BAB-DUMMADGA-NAMAKLEGED-GARDA
SALMOS
GEBE-SOGLENAID
Garda-nug
Bab-Dummadga-Namakleged-Garda. Hebreo-gayabali, Tejilimʼye bileged. A sogleged, “Bab-Dummad-nug-odummolegedye.” Wag-gayabardina, “Salmosʼye” bileged.
Gardagi-sunmaklenaid
We-namaklemaladi, Babiloniaʼgi-galesbukwa-Jerusalénʼse-nonigusmaladgi welesnanaed. Judío-dulemarga, we-garda, namaked-gardaga gusad. Gannar-Bab-Dummadse-goled-neg-soblenaigusgu, we-namaklemaladgi namaksamalad.
We-garda akar-akar narmaklesad: Bab-nug-odummolegedgi, dule-abonolegedgi, wile-itolegedgi, isgued-barsogedgi, degi, igar-baigangi narmaklesbalid.
We-namakleged-garda David bur bulesaar narmaksad. Salomón we-garda narmaksamogad, degi, dule-baigan narmaksamogad.
We-namakleged-garda, garda-sogatar ilemakar naid:
1. Garda-soggwen (Salmos 1:1–41:13)
2. Garda-sogbogwad (Salmos 42:1–72:20)
3. Garda-sogbaagwad (Salmos 73:1–89:52)
4. Garda-sogbakegwad (Salmos 90:1–106:48)
5. Garda-sogataled (Salmos 107:1–150:6)
Be itogua.
1. GARDA-SOGGWEN
1
(Salmos 1:1–41:13)
Dule-nuegan, dule-isganamar
1 Dule, dule-binsaed-isganaba nanadisulile, dule-isgudimaladba akadisulile, dule-Bab-Dummadgi-dododimalad-abargi gudisulile,
we-dulegi, Bab-Jehová nued binsadiid.
2 We-dule, Bab-Jehová-Igar-Maidgi bur wergudisunnad.
A-igargi, mutikidbali, ibginedbali, egi binsadisunnad.
3 We-dule, igi sapi diwar-naba aramakgwisdae,
e-iba-sogedba sanmakdedae, deyobi gued.
Bela na e-ibmar-imaked ega nueganbi naddaed.
4 Dule-isganamardi, degisulid.
Igi oros-uka burwaba mileddae, deyobi, dule-isganamardi guoed.
5 A-dule-isganamarga igar-itolealile, gwen san-onogosurmalad.
Degisoggu, dule-isganamar dule-nuegan-abargisii guosurmalad.
6 Bab-Jehová dule-nued-damalad nue-bendakmaid.
Dule-isganamardi, degi-bergudmaloed.