នាវកោរាញឞ្រាសងើយនាវតឹមរាង្លាប់មហែ កោរាញអ៝សម៝ន 21

ពោល ហាន់តាប៝នយេរូឆាលឹម

1 ជេសហេននតិញនតាន់ខាន់ពាង់ ហេនញច៝ទូកលោសឞើសនតុកនៃ ហាន់ត៝ត់តាគោលទាកកោស ។ ត៝ត់នារអោយតៃហេនញច៝ទូកហាន់ត៝ត់តាគោលទាករោតុស លោសឞើសគោលទាកនៃ ហេនហាន់ត៝ត់តាប៝នពាតារា ។* 2 ត៝ត់តាប៝ននៃ ហេនឆៃគែសទូមល៝ម់ទូកហាន់ជឹតឞ្រីផេនីស ជេសរីហេនញច៝ទូកអីនៃហាន់ជឹត។ 3 ត៝ត់លែៈមពើលគោលទាកកីព្រ៝ស ហេនហាន់ឞើសមា ហាន់នហ៝តត៝ត់តាឞ្រីឆីរី ។ ហេនញឆ្រុងតាប៝នតីរុស ឞ្រីឆីរី យ៝រលាសឞូអុចញជុរនទើឞើសទូកតាប៝នអីនៃ។ 4 ជេសរីហេនជ៝យផូងអ៝សម៝ន។ ត៝ត់ម៝ប់ខាន់ពាង់ ហេនគុនទ្រែលខាន់ពាង់ពើសនារ។ យ៝រមាឞ្រាសហ្វេងអ្វែសមឞើសអ៝ន់មាខាន់ពាង់គឹតនទើអីមរាគែសមាពោល ខាន់ពាង់ឞ្វៃពោល មោអោសអ៝ន់ហាន់តាប៝នយេរូឆាលឹម ។* 5 ត៝ត់លោចពើសនារហេនវែសគុតានៃ ជេសរីហេនហាន់ជឹត។ លែៈផូងញឆីងតានៃ នទ្រែលមាអូរក៝នខាន់ពាង់ ញជុនហេនត៝ត់ឞើសទីសប៝ន។ ជេសរីទឹងលែៈហេនច៝នកោម៝ក់ មឞើសឆើមនទ្រែលតាមែងទាករី។* 6 ជេសតឹមនតិញនតាន់ឞាល់រី ហេនញច៝ទូកហាន់ជឹតនាប់។ អីខាន់ពាង់រីព្លឹឆឹតអាជៃខាន់ពាង់នើម។

7 ហេនលោសឞើសប៝នតីរុស ហាន់ត៝ត់តាប៝នផាតោលេមែស ។ ជេសរីហេនឞ្រោៈខ៝ល់ផូងញឆីងមាឞ្រាសក្រីសតាប៝ននៃ គុនទ្រែលខាន់ពាង់ទូនារ។ 8 ត៝ត់នារអោយតៃ ហេនហាន់តាប៝នឆេឆារា លាប់តាជៃផីលីប គុតាជៃពាង់រី។ ពាង់ជេងនើមមឞើសងក៝ចនាវមហែមហានអ្វែសមាឞូ ជេសរីពាង់ជេងទូហ្វេឞូនុយ្សតាផូងពើសនុយ្សអីឞូលែៈកើយ្សគៃមាកើលជានការតាប៝នយេរូឆាលឹម នើស។* 9 ពាង់គែសក៝នទ្រោសព្វាន់នុយ្ស ជេងផូងនតើយ្សនាវងើយកោរាញឞ្រាស។ 10 ទោលហេនគុតាប៝ននៃជ៝ៈឞារពែនារ គែសទូហ្វេឞូនុយ្សឞូក្លោនតើយ្សនាវងើយកោរាញឞ្រាសរាញាអាកាបុស ពាង់តាៈឞើសឞ្រីយូដា ហាន់តាហេនរី។* 11 ត៝ត់តារីពាង់ឆ៝ៈរាឆែឞុតពោល ជេសរីក៝ត់ជ៝ង់ក៝ត់តីពាង់នើម ពាង់លាស៖ “ឞ្រាសហ្វេងអ្វែសអីក្ល៝សអ្វែសលាស៖ តាប៝នយេរូឆាលឹម ផូងកោរាញឞ្រីយូដា ក៝ត់ជ៝ង់ក៝ត់តីពាង់នើមអីតើមរាឆែឞុតអ្យាកើតនអាដ៝ង់ ជេសរីញជុនអោឞាល់មាតីផូងអីមោទីផូងអីឆ្រាអែល ”។ 12 ត៝ត់មាតាង់នាវកើតនៃ លែៈហេន នទ្រែលមាលែៈផូងញឆីងគុតាប៝ននៃ ឞ៝ញពោល មោអោសអ៝ន់ពាង់ហាន់តាប៝នយេរូឆាលឹម ។ 13 យើនមាពោល អើសកើតនអា៖ “ម៝សនាវខាន់មៃញុមកើតនៃ ជានអ៝ន់គ៝ប់មោអ្វែសតានូយ្សនហ៝ម់? មោច្រាវអោស យ៝រលាសគ៝ប់លែៈនទ្រាប់ឆាក់ជេសអ៝ន់ឞូញុបឞូចាប់ឆាក់គ៝ប់។ មោអោសទើនមាអ៝ន់ឞូចាប់ទើម គ៝ប់លែៈនទ្រាប់ជេសអ៝ន់ឞូងខឹតគ៝ប់តាប៝នយេរូឆាលឹម រីជឹតយ៝រមាមឞើសងក៝ចនាវកោរាញយេឆូ ”។*

14 យ៝រមាពាង់មោអុចរាគ៝ល់នូយ្សនហ៝ម់ ហេនឞាសឞ្វៃពាង់ ជេសរីហេនលាស៖ “តឹងកោរាញឞ្រាសនើមអុច”។ 15 ជេសហេនគុជ៝ៈអ៝យតាប៝ននៃ ហេននទ្រាប់នទើហាន់តាប៝នយេរូឆាលឹម ។ 16 តាប៝នឆេឆារា នៃគែសផូងអ៝សម៝នអាបាៈហាន់នទ្រែលហេន នហ៝មាលែវហេនលាប់គុតាជៃទូហ្វេឞូក្លោរាញាមានេឆុន ។ ពាង់ជេងផូងគោលទាកកីព្រ៝ស ពាង់នើសជេងឞូនុយ្សអីឆឹតញឆីងមាឞ្រាសយេឆូ ល៝រឞូដ៝ង់ នោកឞូនតើមមឞើសងក៝ចនាវមហែមហានអ្វែស។

ពោល គុតាប៝នយេរូឆាលឹម

17 ត៝ត់ហេនតាយេរូឆាលឹម រី ផូងអ៝សម៝នរាម់ងាន់វើតទើនហេន។ 18 កាសអោយតៃពោល នទ្រែលមាហេនហាន់តាជៃយាកើ ។ លែៈផូងកោរាញផូងញឆីងហាន់រាបុនតានតុកនៃទាទេដ៝ង់។* 19 ជេសពាង់អោបអ្វែសលាង់ឞូលែៈផ្យៅ ពាង់មឞើសងក៝ចទឹងលែៈនាវកោរាញឞ្រាសទែជាននោកពាង់ជានការតាផូងអីមោទីផូងអីឆ្រាអែល ។* 20 ជេសតាង់នាវពាង់មឞើសងក៝ចកើតនៃ ខាន់ពាង់រានេមាកោរាញឞ្រាស ជេសរីលាសមាពោល រី៖ “ហើយនោ មៃឆៃផូងអីឆ្រាអែល គែសអ៝ក់រាមឺនឞូនុយ្សលែៈឆឹតញឆីងមាកោរាញយេឆូ ទឹងលែៈផូងអីនៃនើសញឆ្រោយ្សញអោតនាវវៃឞ៝ន់ន៝ប់ងាន់។* 21 យើនមាខាន់ពាង់លែៈតាង់លឺមៃនតីមាផូងអីឆ្រាអែល អីគុតាផូងឞ្រីអេង មោអោសអ៝ន់តឹងនាវវៃមោឆេ * មោអ៝ន់ក៝សនតោមាអ៝សក៝នឞូក្លោខាន់ពាង់ នទ្រែលមាមោអោសអ៝ន់តឹងនាវវៃអើមអេងជឹតអីឞ៝ន់គែស។* 22 លាសនទ្រីមើមជាន? យ៝រលាសឞូមរាគឹតមៃត៝ត់តាអ្យាងាន់រ៝ [កើតនទ្រីអ្យាត់មាផូងអ៝ក់រាបុន]។ 23 លាសនទ្រីទាន់មៃជានតឹងនាវហេនកើតនអា៖ តាអ្យាគែសព្វាន់នុយ្សអីលែៈត៝ននទើមាកោរាញឞ្រាស។* 24 ទាន់មៃលែវខាន់ពាង់នៃហាន់រាវឆាក់នទ្រែលមៃគៃមាក្ល៝សតឹងនាវវៃឞ៝ន់ នហ៝មាមៃឆើមលោសព្រាក់អ៝ន់ខាន់ពាង់លែៈនតីលនទើអីខាន់ពាង់មាជានក្ល៝ស។ ជេសរីគុនទ្រែលខាន់ពាង់ត្រុយ្សខាន់ពាង់ជេសក្រែសព៝យ្សឆ៝ក់ដ៝ង់† គៃមាអ៝ន់ទឹងលែៈឞូនុយ្សគឹត លែៈនាវអីខាន់ពាង់តាង់នៃនើសមោអោសគែសងាន់ យ៝រលាសមៃនើសជេងឞូនុយ្សញអោតន៝ប់នាវវៃឞ៝ន់ដ៝ង់។ 25 ល៝ង់ផូងអីមោទីផូងអីឆ្រាអែល លែៈឆឹតញឆីង លែៈហេនញជ្វាល់ឆ៝ម់បុតអ៝ន់មាខាន់ពាង់ជេស មោអ៝ន់ខាន់ពាង់ឆានទើអោបឞ្រាស មោអ៝ន់ឆាមហាម មោអ៝ន់ឆាព្វាច់មពោមពា(ឆ្យុម)អីមោគែសលាច់អ៝ន់លោសមហាមលែៈតាឆាក់ នទ្រែលមាមោអ៝ន់តឹមទ៝ង់ ទូនៃទើម”។* 26 ត៝ត់នារអោយតៃរី ពោល លែវខាន់ពាង់ព្វាន់នុយ្សនៃហាន់រាវឆាក់នទ្រែលពាង់គៃមាក្ល៝សតឹងនាវវៃ។ ជេសរីពាង់លាប់តាជ៝ង់គូងញីសជានឞ្រាសមាកោរាញឞ្រាស គៃមាមឞើសម៝សនារទឹងគែសមាក្ល៝ស នារអីខាន់ពាង់ជានឞ្រាសទូហ្វេទូហ្វេ។*

ពោល ឞូញុបតាជ៝ង់គូងញីសជានឞ្រាស

27 ត៝ត់ឞើយលោចពើសនារនៃ គែសមពោលអីឆ្រាអែល តាៈឞើសឞ្រីអាឆី រី ខាន់ពាង់ឆៃពោល គុតាជ៝ង់គូងញីសជានឞ្រាសនៃ ជេសរីញឆុកផូងប៝នលានជាៈញុបពាង់។ 28 ខាន់ពាង់នតែរទ្រើវលាស៖ “ហើយផូងអីឆ្រាអែល កើលញុបហ៝ម់ ឞូនុយ្សអ្យាហើយអីនតីទឹងលែៈឞូនុយ្សតាអាប់នតុក អ៝ន់តឹមរាទ៝ង់មាផូងឞ៝ន់ អ៝ន់តឹមរាទ៝ង់មានាវវៃឞ៝ន់ នទ្រែលមាអ៝ន់តឹមរាទ៝ង់មាញីសជានឞ្រាសអ្យា។ អាបៃអ្យាពាង់លែវនអ៝ប់មាផូងអីមោទីផូងអីឆ្រាអែល លាប់តាជ៝ង់គូងញីសជានឞ្រាសតីសមានាវវៃឞ៝ន់ នទ្រីជានអ៝ន់បឹបើចនតុកក្ល៝សអ្វែសអ្យាជឹត”។* 29 ខាន់ពាង់ងើយកើតនអា យ៝រលាសឞើសកើយនើសឞូឆៃទូហ្វេឞូនុយ្សតាៈឞើសប៝នអេផេឆោ គុនទ្រែលពាង់ ឞូនុយ្សនៃរាញាត្រោផីម នទ្រីទឹងខាន់ពាង់នអោនលាសពោល លែវពាង់លាប់តាជ៝ង់គូងញីសជានឞ្រាសនៃដ៝ង់។ 30 កើតនទ្រីតាប៝ននៃគែសនាវអុសអាសតាសត៝រ់ហោងាន់។ ឞូនុយ្សរានវាច់តារីអ៝ក់ងាន់ តេកមផ៝ក់អោឞាល់ងលោសអាទីសជ៝ង់គូងញីសជានឞ្រាស ជេសរីនតឹលមពោងរ៝។ 31 ទោលខាន់ពាង់គៃមាអុចងខឹតពោល ឞូមឞើសមាកោរាញតាហែនក្វ៝ង់រីគែសនាវអុសអាសតាសត៝រ់ឞេងប៝នយេរូឆាលឹម ងាន់។ 32 ជេសរីកោរាញតាហែនក្វ៝ង់នៃលែវក៝នតាហែន នទ្រែលមាកោរាញតាហែន ខាន់ពាង់ញច្វាត់រានជុរតានតុកផូងប៝នលាននៃរ៝។ ត៝ត់មាឆៃកោរាញតាហែនក្វ៝ង់អីនៃ នទ្រែលមាតាហែនត៝ត់តានៃ ផូងនៃឞាសលើសពោល ។ 33 កោរាញតាហែនក្វ៝ង់ហាន់ត៝ត់តាពោល រី ញុបពាង់ នហ៝មាដាៈឞូក៝ត់ពាង់ឞារអឹរាឆែរាវាក់ដ៝ង់ ជេសរីអោបឞូ ពាង់ឞូម៝ស ពាង់ម៝សនទើជាន។ 34 យ៝រមាផូងប៝នលាននតែរទុតហោ អាបាៈលាសនអា អាបាៈលាសនត៝ នតែសលែៈខោសវេតវេច្វេច្វាង់ងាន់ កោរាញតាហែនក្វ៝ង់អ្យាត់មោហោមអោសវ៝ត់ ជេសរីដាៈឞូលែវពោល នៃហាន់តាពោយ្សនតុកតាហែន។* 35 ពោល ត៝ត់តាគូងហាវជឹតពោយ្សនតុកតាហែនតី ផូងតាហែនឆើមតូងពាង់ យ៝រលាសផូងប៝នលានង៝ងាន់តឹងលើសពាង់‌ 36 នអ៝ប់មានតែរលាស៖ “ងខឹតលើយពាង់!”*

ពោល ទាន់ងើយមាផូងប៝នលាន

37 ទោលឞូឞើយលែវពោល លាប់តាពោយ្សនតុកតាហែនគុ ពាង់ងើយមាកោរាញតាហែនក្វ៝ង់លាស៖ “គែសឞើស គ៝ប់ទាន់ងើយដេៈមាមៃ?” កោរាញតាហែនក្វ៝ង់នៃលាសមាពាង់៖ “មៃឞ្លាវងើយគ្រែក បាស? 38 លាសនទ្រីមៃអើមមោទីផូងអេឆីប ឞូនុយ្សអីលែវឞូតឹមលើសដាសផូងហេននារអាល៝រនើស? នអ៝ប់មាលែវផូងតាហែន ៤០០០ នុយ្សទូអាឞ្រីរាទាស?” 39 ពោល អើសមាពាង់៖ “គ៝ប់ជេងផូងអីឆ្រាអែល ទែសតាប៝នតាឆើស ប៝នអីនៃគែសនាវខ្លៃងាន់តាឞ្រីកីលីកៀ ។ កើតនទ្រីគ៝ប់ទាន់មាមៃអ៝ន់គ៝ប់ងើយមាផូងប៝នលានអ្យាប៝ត់”។ 40 ជេសរីកោរាញតាហែនក្វ៝ង់នៃអ៝ន់ពោល ងើយ។ ពាង់ទ៝ក់តាគូងរី ពាង់យើរតីគៃមាអ៝ន់ឞូគុរាក់ក្លាក់។ ត៝ត់មាផូងប៝នលានគុរាក់ក្លាក់ ពាង់ងើយមាផូងប៝នលាននៃមានាវងើយហេឞ្រើ អីនាវងើយខាន់ពាង់នើម ពាង់លាស៖

*21:1 ២១:១៖ ការ ២០:១៧-១៨

*21:4 ២១:៤៖ ការ ២០:២៣

*21:5 ២១:៥៖ ការ ២០:៣៦

*21:8 ២១:៨៖ ការ ៦:៥; ៨:២៦-៤០

*21:10 ២១:១០៖ ការ ១១:២៨

*21:13 ២១:១៣៖ ការ ២០:២៤

*21:18 ២១:១៨៖ ការ ១៥:១៣

*21:19 ២១:១៩៖ ការ ១១:៤

*21:20 ២១:២០៖ ការ ១១:១៨

*21:21 ២១:២១៖ មោលាស «នាវវៃផូងអីឆ្រាអែល »។

*21:21 ២១:២១៖ ការ ១៨:១៣

*21:23 ២១:២៣-២៤៖ ការ ១៨:១៨; នក ៦:២, ៥, ១៣-១៨

†21:24 ២១:២៤៖ នាវត៝នអ្យាគែសនាវខ្លៃតាឆ៝ម់បុតនាវកើប ៦:១-២១។ ជេងនាវអ្វែសមាផូងអីឆ្រាអែល កើលលោសព្រាក់មាខ្លៃមពោមពា(ឆ្យុម)មាជានឞ្រាសតានាវត៝នអីនៃ ជេសរីលោចពើសនារឞូក្រែសព៝យ្សឆ៝ក់គៃមាញហើនាវត៝នអីនៃលែៈជានជេស។

*21:25 ២១:២៥៖ ការ ១៥:២០, ២៩; ១កោ ៨:១-១៣

*21:26 ២១:២៦-២៧៖ ១កោ ៩:២០

*21:28 ២១:២៨៖ ការ ១៨:១៣; ២៥:៨

*21:34 ២១:៣៤៖ ការ ១៩:៣២

*21:36 ២១:៣៦៖ ការ ២២:២២