នាវកោរាញឞ្រាសងើយនាវតឹមរាង្លាប់មហែ ១ តីមោថេ 2

នាវមឞើសឆើម

1 នទើអីគ៝ប់ទាន់នតិញមៃអីគែសនាវខ្លៃរាលាវឞូ អ៝ន់ទឹងលែៈផូងញឆីងមឞើសឆើមទាន់មាកោរាញឞ្រាស ទាន់ពាង់មាទឹងលែៈឞូនុយ្ស អ៝ន់ខាន់អៃមៃលាសអ្វែសមាពាង់អ៝ន់មាទឹងលែៈឞូនុយ្សដ៝ង់។* 2 អ៝ន់ជានកើតនអាមាកាដាច់ នអ៝ប់មាទឹងលែៈផូងកោរាញម៝ត់អ្វាញ់ដ៝ង់ គៃមាឞ៝ន់គែសនាវដាប់មពាន់ គុអ្វែសរាក់ក្លាក់តឹមនាវក្លាចយើកមាកោរាញឞ្រាស នទ្រែលមាគុតានាវរេសអ្វែស។* 3 នាវមឞើសឆើមអីនៃជេងនទើអ្វែសតានាប់កោរាញឞ្រាស នទ្រែលមានាវកោរាញឞ្រាសអុចអីនើមរាក្លាយ្សឞ៝ន់។ 4 ពាង់អុចទឹងលែៈឞូនុយ្សគែសរាក្លាយ្ស នអ៝ប់មាគឹតនាល់នាវងាន់។* 5 យ៝រលាស

គែសទូហ្វេកោរាញឞ្រាសទើម‌

គែសនើមមាជានអ៝ន់នាវតឹមរាង្លាប់ទូហ្វេទើមអីគុតាងក្លាងវាសវាងកោរាញឞ្រាសនើមមាឞូនុយ្ស។

ពាង់អីនៃឞ្រាសក្រីសយេឆូ ពាង់ជេងឞូនុយ្សដ៝ង់។

6 ពាង់លែៈជាវឆាក់ពាង់នើមមាខឹត គៃមាច្វាយទឹងលែៈឞូនុយ្ស។

នាវអីនៃកោរាញឞ្រាសលែៈញហើតាទីនារពាង់អុច។*

7 ជេសរីកោរាញឞ្រាសលែៈកើយ្សជេសគ៝ប់ អ៝ន់គ៝ប់មឞើសងក៝ចនាវខ្លៃអីអ្យា អ៝ន់គ៝ប់ជានកោរាញអ៝សម៝ន ជាននើមនតីមាផូងអីមោទីផូងអីឆ្រាអែល នតីខាន់ពាង់មានាវញឆីងមាឞ្រាសយេឆូ នអ៝ប់មានាវងាន់។ គ៝ប់ងើយនាវងាន់ មោគែសមរោសអោស។* 8 គ៝ប់អុចផូងឞូក្លោអាប់នតុកអីគែសឞូនុយ្សញឆីងអីគែសតឹមរាបុនអ៝ន់មឞើសឆើមយើរតី*មានូយ្សនហ៝ម់ក្ល៝សអ្វែស មោគែសអោសនាវនូយ្ស មោលាសនាវតឹមរាលាច់។ 9 មាផូងឞូអូរគ៝ប់អុចខាន់ពាង់ញឆ៝សងគូតអ៝ន់តឹមទី ជេងទីដាសនាវវៃគុងាវ លើយអោសរាលាវកែសអីរ។ លើយពាច់ឆ៝ក់ លើយតានទ៝កវាន់មាយ្ស មោលាសអ៝ក់លុពិចមល៝ម់(លុគ្ល៝) នអ៝ប់មាលើយអោសឆ៝សនទើអីខ្លៃៗអីរ គៃមាឞូរានេ។* 10 យើនមាអ៝ន់ខាន់ពាង់ជាននទើអ្វែសមាឞូហ៝ៈ។ ជានកើតនៃតឹមឞានមាងក្រឹឆាក់មានទើខ្លៃតាឞើសនាប់កោរាញឞ្រាស។ នាវអីនៃទីមាផូងឞូអូរអីកើបឆាក់ពាង់នើមយើកមាកោរាញឞ្រាស។ 11 នោកឞូនតីនាវកោរាញឞ្រាស ផូងឞូអូរអ៝ន់គុអ្យាត់ឆាក់រាក់ក្លាក់ហ៝ៈ ជេសរីអ្យាត់ទឹងលែៈនាវឞូនតីនៃ។* 12 គ៝ប់មោអ៝ន់អោសឞូម៝សឞូអូរនតីនោករាបុន មោលាសជេងកោរាញម៝ត់អ្វាញ់ឞូក្លោ អ៝ន់ខាន់ពាង់គុអ្យាត់ឆាក់រាក់ក្លាក់ហ៝ៈនោកតឹមរាបុន‌ 13 យ៝រលាសកោរាញឞ្រាសញជេងអាដាម់ អីឞូក្លោល៝រ ជេសរីញជេងអេវា អីឞូអូរឞើសកើយ។ 14 មោទីអាដាម់ អោសអ្យាត់នាវមរោស យើនមាអេវា អ្យាត់នាវមរោសនអ៝ប់មារាលាវនាវវៃកោរាញឞ្រាសជឹត។* 15 នទ្រីទឹងផូងឞូអូរគែសនាវជេរគុអ៝ស។ យើនមាខាន់ពាង់ហោមគែសនាវរាក្លាយ្សលាសខាន់ពាង់គុន៝ប់តានាវញឆីង តានាវរ៝ង់មាឞូ តានាវក្ល៝សអ្វែស នទ្រែលមាតានាវគុងាវមោអោសរាលាវកែសអីរ។*

*2:1 ២:១៖ អេផ ៥:២០; ផល ៤:៦; កោល ៤:២; ១តេ ៥:១៧-១៨

*2:2 ២:២៖ យេរ ២៩:៧

*2:4 ២:៤៖ ១តម ៤:១០; មថ ២៨:១៩; តត ១:១; ២ពេ ៣:៩

*2:6 ២:៥-៦៖ មក ១០:៤៥; លក ២៤:៤៤-៤៦; ២កោ ៥:១៨-២១; ហេឞ ៨:៦-៧

*2:7 ២:៧៖ ការ ៩:១៥; ២កោ ៥:២០; ២តម ១:១

*2:8 ២:៨៖ នោកនៃឞូវៃមឞើសឆើមយើរតី។

*2:9 ២:៩-១០៖ ១ពេ ៣:៣-៦

*2:11 ២:១១-១២៖ ១កោ ១៤:៣៤-៣៥

*2:14 ២:១៤៖ នន ៣:១៣

*2:15 ២:១៥៖ ១តម ៥:១៤; តត ២:៣-៥