26
Innikidaedgi-sunmaklenaid
David we-namaked narmaksad.
1 Bab-Jehováʼye, an-akar-akar-gudisulid be oyoge.
Begi an bengussulid,
begi gwen an bangussulid.
2 Bab-Jehováʼye, be an-wilubdake,
an-ulubse be an-dake,
bela an-binsanaid be dake,
an-gwage-naid bela ulubse be dake.
3 Be-sabed an nue wisid,
an be-igar-napiragwadba nanadiid.
4 Dule-galagwensurdamaladbali an nanadisulid,
wagar-darbodamaladbali an sigdisurbalid.
5 Dule-galagwensurdamalad an isdarsun-daked,
dule-isganamar an-aiga an imakdisulid.
6 An ibmar-isganase-achadisulidba, an-argan swilidik gued.
Agala, an sunna nabir be-ibmar-ogumakleged-aila-ebirdii gued.
7 Bab-Jehová, agi be-nug-odummogegala, an binnasur namakdii guoed,
be-ibmar-dakledisulid-imaksad-barsogegala, an binnasur gordii guoed.
8 Bab-Jehová, bese-gorleged-neggi-be-maidbina an nue-soged,
be-gargangued-oyomaid-negbina an nue-soged.
9 An burgwisale, dule-galagwensulid-abargi, dule-gindakmalad-abargi,
mer megega be an-imako.
10 Ar unnila, we-dulemar ibmar-isganabi imakdimalad,
emar-yardakedginbi binsadimalad,
manigi emar-binsaed-gaed gudimalad.
11 Bab-Jehováʼye, andi innikigwadba gudiid.
Be an-bendake, wile be an-dake,
12 ar an inniki nanadiid.
Bab-Jehová, dulemar-onmakmalad-abargi,
an be-nug-odummodii an guoed.