7. AGUR-E-BINSAED-NUEGAN-SOGSAD
30
(30:1-33)
1 Jaqué-machi-Agur-ibmarmar-sogsad. Agur, Itielʼga, degi, Ucalʼga weyob sunmaksad:
2 “Andi dulemarba bur bule ibmar-wissulid,
akusunna an ibmar itoged.
3 Binsaed-nikaguedi an durdaksasulid,
Bab-Dummad-Isligwaledbela an akusunna itoged.
4 ”¿Doa nibnegse nakwiapi?
¿Doa nibneg-akar aidenoniki?
¿Doa e-argangi burwa gaoe?
¿Doa e-mor-dummadgi demar gaoe?
¿Doa napneg-naid-dikarmar omesisa?
¿Ar be wisi, doa we-ibmarmar-imaksa, degi, e-machi-nug be wisbali?
5 ”Bela Bab-Dummad-gayaburbagi bensuli guleged.
Bab-Dummadi, sigu-abgaedyob dule-egi-bendakleged-amimalad-irwa gwisgued.
6 Melle Bab-Dummad bega-sabsur-ibmar-sogega,
degi, melle dule-gakansaedga be-imakbaliga,
melle-e-gayaburbamar-maid be obulogo.
7 ”Bab-Dummadye, unnila ibmar-sogbo an bese egised.
An burgwed-iduale, melle be anga imaksuli guo,
be anga we-ibmar-sogbogwad imakedsego:
8 Igar-isganagi, gakan-igargi, be an-ollor-imake.
Melle dule-wilegedga, dule-mani-ibedga be an-imakbalo.
Unnila ibmar-nue-abelemaladi be anga ukmai imako.
9 Ar an mani-ibedga gudele, abakar na be-iealile,
abakale an sokalile: ¿Ar doa wede Bab-Jehováʼye?
Degine, an wiledibalile, abakar ibmar-atursaarbalile,
degidbali, an be-nug-ichoge dakledagoed.
10 ”Melle mai-e-dummad-asabinni e-maigi ichakwa sunmako,
adi, melle, we-mai be-ukabsaega, degidbali, be dummad-wilegoed.
11 ”Ar gwen-gwena dulemar gadi-e-bab-ukabsadaed,
degi, e-nangi ise-nued binsasurdabalid.
12 Ar gwen-gwena dulemar san-swilidikye na bidamalad.
Degi-inigwele, isguedginbi gudidamalad.
13 Ar gwen-gwena nuga-nikamaladye na sogdidamalad,
yamo bule-bule dulemarga gudidamalad.
14 Gwen-gwena dulemar dule-wilemalad-wiogega, dule-ibmar-nue-abedimalad-wiogega,
es-suidyobi, e-nugar-imaksa gudidamalad, estinyobi, e-akugar-imaksa gudidamalad.
15 ”Nus-abe-gobed, mimmigan warbo nikad,
amala unnila weyob sokardamalad: ‘Udage, napi-udage.’
”Ibmarmar geg wis-nubin-itodamaladi, sogbaa nikabalid.
Ibmar-sogbakegwaddi, ‘gusye’ geg sogdaed.
16 A-ibmarmar, wemalad:
Burgwarmalad-meged-galu, napi-dule-burgwarmalad-abedaed.
Ome-geg-mimmi-baked, mimmigan-abedaed.
Napa diibina napi-sogdaed.
Soo-duurmaksiid napi-sapan-abedaed.
17 ”Dule, urwakwaa e-bab-dakele, degi, e-nan-sogedba dasulile,
sikwisichid e-ibe ibya-onosun,
mula-non-ginnid, dula-gunsun.
18 ”Ibmar-sogbaagwad an geger itoged,
ibmar-sogbakegwaddi, an nue-aku itoged.
19 A-ibmarmar, wemalad:
Mogir-billiba-sulubagi-nalla-naguedi, igi an magar itogoe.
Akwasaila-dummadgi-naibe-nakwedi, igi an nabir magar itogoe.
Demargi-ur-dummad-nadapir-geg-dogedi, igi an nabir magar itogoe.
Degine, igi an magar itobaloe, dule abirgunagwar-gudii gubidaed.
20 ”Ome, machered-dikarba-yoleged-e-daed weyobdo:
Ome, machered-baid-ebo nog-gobdedaed,
a-sorbali, na abalukdedaed.
An neg-oakalossurye sogdedaed.
21 ”Dulemar-ibmar-abedasulid-sogbaa nikadi, napneg-wawanmaker saed.
Sogbakegwaddi, napneg-giglimaker imaked.
22 A-ibmarmar, wemalad:
Mai reyga megider, geger dakleged.
Dule-binsaedsulid mani-ibedga-guder, geger dakleged.
23 Ome-galagwensuli-nanaed sui-nikuder, geger dakleged.
Mai-ome e-dummad-omegi dummadga-guder, bur bule geger dakleged.
24 ”Napneggi ibdurgan-burwigwad sogabake nikad,
dule-binsaed-ibedbali bur binsaed-ibeganad.
25 A-ibdurgan wemardo:
Iglimar, sorda-gandikidsurmaladid,
degi-inigwele, yor-mosale, e-mas saboddamalad.
26 Nubimar, dogdar sorda nikasurmalad,
degi-inigwele, akwa-ollogana-yaba e-gabedneg sobmalad.
27 Sesmar, e-idued satemalad,
degi-inigwele, darekwaa nadapdamalad.
28 Asbanmar, baisursunna argangi galemalad,
degite, reyneggi gudidamalad.
29 ”Ibmar-sogbaa nikabalid, yeerdakle-gandikidba garmakdidaed.
Sogbakegwaddi, gandikidba nanadidaed.
30 A-ibmarmar, wemalad:
Achumigur-nono-wawaad, ibmar-durgan-bamaladba bur buledid, ibmar-abin sikirmaked satedaed.
31 Gannir-machered, san-dummarbaa imakdidaed.
Sibad-machered, e-bebe burwisur-dakledaed.
Degine, rey, e-sorda-bila-onomalad-asabin e-ologurgin-sii nadapdaed.
32 ”Dule-binsaedsuliyobi be san-odummosale, melle bar egi be binsao.
Ibmar-isgana-imakedgi be binsas-gudiile, melle bar egi be binsao.
33 Dule, moli-nunis-eguredi, egi e-nunis-gwamakaled amied.
Binnasur be asa-ogolele, bega abe ariodagoed.
Be urwed-amiele,
urwenai be gudoed.”