28
Bab-Dummad ese wilesakwaa-goled itoged
David we-namaked narmaksad.
1 Bab-Jehováʼye, an bese gole,
ar bedi an-bendakedga gued.
Bab-Dummadye, melle be an-itosuli gue.
Be an-itosulile, bato dule-burgwarmaladba, e-galuse-nadapiyob an guoed.
2 Bab-Jehováʼye, an bese wilesakwaa-gotele,
bitigine, be an-itosana gadin.
Bab-Dummadye, an-bendakega an bese-gotele,
an bese-golega be-Neg-Ise-Islidikidsik argan onakwidele, bitigine, be an-daksana gadin.
3 Bab-Jehováʼye, dule-isgudimaladba melle be sabsur-an-wiogo,
dule-ibmar-isgana-imakdimaladba, melle be sabsur-an-imako.
We-dulemar, unnila asgi dule-baiganga nueganbi sunmakdidamalad.
E-gwage-ulubgindina, egi isdar-binsadidamalad.
4 Dule-isgudimalad e-ibmar-isgana-imakedba, e-galagwensuli-nanaedba, be buged imake.
Dule-isgudimalad e-ibmar-galagwensuli-imakedba, be buged sae.
5 Ar Bab-Jehová-ibmar-imaksadgi bar binsasurgusmarsoggu,
Bab-Jehová-ibmar-imaksad baisur-dakarmarsoggu,
Bab-Jehová bela a-dulemar obelogoed,
baligannarse imakosulid.
6 Bab-Jehová-nug odummolesun,
an ese wilesakwaa-goled an-itosad.
7 Bab-Jehová, an-ogannogedid,
sigu-abgaedyob an-irwa-gwisguedid.
Bela-belad gwage-ulubgi an egi bensulid,
Bab-Jehováʼgi an bendaklesad.
An-gwage-ulubgi, bela-belad-weligwale an itoged,
an-namakedgi dog-nuedye an ega soged.
8 Bab-Jehová, na e-mimmiganga dule-gandikidga gued,
Bab-Jehová, na e-nuggi rey-nugsalegaledga abonoged-gandikidga gued.
9 Bab-Jehováʼye, be-dula be abonoge,
be-mimmigangi be ise-nued binsae.
Sibad-wawaad-edarbed e-sibad-edarbedyobi, be-mimmigan be edarbe,
degisadegu bendakdii be gusun.