu tatac téréyaiguc tacʒac. 9 Saiwa baec séc hezac imi mocʒoŋ Yaweac buŋa. Inéŋ eŋeŋa miŋina wanʒac. Imuac mia baera baera imuac baec galeŋhéra, Abarahamac Anutu iwac ic embachéra wamma tocgogic.