BAB-GAYABURBAGI-SUNMAKLEGED-GARDA
ECLESIASTÉS
GEBE-SOGLENAID
Garda-nug
Bab-Gayaburbagi-Sunmakleged-Garda. We-garda, Griego-gayabali, Ekklesíaʼye bileged. Hebreo-gayabardina, Qoheletʼye bileged. We-gaya-sogbogwadi, “gayaburbagi-sunmaklegedye” sogleged, degine, “igar-itolealile, iduakwaa sunmakedye.” De-ukinbali, “dule-danar-ambikuedgi-sunmakedye,” soglebalid.
Bab-Gayaburbagi-Sunmakleged-Gardagi weyob sunmaklenaid
Dule-we-garda-narmaksadi, dule-Bab-gayaburbagi-sunmakedid. Israel-yargi, Jerusalén-neggweburgi David-machi-Salomón reyga megisad. We-dule, undargus-neg-dakdanikidba sunmaknaid. Ibmar-nue-durdaksadba sunmaked, bela ibmar-e-arganagwar-ebusadba sunmaked. We-dule, magar itosad, “Bab-Dummadi bonisuli dule-imaksanad, degi-inigwele, dule na dukin boni-amiddamarye.” Degisoggu, bela we-napneggi ibmar-guedi, wile-itolegeddibe, weligwar-itolegeddibe, gwen nabirsurye, binsarsunna ibmar-guye soged.
We-garda bergunaidgine, soged: Bab-Dummad-dobee-nanaed bur biriginedye. Bela ibmar-baramilegedi, ase bergusiye.
We-gardagine, weyob ilemakar sunmaklenaid:
1. Dule-Bab-gayaburbagi-sunmaked e-san-gusadgi sunmaked (1:1–2:26).
2. We-napneggi-dulemar-gudiid (3:1–12:8).
3. Sunmaklesad-e-burba (12:9-14).
Be itogua.
1. DULE-BAB-GAYABURBAGI-SUNMAKED E-SAN-GUSADGI SUNMAKED
1
(1:1–2:26)
Bela ibmar binsarsunna imakleged
1 Odurdaked-Saila David-machi, Jerusalén-neggweburgi-reyga-megisadi, weyob sogsagusad:
2 “We-napneggi-ibmar-imaklegedi, binsarsunna imakleged,
bela igarga gwen gusulid.”
3 Dule we-napneggi na gandikidba-alamakdiile,
¿ibu-nued egi amioe? Ibmar-nued amiosuli.
4 Dulemar gwalulemamaid. Bamaladdi burgwemamaid.
Ar napnegdi amba gannar naid.
5 Dad-ibeler nakwiardaed, argwatedabalid.
Na-bia-nakwiardaedse gannar gwae-gwae naddabalid, gannar nakwidabaligar.
6 Burwa-goledi, dad-nakwed-argan-nuedsik gollardaed,
geb sorbali, dad-nakwed-argan-sapiledsik aibiliddaed.
Deyobi, burwa-goledi, gwen bogigusuli,
gannar-gannar bipirmakdiguad.
7 Bela diwarmar demarse nomaid,
degi-inigwele, demardi gwen engudasulid.
Diwarmar na bia gwalulemai, ase gannar aibirsibalid,
adi, agi gannar nodagegar.
8 Bela we-ibmargi-sunmaklegedi, budar-itoleged uked,
gwen egi bar sunmaklebidasulid.
Ibya, ibmar-dakedi gwen geggusulid,
uaya, ibmar-itogedi gwen geggusulid.
9 Bato ibmar-gusadi, gannar gunonibaloed.
Bato ibmar-imaklesadi, gannar imaklenonibaloed.
We-napneggine, ibmar-gwapid sated.
10 Dule-gwensak, sokardibe:
“Be dakena, wedi ibmar-gwapidid.”
Ar we-ibmardi, bato gusgu gudiguad,
anmar-idu-gudigusmalad-abargi bato gudiguad.
11 Ibmar-epenne-gusmaladi, bela ielesad.
Dule-yoedse-gwalulemaloedi, bela ibmar-yoedse-guoedi, iemarmogoed.
Dule-Sunmakedi, e-san-gusadgi sunmaked
12 Ani, an emar-odurdakedid, an Israel-yargi, Jerusalén-neggweburgi reyga mai gusad.
13 An nue-binsaed-nikadba bela we-napneggi-ibmar-imakleged-e-burba-baraminai, degi, egi nergunai an gusad. Bab-Dummad dulemarga we-arbaed-dummad uksad, adi, egi arbadii gumalagar. 14 Bela we-napneggi ibmar-imaklegedi, an daksad. Bela a-ibmarmar binsarsunna imakleged, gwage-nunmaked ukbalid.
15 Ibmar-doperegwadi, geg bar gannar innikii gued.
Ibmar-satedi, geg ebisleged.
16 An binsadii gualid: “Emide, an wegi dule-nug-nikadga gunonikid. Jerusalén-neggweburgi an-idu-dummagan-megismaladba an bur nue-binsaed-nikaa gued. Anyobi, dule-baid bela-bela nue-binsaed-nikaa, bela ibmar-wisi megdisulid.
17 ”An ulubgi bela-bela wisgubigualid, nue-binsaed-nikaguedi, wede ibi obarleye. Deginbali, an magar-itobiguarbalid, binsaedsuli-ibmar-imaklegedi, wede ibi obarlebarye, degi, yogasaar-sunmaklegedi, ibi obarlebarye.
”Geb an wisgunonikid, amba we-ibmarse-bakale, gwage-nunmaked ukbalid.
18 Napiragwa, ar bela-bela nue-binsaed-nikaguedi, bur bule bonigan ukbalid.
Ar dule bur bule ibmar-wisguedi, bur bule naibid itobalid.”