នាវកោរាញឞ្រាសងើយនាវតឹមរាង្លាប់មហែ យោហាន 9

ឞ្រាសយេឆូ ជានឞាសទូហ្វេឞូនុយ្សចែសមាត់

1 នោកឞ្រាសយេឆូ ហាន់រ៝ៈត្រ៝ង ពាង់ឆៃទូហ្វេឞូក្លោចែសមាត់នតើមឞើសនទុលមែ។ 2 មពោលអ៝សម៝នអោបឞ្រាសយេឆូ ៖ “អើនើមនតី ឞើសតាៈនាវតីសអីនៃ ទឹងពាង់ចែសមាត់នតើមឞើសនទុលមែកើតនៃ? តាៈឞើសពាង់នើមជានតីស មោលាសតាៈឞើសមេៈឞឹពាង់ជានតីស?”* 3 ឞ្រាសយេឆូ អើស៖ “មោអោសតាៈឞើសនាវតីសពាង់នើម មោដ៝ង់នាវតីសមេៈឞឹពាង់។ ពាង់ចែសមាត់យ៝រលាសកោរាញឞ្រាសអុចអ៝ន់ឞូឆៃនាវទើយពាង់នើមតាឞូនុយ្សអីនៃ។* 4 អ្យាត់មាឞ៝ន់ហោមជានការមាកោរាញឞ្រាសនើមតើមញជ្វាល់គ៝ប់វាច់ នោកត្រោកហោមអាង។ មាង់ឞើយត៝ត់ ជេសរីលាសត្រោកលែៈមាង់*មោហោមអោសគែសឞូនុយ្សទើយជានការ។* 5 នោកគ៝ប់ហោមគុតានែសនតូអ្យា គ៝ប់តឹមឞានមានាវអាងមាទឹងលែៈឞូនុយ្សតានែសនតូអ្យា”។* 6 ជេសឞ្រាសយេឆូ ងើយកើតនៃ ពាង់ឆ៝សទាកទីវតានែស លាយទាកទីវអីនៃមានែស ហឹងតាមាត់ឞូនុយ្សចែសនៃ។* 7 ជេសរីឞ្រាសយេឆូ ដាៈពាង់៖ “ហាន់ហ៝ម់ ហាន់រាពោសមាត់មៃនៃតាទាកងលៅឆីល៝ម រី” - រាឞ្លាងងើយលាស«ឆីល៝ម »នៃ «ឞូដាៈហាន់» ជេងទាកងលៅអីឞូជាន។ ឞូនុយ្សចែសមាត់នៃហាន់រាពោសរ៝ ជេសរីមាត់ពាង់ឆៃអាង ពាង់ឆឹតឞើសរី។ 8 ផូងច្យៅមែង នទ្រែលមាផូងវៃឆៃពាង់គុទាន់ព្រាក់ឞូអាល៝រនើស ខាន់ពាង់តឹមលាស៖ “ឞូក្លោអីនៃបាសគុទាន់ឞូអាល៝រនើស?” 9 គែសឞូនុយ្សអាបាៈលាស៖ “ពាង់អីនៃរ៝”។ ឞូនុយ្សអាបាៈជឹតលាស៖ “មោ មោទីពាង់អោស ពាង់តឹមត្រុបមាត់ទើម”។ យើនមាពាង់នើមអីតាៈចែសមាត់នៃលាស៖ “គ៝ប់យា”។ 10 ឞូអោបពាង់៖ “មើមទឹងអាងមាត់មៃអីនៃនើស?” 11 ពាង់មឞើសមាឞូ៖ “គែសទូហ្វេឞូនុយ្សរាញាយេឆូ ពាង់ឆ៝ៈទាកឞ៝ក់ហឹងតាមាត់គ៝ប់ ជេសរីដាៈគ៝ប់ហាន់រាពោសតាទាកងលៅឆីល៝ម ។ គ៝ប់ហាន់រាពោស មាត់គ៝ប់ឆៃអាងរ៝”។ 12 ឞូអោបឞូនុយ្សចែសមាត់នៃ៖ “អាសពាង់អាបៃ?” ឞូនុយ្សចែសមាត់នៃអើស៖ “គឹតអែស!”

ផូងផារីឆី អោបជែកឞូនុយ្សចែសមាត់នៃនើស

13 ជេសរីឞូលែវឞូនុយ្សអីតាៈចែសមាត់អីនៃហាន់តាផូងផារីឆី ។ 14 នោកឞ្រាសយេឆូ លាយទាកទីវពាង់នើមមានែស នទ្រែលមាជានអ៝ន់មាត់ឞូនុយ្សឆៃអាងនៃនើសជេងតានារឆាបាត់ អីនាររាលូផូងអីឆ្រាអែល ‌* 15 កើតនទ្រីទឹងផូងផារីឆី អោបឞូនុយ្សតាៈចែសមាត់អីនៃ៖ “មើមទឹងអាងមាត់មៃនៃនើស?” ឞូនុយ្សចែសមាត់នៃមឞើសមាផូងផារីឆី ៖ “ពាង់ឆ៝ៈទាកឞ៝ក់ហឹងតាមាត់គ៝ប់ ជេសរីគ៝ប់រាពោស មាត់គ៝ប់ឆៃអាងរ៝”។ 16 ផូងផារីឆី អាបាៈតឹមលាសនទ្រាង់ខាន់ពាង់៖ “ឞូនុយ្សអីនៃមោគែសអោសលោសតាៈឞើសកោរាញឞ្រាស យ៝រលាសពាង់មោជានតឹងនាវវៃតានារឆាបាត់ អីនាររាលូ†”។ អាបាៈជឹតលាស៖ “លាសឞូនុយ្សតីស មើមទឹងពាង់ទើយជាននាវខ្លៃកើតនអា?” ជេសរីខាន់ពាង់ជេងតឹមងខាសមពោល។* 17 ជេសរីខាន់ពាង់អោបតៃឞូនុយ្សអីតាៈចែសមាត់នៃជឹត៖ “លាសនទ្រីអាសមៃ ពាង់អីតើមជានមាត់មៃឆៃអាងនៃ ឞូម៝សមៃលាសមេស?” ឞូនុយ្សចែសមាត់នៃអើស៖ “ពាង់ឞូនុយ្សនតើយ្សនាវងើយកោរាញឞ្រាស”។ 18 យើនមាមពោលកោរាញផូងអីឆ្រាអែល អេហ៝ៈអ្យាត់អោសលាសឞូនុយ្សអីនៃឞើសនតើមនើសពាង់ចែស អាបៃអ្យាលែៈឆៃអាង ខាន់ពាង់ក្វាល់អីមេៈឞឹពាង់ប៝ត់។ 19 ឞ្រោៈត៝ត់តានៃ ខាន់ពាង់អោប៖ “ឞូនុយ្សអ្យាក៝នខាន់អៃមៃងាន់? ខាន់អៃមៃលាសពាង់ចែសមាត់នតើមឞើសនទុលមែ អាបៃអ្យាមើមទឹងមាត់ពាង់ជេងអាង?” 20 មេៈឞឹពាង់អើស៖ “ពាង់ក៝នហេនងាន់ ហេនលែៈគឹតនហេលពាង់ចែសមាត់នតើមឞើសនទុលមែងាន់ដ៝ង់‌ 21 យើនមាឞើសតាៈមាត់ពាង់ទឹងឆៃអាងហេនមោគឹតអោស។ ឞូម៝សជានអ៝ន់មាត់ពាង់ឆៃអាងនៃ ហេនមោគឹតដ៝ង់។ ខាន់មៃអោបអេងឆាក់ពាង់នើមតានៃ ពាង់លែៈក្វ៝ង់ លែៈឞ្លាវមឞើសងក៝ចអេងឆាក់ពាង់នើម”។ 22 ទឹងមេៈឞឹពាង់ងើយកើតនៃ ខាន់ពាង់ក្លាចមពោលកោរាញផូងអីឆ្រាអែល យ៝រលាសមពោលកោរាញផូងអីឆ្រាអែល លែៈតឹមទីនាវ លាសឞូម៝សកើបឞ្រាសយេឆូ ជេងឞ្រាសក្រីស ឞូមព្រើសលើយអ៝ន់លោសឞើសនតុកញីសរាបុនផូងអីឆ្រាអែល ខាន់ពាង់នើម។* 23 កើតនទ្រីទឹងមេៈឞឹពាង់លាស៖ “ខាន់មៃអោបអេងឆាក់ពាង់នើមតានៃអែស យ៝រលាសពាង់លែៈក្វ៝ង់”។

24 ជេសរីឞូក្វាល់តៃឞូនុយ្សតាៈចែសមាត់នៃអោបតៃទូតឹជឹត ឞូលាសពាង់៖ “ហេនដាៈមៃងើយនាវងាន់ហ៝ម់តានាប់មាត់កោរាញឞ្រាស! ហេនលែៈគឹតជេសឞូនុយ្សអីនៃ ពាង់ឞូនុយ្សជានតីសងាន់”។* 25 ឞូនុយ្សអីតាៈចែសមាត់នៃអើសមាខាន់ពាង់៖ “គ៝ប់មោគឹតអោសពាង់ឞូនុយ្សជានតីស មោលាសមោ។ យើនមាគ៝ប់គឹតឆាក់គ៝ប់នើម ឞើសនតើមនើសមាត់គ៝ប់ចែស អាបៃអ្យាមាត់គ៝ប់លែៈឆៃអាង”។ 26 ខាន់ពាង់អោបតៃពាង់៖ “លាសនទ្រីមើមពាង់ជានអ៝ន់មាត់មៃឆៃអាងនៃនើសមេស? មាៈនទើពាង់ជានមេស?” 27 ឞូនុយ្សចែសមាត់នៃអើស៖ “គ៝ប់លែៈជេសងក៝ចមាខាន់មៃ តីសមាខាន់មៃមោអុចអ្យាត់អោស។ អាបៃអ្យាមើមទឹងខាន់មៃអុចដាៈគ៝ប់ងក៝ចតៃទូតឹជឹត? ខាន់មៃអុចជានអ៝សម៝នពាង់ដ៝ង់បាស?” 28 ខាន់ពាង់មឺចរាម៝តអោឞាល់៖ “មៃអីលាសអ៝សម៝នពាង់ ហេនអ្យាអ៝សម៝នចែមោឆេ ។ 29 ហេនគឹតកោរាញឞ្រាសលែៈងើយមាមោឆេ ងាន់ យើនមាឞូនុយ្សអីនៃហេនមោគឹតអោស ឞើសតាៈនាវទើយពាង់!”* 30 ឞូនុយ្សអីតាៈចែសមាត់អីនៃលាស៖ “គ៝ប់មោវ៝ត់អោសខាន់មៃលាសមោគឹតឞើសតាៈនាវទើយពាង់ យើនមាពាង់លែៈជានអ៝ន់មាត់គ៝ប់ឆៃអាង។ 31 ឞ៝ន់លែៈគឹត លាសឞូនុយ្សជានតីស កោរាញឞ្រាសមោអ្យាត់អោស។ ឞូនុយ្សឞ្លាវក្លាចយើកមាពាង់ នទ្រែលមាជានតឹងនាវពាង់អុចមើពាង់អ្យាត់។* 32 នតើមឞើសកោរាញឞ្រាសរាហាក់ញជេងនែសនតូ អេហ៝ៈព្រ៝តតាង់គែសឞូនុយ្សឞ្លាវជានឞូនុយ្សចែសមាត់ឞើសនទុលមែអ៝ន់ឆៃអាង។ 33 លាសឞូនុយ្សអីនៃមោគែសលោសតាៈឞើសកោរាញឞ្រាស ពាង់មោអោសទើយជាននទើកើតនៃ”។ 34 ឞូលាសមាពាង់៖ “មៃជេងឞូនុយ្សជានតីសហោងាន់ឞើសនទុលមែ មើមមៃឞាញ់នតីលាសមាហេន!” ជេសរីឞូមព្រើសអោឞាល់លោសអាទីស‡។

35 ឞ្រាសយេឆូ តាង់ឞូមព្រើសឞូនុយ្សអីតាៈចែសមាត់នៃនើសលោសអាទីស ជេសរីឞ្រាសយេឆូ ជ៝យម៝ប់ពាង់ អោប៖ “អាសមៃញឆីងដ៝ង់មាក៝នឞូនុយ្សអីតាៈឞើសកោរាញឞ្រាស?” 36 ពាង់អើស៖ “អើកោរាញ អាសពាង់អីរីមេស ឆើមមឞើសអ៝ន់គ៝ប់ គ៝ប់ឞែមាញឆីងមាពាង់”។ 37 ឞ្រាសយេឆូ លាស៖ “មៃលែៈឆៃពាង់ពាង់អ្យាហែសអីលែៈតឹមងើយមាមៃអាបៃអ្យា”។* 38 ឞូនុយ្សចែសមាត់នៃលាសមាឞ្រាសយេឆូ ៖ “អើកោរាញ គ៝ប់ញឆីងមាមៃ”។ ជេសរីឞូនុយ្សចែសមាត់នៃយើកមឞាសឞ្រាសយេឆូ តានៃរ៝។

39 ឞ្រាសយេឆូ លាស៖ “គ៝ប់វាច់តានែសនតូអ្យា គៃមាផាតទោយ្សទឹងលែៈឞូនុយ្ស ជេសរីអ៝ន់ឞូនុយ្សចែសមាត់ជេងឆៃអាង នអ៝ប់មាញហើមាឞូនុយ្សអីកើបអេងមាត់ខាន់ពាង់នើមឆៃអាង ខាន់ពាង់បេងមាចែស យ៝រលាសឞូនុយ្សគឹតនាល់កោរាញឞ្រាសងាន់តឹមឞានមាឆៃអាង”។* 40 ផូងផារីឆី អីគុនទ្រែលឞ្រាសយេឆូ តានៃ តាង់ពាង់លាសកើតនៃ ជេសរីអោបពាង់៖ “លាសនទ្រីមៃក្វាល់ហេនអ្យាឞូនុយ្សចែសមាត់បាស?” 41 ឞ្រាសយេឆូ លាសមាខាន់ពាង់៖ “លាសខាន់មៃឞូនុយ្សចែសមាត់ងាន់តានាវមឹន មោគឹតវ៝ត់នាវកោរាញឞ្រាស ខាន់មៃមោអោសគែសទោយ្ស តីសមាខាន់មៃកើបអេងមាត់ខាន់មៃឆៃអាងលែៈគឹតវ៝ត់នាវកោរាញឞ្រាស យើនមាមោអោសរ៝មគ៝ប់ កើតនទ្រីទោយ្សហោមក្រេបមរ៝តាខាន់មៃ”។*

*9:2 ៩:២៖ នង ២០:៥; អេឆេ ១៨:២០; លក ១៣:២

*9:3 ៩:៣៖ យហ ១១:៤

*9:4 ៩:៤៖ «ត្រោកហោមអាង» ឞ្រាសយេឆូ មឞើសមានាវពាង់ហោមរេស‌ «ត្រោកលែៈមាង់» មឞើសមានាវពាង់ខឹត។

*9:4 ៩:៤៖ យហ ៥:១៧

*9:5 ៩:៥៖ យហ ៨:១២

*9:6 ៩:៦៖ មក ៨:២៣

*9:14 ៩:១៤៖ យហ ៥:៩

†9:16 ៩:១៦៖ នាវជានឞាសនាវជីឞូតានារឆាបាត់ មោទីមានាវវៃផូងអីឆ្រាអែល។ នាវលាយទាកមានែសឞ៝លលាសដេៈកាដោយ ហោមឞូកើបជានការមោទីជានតានារឆាបាត់ ដ៝ង់។

*9:16 ៩:១៦៖ យហ ៩:៣១, ៣៣; ៣:២

*9:22 ៩:២២៖ យហ ១២:៤២; ១៩:៣៨

*9:24 ៩:២៤៖ យហ ៨:៤៦

*9:29 ៩:២៩៖ នក ១២:៧-៨

*9:31 ៩:៣១៖ នម ៦៦:១៨; ១៤៥:១៩; នហ ១៥:២៩

‡9:34 ៩:៣៤៖ «លោសអាទីស» មោលាស «ឞើសញីសរាបុនផូងអីឆ្រាអែល »។

*9:37 ៩:៣៧៖ យហ ៤:២៦

*9:39 ៩:៣៩៖ មថ ១១:២៥; ១៣:១១-១៧

*9:41 ៩:៤១៖ យហ ១៥:២២