13
Dule-e-ambe-gakabogwad (12) Canaán-yar-argaapmalad
(Deuteronomio 1:19-33)
1 Bab-Jehová Moisésʼga sunmakded, ega sogded: 2 “Canaán-yar Israel-dulemarga an ukesokarsoggu, dulemar a-yar arganaega be barmide. Israel-dadgan-warambe-gakabogwad-irba (12), sapin-dummagan-war-wargwen be barmidoed.”
3 Geb degine, Moisés Bab-Jehová-ega-sogsadba nega-dulesulidgan-Paránʼye-nugad-akar dulemar-barmisad. We-dulemarde, bela Israel-dulemar-abargi dule-dummagan gumalad.
4 We-dulemarde, wemalad:
Dad-dummad-Rubénʼgi-danikidi: Samúa Zacur-e-machi.
5 Dad-dummad-Simeónʼgi-danikidi: Safat Horí-e-machi.
6 Dad-dummad-Judáʼgi-danikidi: Caleb Jefone-e-machi.
7 Dad-dummad-Isacarʼgi-danikidi: Igal José-e-machi.
8 Dad-dummad-Efraínʼgi-danikidi: Oseas Nun-e-machi.
9 Dad-dummad-Benjamínʼgi-danikidi: Palti Rafú-e-machi.
10 Dad-dummad-Zabulónʼgi-danikidi: Gadiel Sodi-e-machi.
11 Dad-dummad-Joséʼgi-danikidi, Dad-dummad-Manasésʼsik-danikid: Gadi Susi-e-machi.
12 Dad-dummad-Danʼgi-danikidi: Amiel Gemali-e-machi.
13 Dad-dummad-Aserʼgi-danikidi: Setur Micael-e-machi.
14 Dad-dummad-Neftalíʼgi-danikidi: Nahbi Vapsi-e-machi.
15 Dad-dummad-Gadʼgi-danikidi: Geuel Maqui-e-machi.
16 Moisés dulemar-yar-arganaega-barmisgusadi, weyob nugmalad.
Moisés, Nun-machi-Oseasʼgala nug ogwasad, Josuéʼye onugsasad.
17 Moisés, dulemar-Canaán-yar-arganaega-barmidsokalidga sogded: “Neguevʼgi bemar nasmaloed, geb yalaganse bemar modapoed.
18 Nue be yar argamalo, negde igidibe,
dulemar-agi-bukmalad, bule nollosurmardibe, igi, nollomardibe,
bule mergumardibe, igi, ichemardibe.
19 Dule-bukmaladgi, neg nueddibe, igi neg ichakwadibe.
E-neggweburmar-bukwadgi, galu-matusulid-dummagan mamaidibe, igi, galu-matusurmalad mamaisurdibe.
20 Napade, igidibe, gadi ibmar-sanmakdibe, igi, ibmar-geg-sanmakdibe.
A-napaginde, sapimar-nikadibe, sapimar satedibe.
Melle be dobgumalo.
A-yargine sapi-sanmar-nikadi, bemar sedamalo.”
A-ibagangi, uva gebe-goroleged-ibad.
21 Dule-barmilesmaladi, nega-dulesulidgan-Zinʼye-nugad-akar Hamat-neggwebur-dogedse neg-argaapmalad, Rehob-neggweburse warmakapmalad. 22 Neguevʼgi nasmargu, Hebrón-neggweburse warmaksamalad. Hebrónʼgine, Anac-e-wagan Ahimán, Sesai, degi, Talmai mamaimalad. Hebrón-neggwebur bato birga-guglegus-siid (7), geb Zoán-neggwebur Egipto-yargi bukunonikid. 23 Dule-barmilesmalad Escol-dianse-modapmargu, uva-dubgi uva-dukgwen-naid siksamalad. Geb dulemar ebo suar-abargi uva-nai searmalad, degi, gusebyob-dakleged-granadoʼmar, degine, higo-sanmar searmarbalid. 24 Israel-dulemar uva-dukgwen-gwachadgine, neg-naid Escol-nebaye onugsasmalad.
Dule-yar-argaapmalad-gannar-nonimalad
25 Dule-neg-argadimaladi iba-dulabogusgu (40), gannar nonimalad. 26 Dule-neg-argaapmalad nega-dulesulidgan-Paránʼse nonimalad, Cadesʼye-neg-nugadse.
Agine, Moisésʼga, Aarónʼga, degi, bela Israel-dulemarga, bela neg-argasmaladba sunmaksamalad. Geb degine, sapi-san-senonimalad oyosmarbalid. 27 Deginbali, Moisésʼga weyob sogsamarbalid:
—Neg-argaega be anmar-barmisadse anmar modapmalad. Ar nue-napiragwad, inso agi gadi-ibmar-sanmaked, napa-nuedid. Bemar dakegala, sapi-san an bega senonimalad. 28 Degi-inigwele, dulemar-a-yargi-bukwamaladi dutusur nanaed. E-neggweburmar dummagan nanaed, degine, e-neggweburmar nue-sakdigar bukwananabalid. Deginbali, Anac-e-wagan anmar daksamarbalid. 29 Neguevʼgi Amalec-dulemar bukwananaed. Yalaganbali, Het-dulemar, Jebuseo-dulemar, degi, Amorreo-dulemar bukwananaed. Canaán-dulemardi demar-gakaba, degi, Jordán-diwar-gakaba bukwananamalad.
30 Geb degine, Caleb Moisés-asabin dulemar-bar-sunmakega imaksasulid, geb sogded:
—Anmar we-yarse ubonae. Anmargadga anmar we-yar-imaknae. Ar an wisid, anmar we-dulemar-bukwadgi nakwemaloed.
31 Ar dulemar-Calebʼba-arbimaladdi sogdemalad:
—We-dulemar-bukwamaladi anmarba bur dutusursoggu, anmar geg we-dulemarse bila-onogega namalad.
32 We-dulemarde Israel-dulemarga yar-daksamaladgi neg-sunnasurye sogdemalad. Geb sogdemarbalid:
—Anmar-negmar-dakapidgi, yarmar-argaapidgi bela dule-bukmaladi bemar-obelogoed. A-yarmargine, anmar dulemar-bukwa-daksamaladi, bela dule-masdummagan-nanaed, dule-bipisurmaladid. 33 Aginbali, anmar Anac-e-wagan-dule-masdummagan daksamarbalid. Anmar, a-dulemarba sesyob-dakle-nanaed, emar burwii emarba anmar-dakmaloed.