1 JOHANE
Johanem dis tcgãyas tc'ãà di sa
Téé-cookg'ai sa
Tc'ãà dis tcgãyas Johanem di sa cám̀ sara tséé sara kaia sara úúa hãa:
1. Gas di ne nxárá-kg'ao nes ko ntcàm, Jeso Krestem koe ne gha guu a Nqarim cgoa kg'õè ka.
2. Gas di ne nxárá-kg'ao nes ko dqàè, ẽe gha ko tshúù-ntcõa di xu xgaa-xgaa-kg'ao xu xùri ne. Ncẽe xu xgaa-xgaa-kg'ao xu kò xgaa-xgaa, ncẽem nqõóm di zi gúù zi tshúù zi i sa, Me Jeso ba gaa domka cuiskaga khóè ba iia hãa tite. Eẽ xu xgaa-xgaa-kg'ao xu kò xgaa-xgaa, kgoaraèa tsi kò hãa ne tsi ncẽem nqõóm di zi kg'õè-kg'áḿ zi koe kgoarasea hãa sa; a xu a kò gataga xgaa-xgaa, tseegu di dtcòm̀a nea nqõóm di dtcòm̀ tama a sa, i gúù méé tama, nta ma tsi ga ko ma kg'õè igaba. Igabam ko Johane x'áí, Jeso Kreste ba kò tseegukaga khóè Me e sa, a ba a ko náà-kg'am a ko máá, wèé ne ẽe ko Jesom koe dtcòm̀, a Nqari ba ncàm̀a hãa ne méé ne gane ka c'ẽea ne ncàm̀, témé.
Qaa-qaasa kg'uia ne:
- ncàm̀ku sa
- x'áà ba hẽé naka ntcùú ba hẽéthẽé e
- tseegu sa hẽé naka tshúù-ntcõa sa hẽéthẽé e
- Krestem koe hãa sa
Tcgãyas q'oo koe hàna zi:
- X'áà ba hẽé naka ntcùú ba hẽéthẽé e (1–2)
- Nqarim di ne cóá ne hẽé naka dxãwam di ne hẽéthẽé e (3)
- Tseegu sa hẽé naka tshúù-ntcõan hẽéthẽé e (4:1-6)
- Ncàm̀kuan di tsééa ne (4:7-21)
- Tààs dtcòm̀s di sa (5)
X'áàn hẽé naka ntcùúan hẽéthẽé e (1–2)
1
Kreste ba kg'õèam dim Kg'ui Me e
1 Gaas ẽe kò nqõóm ko tshoa-tshoase koe guu a hàna hãa, ta gaas ka kóḿa hãa, a tcgáía ta ka bóòa hãa, a tshàua ta cgoa qgóó a xám̀a hãa sa, nxãas ka xae ko xgaa-xgaa tu u, ncẽe kg'õèan dim Kg'ui ba ii sa. 2 I kò kg'õèan x'áíse; xae kò bóò o, a kò gaan ka nxàea tseegukagu, a xae a kò chõò tama kg'õèan ka xgaa-xgaa tu u, ncẽe kò Abom cgoa hãa a, a kò sixae koe x'áíse e. 3 Ncẽe xae kò kóḿ, a bóòa hãa sa, gaas sixae ko xgaa-xgaa tu us ga si i, nxãasega tu gha sixae cgoa cúís gúù sa kúrú ta tsééa xg'ae, si gatá dis cúís gúù sa kúrú a tsééa xg'ae sa Abo ba hẽé naka Cóásem Jeso Kreste ba hẽéthẽé di sa ii ka. 4 Xae ko ncẽes gúù sa góá máá tu u, nxãasega xae gha cg'oèase qãè-tcao ka.
X'áàn hẽé naka ntcùúan hẽéthẽé e
5 Xae ncẽe tchõàn Gam koe kóḿa hãa, a ko gaan ka xgaa-xgaa tu u, ncẽe ko máá: Nqari ba x'áà Me e, i Gam koe cúí ntcùú ga káà a, témé e. 6 Ncẽè Gam cgoa ta cúís gúù sa kúrúa hãa a ko tsééa xg'ae, ta ta kòo méé, igaba ta kòo ntcùúan q'oo koe qõò, ne ta ko tshúù-ntcõa, a tseeguan kúrú tama. 7 Igaba ncẽè x'áàn koe ta kòo qõò, ncẽem ma Gabá x'áàn koe hãa khama, ne ta gatá ka c'ẽe ne cgoa cúís gúù sa kúrúa hãa a ko tsééa xg'ae, i ko Gam dim Cóám Jesom di c'áòan wèé chìbian koe q'ano-q'ano ta a.
8 Ncẽè káà chìbi ta a, ta ta kòo méé, ne ta ko qàe-qaese, i tseeguan gatá koe káà a. 9 Ncẽè chìbia ta ta kòo nxàea tcg'òó, nem tseegu a tchàno Me e, a ba a gha gatá di tchàno taman koe qgóóa máá ta a, a gha thẽé wèé chìbia ta koe q'ano-q'ano ta a. 10 Ncẽè chìbian ta kúrú tama, ta ta kòo méé, ne ta ko tshúù-ntcõakagu Me, Me Gam dim kg'ui ba gatá koe káà me e.