99
Bab-Jehová, Rey-Dummadid
1 ¡Bab-Jehová, Reyga maid!
Bab-Jehová e-ologanagi baliwitur-querubinʼye-nugmalad-abargi siid.
Neggweburmar wawanmakmala.
Bela napneg giglimake.
2 Bab-Jehová Sión-neggweburgi bur dule-dummadid,
bela neggweburmargi bur dule-dummadid.
3 ¡E-nug-dummad, e-nug-buled odummomala!
¡Bab-Jehová, dule-isligwaledid!
4 Bab-Jehováʼye, be, Rey-gandikidid.
Igar-innikigwad-imaked be sabed.
Be, dulemarga yobi-gumalad-igar mesisad.
Be, Israel-neggweburgi igar-innikigwadba, ibmar-imaksad,
inniki-sogedba be ibmar-imaksad.
5 Anmar-Bab-Dummad-Jehová-nug odummomala,
Bab-Jehová-asabin, napase-dulluu Bab-Jehová-nug odummomala.
¡Bab-Jehová, dule-isligwaledid!
6 Moisés, Aarónʼbo dule-irwa-Babse-gormaladga gusmarmogad,
Samuel, Bab-Jehová-nug-odummodii gusmogad.
Wemala, Bab-Jehováʼse gordii gusmalad,
geb Bab-Jehová abin-imaksadaed.
7 Wemarga mogir-bubawarba sunmaksad.
Wemala, Bab-Jehová-Igar-Mesisadba nanadii gusmalad,
Bab-Jehová-Igar-Uksadba gudii gusmalad.
8 Anmar-Bab-Dummad-Jehová, wemar-bese-gochagu, be abin-imaksagusad.
Amba e-ibmar-isgana-imaksamalad-ular, be sabsur-odurdaksa-inigwele, bedi, wemargala,
Bab-Dummad-dule-isgussuliyob-dakedga gusad.
9 Anmar-Bab-Dummad-Jehová-nug odummomala,
e-yar-islidikidgi, e-nug odummomala.
¡Anmar-Bab-Dummad-Jehová, dule-isligwaledid!