4
Jesúsʼba-nanaimalad, Bab-Dummad-obunnogedgi obunnomaloed
1 Bab-Dummad sogsad, an-obunnogedgi be obunnomaloye. Deyob-anmarga-sogsadyob amba igar anmarga-maisoggu, nue salakarmar, abakalegi bemar gwenna-gwenna a-obunnogedgi obunnoarsurmalale.
2 We-Gayaburba-Nued anmarga soglesadyob anmar-dadganga soglesmoganad. A-gayaburba-nued-itosmar-inigwele, gwen bendaklessurmalad. Ar ade, itosmargu, Bab-Dummad-bengusmalad.
3 Ar Bab-Dummad egi-bengusmaladga sogsagusad:
“Degisoggu, an sae-itogedgine, an weyob ise-sogar sogsa gusad:
¡An-obunnogedgi bemar bipisaale gwen obunnogosurmarye!”
Salmo 95:11
Ar anmardi Bab-Dummad-bengussurmarsoggu, a-ular, anmardi Bab-Dummad-obunnogedgi obunnomarsunnoed.
Ar Bab-Dummad napneg-nasiksagu, bato bela ibmar-imaksad. 4 Ar Bab-Dummad-Gardagi obunnoged-ibagi weyob sognaid:
“Ibagugled-nagunonigu (7), Bab-Dummad obunnosad, bar arbassulid.”
Génesis 2:2
5 Bab-Dummad-Garda-sogedyob gannar an sogbardo, Bab-Dummad sogye:
“¡An-obunnogedgi bemar bipisaale gwen obunnogosurmarye!”
Salmo 95:11
6 Anmar-dadgan gayaburba-nued-itosmar-inigwele, Bab-Dummad-sogedba ibmar imaksasurmalad. Agala, gwen obunnogedse dogsasurmalad. Degi-inigwele, baigandi amba bukidar Bab-Dummad-obunnogedgi sunna obunnodamarsundo. 7 A-ular, Bab-Dummad gannar iba nasiknonikid, soged: “Emi-ibaginye.” Dikasurgus deyob-sogsad, emidi, Davidʼbali anmarga sognaid:
“Emi-ibagi Bab-Dummad-Gayaburba be itomalale,
melle be-dadgan Bab-Dummadgi gwisgus-gusmaladyob, bur bule burgumalo.”
Salmo 95:7-8
8 Ar Josué anmar-dadgan obunnogega-imaksana, Bab-Dummad a-sorbali, bar obunnoged-baidgi sunmaksasulinad. 9 Degisoggu, Babba-nanaimalad obunnoged-baid ega nue-maisunnad. 10 Ar dule Bab-Dummad-obunnogedgi obunnosale, na e-arbaedgi obunnomogad. Ar igi Bab-Dummad e-arbasad-sorba obunnosmoga, deyobi, obunnomogad. 11 Degisoggu, a-obunnogedgi anmar obunnomogagala, nue-alamaknai imakmarsun, adi, melle anmar uayasuli anmar-dadgan-gusadyob gumarmogagar.
12 Ar Bab-Dummad-Gayaburba dulasailad, degi, gannarbabalid.
We-Gayaburba, es-suid-nugar-darbogwadba bur bule dogbalid.
Dogedi, san-burbaginse-bakar, doged, anmar-burbase amba dogbalid.
Yokormar-gwadilenaidse, degi, galagan-e-nisse-bakar, doged.
Deginbali, dule-binsaed, e-gwage-ibmar-imakbied bela mag dakbalid.
13 Bela-ibmar-obinnilesadi, Bab-Dummadgi dukunaisulid, bela e-asabin magar-daklenaidbiid. Anmar-Bab-Dummadga-ibmar-sogoedgi, ibmar dukunaisulid.
3. JESÚS, DULE-IRWA-BAB-DUMMADSE-GOLED-BUR-DUMMADID
(4:14–10:18)
14 Jesús, Bab-Dummad-Machi dule-irwa-Bab-Dummadse-goled-bur-dummad nibnegse dogsad. Agala, anmar Jesúsʼgi-bensulidgi gatik-akanai gumarsun. 15 Ar anmar-irwa-Bab-Dummadse-goled-bur-dummad anmar-sunna wilubdaklesmogad, degite, gwen isgussulid, a-ular, anmar-nollo-itogedgi nabir wile anmar-daksunnad.
16 Degisoggu, anmar Bab-Dummad-dulemar-sabgumaid-e-ologanase bensulidba walikgumarsun. Adi, Bab-Dummad wile-anmar-dakega, degi, bonigan-abargi anmar-bendake-wilubsulinadgi anmar-bendakegar.