9
Israel-dulemar sabsur-odurdaklegoed
1 Oseas, Israel-dulemarga sogded:
“Israel-dulemar, mer be weligwar-itomar,
mer be neggwebur-baiganyob iba-onomar.
Ar bemar galagwensuli nanadmalad.
Be-Bab-Dummadgi be bangudmalad,
bab-dummad-baigan-nug be odummodmalad.
Bela ibmar-gwag-omukuleged-neggi gambasaed-e-mani-bennukleged bur be abeged.
2 A-ulale, ibmar-gwagmar, uvaʼmar gwen be-oimmogosurmalad.
Vino-binid bar yeer-goblege guosulid.
3 Efraín-dulemar Bab-Jehová-yargi bar ambikuosurmalad,
gannar Egipto-yarse-namaloed.
Asiria-yargi mas-isemalad gunmaloed.
4 Bab-Jehováʼga bar vino-eoleged ukosurmalad,
e-ibmar-Bab-Dummadga-ukmalad, bar ega ibnuedga guosulid.
Madu-gullegoedi dulemarga madu-dule-burgwaled-neggi-gullegedyob ega guoed.
Dule a-madu-guchale, swilidiksuli guoed.
Unnila sikwas nabir-itogega ega guoed.
Degi-inigwele, we-madu, Bab-Jehová-negse seledosulid.
5 ”Bab-Dummadga-iba-onolegedgi ¿ibu-be imakmaloe?
Bab-Dummadga-itoakwaa iba-onolegedgi, ¿ibu-be imakmarbaloe?
6 Amba sabsur-odurdaklegedgi be wakinye sogmalale,
Egipto-dulemarse be galemaloed,
degi, Menfis-neggweburgi be-digmaloed.
Be-ibmar-nuegan-manigi-sobarmaladgi, dakemar ammurudoed,
be-dordonegmargi ikomar ammurudoed.
7 Sabsur-odurdakleged-iba noni,
buged-imakleged-iba noni.
Israel-dulemar, ¡be wisigarmar!
Be-isgued dogdargusad,
isdar-emar-dakedi be baligannosad.
Emide bemar, Bab-Dummad-gayaburba-barsoged dule-gegegwaga imakmalad.
Deginbali, nia-saedga be Dule-Bab-Dummad-burbaba-ibmar-soged imakmalad.
8 Bab-Dummad-gayaburba-barsogedi, Bab-Dummadmala, Efraín-neggweburga nakulegedga gumalad.
Wemar-yolemalagala, bemardi sakiyob e-idu galumar-urbedamalad,
deginbali, Bab-Dummadse-goled-neggi bemardi wemar-sae-dakdamarbalid.
9 Bemar Gabaaʼgi-dulemar-gusmaladyobi,
nue bela-belad be isgudmalad.
Ar Bab-Dummadi, be-isgued iegosulid,
be-isguedba sabsur-bemar-odurdakoed.”
10 Bab-Jehová sogded:
“An Israel-dulemar-aminonigu,
nega-dulesulidganba uva-san-amilegedyob an amisgusad.
An gebe e-dadgan-dakargua,
higuera-sapigi-e-san-dutuu-ainidanikiyob an daksad.
Degi-inigwele, emar aka bab-dummadyob-imakleged-Baal-Peorʼba nanadmalad.
Abali na isgudmalad, dule-isguedga gudmalad.
We-bab-dummadbina sulibinsa-itode gudmalad.
11 Efraín-dulemar-e-ibmar-nuegan-bukidar-nikadi bar daklegosulid. Nuu-gukudeyob guoed.
E-omegan bar gurgin-nika guosurmalad, bar mimmigan-nikuosulid.
E-dula bar sapibeneggi-mai guosulid.
12 Ar amba e-mimmigan-dungumamai-dakdemalale,
we-napneggi amba an ei obelogoed.
An egi bangudele, ¡dummad-wilemaloed!
13 Efraín-yala, Tiro-yalayob-dakleged.
Yala-nuedgi bukwamalad.
Degi-inigwele, Efraín-dulemardi burgwed-igarba na e-mimmigan-semamaid.”
Oseas-Bab-Dummadse-gochad
14 Oseas sogded:
“Bab-Jehová, ega be ibmar-ukbied ukdo.
Ega e-omegan mellegega be imake,
e-omegan-e-nunismar be odinnoge.”
Bab-Dummad Oseas-abin-imaksad
15 Bab-Jehová soged:
“Israel-dulemala, Gilgal-neggweburgi bela isguali gudmalad.
De-akale, an bemar isdar dakded.
Bemar-isgued-ulale, anse-goled-neggi an bemar-onioed.
Bar an bemar-sabguosulid,
ar ade, bela be-dummagan uayasulidamalad.
16 Efraín-dulemar galakuded:
Sapi-mali-dingudedyob nadmalad,
sapi-bar-sanmaksurmaladyob nadmalad.
Amba na mimmigan-nikudmalale, an ei oburgoed.”
Oseas Israel-dulemarga sogded
17 Oseas Israel-dulemarga sogded:
“Ar bemar, an-Bab-Dummadba ibsassurmarsoggu, Bab-Dummad bemar-obanoed.
Neggwebur-baigan-abargi yarsuli be gudii gumaloed.”