4
Djabʉlʉ ale Yesu
(Tsia bhʉ́ Mlk. 1:12-13; di ne bhʉ́ Luk. 4:1-13.)
1 Abhomʉ-o, Bu Bhobua atsia amba bhʉ́la Yesu abhʉ́ mili bɨlɨ ngʉbula me djabʉlʉ le anɨ. 2 Pɨta namene ngbɨkpɨ ndjɨkpa badha ne sukpe ndjɨkpa badha mandɨ nazʉ ’he-e, anɨ adje gʉmʉ. 3 Djabʉlʉ, kpála ɨnde adji ale anɨ-e atuto lɨe de anɨ. Anɨ atsia apa pɨ anɨ me: «Ɨ dʉ me mʉ nde ne Ndɨlɨ gba Ebhe-e, ha lɨ́lɨ pɨ oteme ɨnde-e me akolo mapa.» 4 Engʉ́ bini, Yesu agie me: «U aye bhʉ́ Bhuku me:
‹Kpála kóbho bha bini ka ezʉ de,
engʉ́ bini, anɨ akóbho ka ndʉ oeli hana ɨnde
ɨ ngakoto bhʉ́ ’bhɵ Ebhe-o.† 4:4 Tsia bhʉ́ Det. 8:3.›»
5 Abhomʉ-o, Djabʉlʉ aha anɨ, anʉ ne anɨ bhʉ́ Yelusalema, gʉdhʉ na bubu-o. Anɨ atsia aꞌo anɨ pɨ́ tulundjɨ ’ngbé ’tɨ Ebhe gba omaYuda-o. 6 Do anɨ pɨ Yesu de me: «Ɨ dʉ me mʉ nde ne ndɨlɨ gba Ebhe-e, ꞌulu mʉ kɵ kuto! Padhá de, anga u aye bhʉ́ Bhuku me:
‹Ebhe ahá lɨ́lɨ pɨ oandjelu gba e ngʉ́ mʉ.
U tsia bɨ́ mʉ sa ’kpa o
ngʉbula me mo otʉ́ ’dhʉ mʉ lɨ teme bini de.† 4:6 Tsia bhʉ́ Ets. 91:11-12.›»
7 Yesu apa pɨ anɨ me: «U aye di bhʉ́ Bhuku gba Ebhe-e me: ‹Mo olé Ebhe, Ngámá gba mʉ-o de.† 4:7 Tsia bhʉ́ Det. 6:16.›» 8 Djabʉlʉ anʉ aꞌo matá anɨ pɨ́ ’ndjá eta na ndjándjá nane mane. Anɨ atsia apana pɨ anɨ ndʉ naʉ na doto hana bhʉ́ dabɨlɨ bini ne sangu gba o-o. 9 Anɨ atsia apa pɨ anɨ me: «Ndʉ ’he ɨnde-e hana, ma ahá pɨ mʉ ɨ dʉ me mʉ nde akikita lɨpʉkʉ mʉ kuto kala ma ngʉ́ nadhɵgɵ ma-o.» 10 Abhomʉ-o, Yesu atsia apa pɨ anɨ me: «Yie oo ko, Satana ! Padhá de, anga u aye bhʉ́ Bhuku me:
‹Dhɵgɵ Ebhe ’ngbé Ngámá gba mʉ-o,
amba mʉ yo la bhadi anɨ kpi e kpi.† 4:10 Tsia bhʉ́ Det. 6:13.›»
11 Abhomʉ-o, Djabʉlʉ aꞌo ka anɨ. Me-e, oandjelu ago de anɨ, u atsia aholo nateteke anɨ.
Yesu asuno bhʉ́ Galilaya
(Tsia bhʉ́ Mlk. 1:14-15; ne bhʉ́ Luk. 4:14-15; di ne bhʉ́ Dja. 4:1-3, 43-46.)
12 Lɨ Yesu adje lɨe me u aholo Djaa-a,* 4:12 Djaa: A ko Djaa bhende Bhʉlʉ nabatisa okpála-o. anɨ atsia agbe lɨe ne abhʉ́ ndu doto na Galilaya. 13 La-a, anɨ nʉ bhʉ́ kʉtɨ na Nadjaleta de, anɨ anʉ mangbo bhʉ́ Kapalanauma, dengo ekpɵ na Galilaya, bhʉ́ kʉtɨ gba okpála na Djabulona ne Nefɨtali. 14 Anɨ amene mo-o ngʉbula me engʉ́ nanɨ lɨ polofeta Ɨsaya apa e amene lɨe. Engʉ́ nanɨ anɨ apa e me:
15 «Ngayi okpála na doto na Djabulona ne Nefɨtali,
ne yi okpála na kpadjɨ na ekpɵ,
ne yi okpála na kʉtɨ ɨnde ayi ’ngu na Djʉlʉdanɨ,
ɨnde akolo mbɨa ɨnde-e okpála na Galilaya
ɨnde lɨ ogandji okpála ngadʉlʉ bhʉ́ e-e,
yi dje nga engʉ́ ɨnde!
16 Ngayi okpála ɨnde adʉ́dʉ bhʉ́ biti má ndundulundu-o,
yi aú zɨ ’kpɨ́ na ngbéngbé na kuo kuo.
A akʉnda napa me zɨ ’kpɨ́ ango-o akóto pɨ yi
okpála ɨnde abedhe ndʉ ’kpɨ́ hana ne tsʉlʉ kuo-o.† 4:15-16 Tsia bhʉ́ Ɨsa. 8:23 – 9:1.»
17 Nayie lɨ nedhɨnga bhomʉ-o, Yesu aholo akpokpo mbámbá me: «Yi dji bua yi. Padhá de, anga Naʉ na abhʉ́lá akolo masɨkpe.»
Yesu aꞌɨ omʉkpata na gigina
(Tsia bhʉ́ Mlk. 1:16-20; ne bhʉ́ Luk. 5:1-11; di ne bhʉ́ Dja. 1:35-51.)
18 Lɨ Yesu adʉ adhʉkʉ lɨe lɨngo ekpɵ na Galilaya-a, anɨ au obhosɨ bhisi me u nde ngagbe sungu. A adʉ ondaise. A adʉ Simo ɨnde u agisila ’lɨ e me Piele ne ndai e Andɨlɨ. 19 Anɨ atsia apa pɨ uo me: «Yi go kpata ma, amba ma mene me yi dʉ ɨbili nagɨlɨ okpála pɨ Ebhe maka yi agbegbe osungu lɨe-o.» 20 Ma gala kolo me-e, u abala ’kpa lɨ onado gba o-o, u atsia anʉ ne uo. 21 Yesu adyudyo matá lɨe ne kalanʉ, anɨ au obhosɨ koko bhisi, a adʉ Djakɨ ne uo ne ndai e Djaa , ongɨsɨ gba Djebedayo-o. U adʉ bhʉ́ zabʉ gba o bhʉ́ dabɨlɨ bini ne ’dyɨ o me u nde ngaleke onado gba o-o. Anɨ aꞌɨ uo me u go kpata nɨ. 22 Ma gala me-e, u aꞌo ka ’dyɨ o ne zabʉ gba o-o. U atsia anʉ ne uo.
Yesu asuno pɨ okpála, anɨ atsia akobho di obhʉlʉ kuo
(Tsia bhʉ́ Mlk. 1:39; di ne bhʉ́ Luk. 4:44, 6:17-18.)
23 Abhomʉ-o, Yesu adhʉkʉ bhʉ́ Galilaya libhomu. Anɨ adʉ asuno bhʉ́ oetɨ nadje lɨ́lɨ gba Moidje ɨnde na ndu doto bhomʉ-o. Anɨ adʉ di akpokpo Bádha Ngali Naʉ na abhʉ́lá-o. Anɨ atsia adʉ di akobho ndʉ okuo hana di ne ndʉ eze hana lɨ okpála adʉ ne e-o. 24 Abhomʉ-o, ngali gba anɨ ayangba bhʉ́ ndu doto na Silia libhomu. U atsia ago pɨ anɨ ne okpála ɨnde adʉ ne okuo ngangá-a hana: obhende lɨ osisiti bua adʉ ato mbolo lɨ o, obhende lɨ kuo nagbʉlʉ magbʉlʉ adʉ amene o, ne obhende na eze. Anɨ atsia akobho uo. 25 Abhomʉ-o, okpála bhelé ɨnde ayie bhʉ́ Galilaya, ne bhʉ́ ogʉdhʉ Ndjɨkpa, ne bhʉ́ Yelusalema, ne bhʉ́ Yudaya la di ne ayi ’ngu na Djʉlʉdanɨ atsia akpata anɨ.