CABU III
73
Pathen kah Khosing he Dueng
[Asaph kah Tingtoenglung]
1 Thinko aka caih Israel taengah
Pathen tah then taktak.
2 Tedae kai tah ka kho he
tarha a bung khaw bung vanbangla
ka khokan khaw dalhdalh hma khaw hma.
3 Halang rhoek loh ngaimongnah neh
a thangthen uh te ka hmuh vaengah ka thatlai coeng.
4 Amih tah dueknah dongah
thingthuelnah om pawt tih,
a pumtak khaw len.
5 hlanghing* Adam kah thakthaenah loh amih te nan pawt tih
hlanghing taengkah lucik khaw ya uh pawh.
6 Te dongah hoemnah te amih kah oihnun la om tih,
a kuthlahnah hnisui a khuk uh.
7 A mik tha te coe tih,
a thinko ngaihlihnah loh vikvuek uh.
8 Boethae neh palawm uh tih cal uh.
Hnaemtaeknah neh a sang la cal uh.
9 A ka te vaan ah a khueh dae
a lai loh diklai ah tinghil.
10 Te dongah a pilnam loh hela ha mael ha mael tih
khangrhueng tui a caep uh.
11 Te vaengah, “Pathen loh metlam a ming tih,
Khohni taengah lungming khaw om van nim,” a ti uh.
12 Amih halang rhoek pataeng kumhal ah
a khuehtawn loh thayoeituipan la a rhoeng pah daeta ke.
13 A poeyoek la ka thinko he ka cael sak tih
cimnah neh ka kut ka silh.
14 Tedae hnin takuem lucik neh ka om tih
mincang takuem ah kai taengah toelthamnah ha om.
15 Te tlam te ka tae koinih na ca rhoek kah
thawnpuei te kan hnukpoh tak ve ka ti.
16 Hekah he ming ham ka moeh dae
ka mik ah thakthaenah la om.
17 Pathen kah rhokso khuila ka kun daengah
amih kah hmailong te ka yakming.
18 Amih te long hnal ah na khueh tih
pocinah la na cungku sak taktak.
19 Mikhaptok ah mueirhih loh imsuep neh
a thup uh tih a cing te metlam a om uh.
20 Haenghang hnukah mueimang bangla
ka Boeipa loh amih kah mueihlip
a haenghang vaengah hnael pah.
21 Ka thinko loh khikhi hal tih
ka kuel a phawt vaengah,
22 Kai loh ka kotalh tih na hmaiah
rhamsa bangla ka om khaw ka ming pawh.
23 Tedae kai tah nang taengah ka om taitu tih
ka bantang kut nan tuuk.
24 Na cilsuep neh kai nan mawt tih
thangpomnah hnukah kai nan khoem ni.
25 Vaan dongah kai ham unim aka om.
Tedae namah taengah ka om atah
diklai ah ba khaw ka ngaih pawh.
26 Ka pumsa neh ka thinko loh yawk mai suidae
kumhal ah ka thinko kah
lungpang neh ka hamsum la Pathen om.
27 Namah lamkah a hlahloei loh a milh uh vaengah,
nang taengah aka cukhalh boeih te na biit taktak coeng he.
28 Tedae kai loh kamah ham Pathen vang te ka kai.
Na bitat cungkuem thui hamla
ka hlipyingnah ka Boeipa
Yahovah taengah a then ka khueh.