140
An-bendakye, Bab-Dummadse-goled
David namakmalad-e-iduedga namaked narmaksad.
1 Bab-Jehová, dule-isganamargi be an-ollor-imake.
Sabesur-dule-imakmalad-idu be an-odukue.
2 Ar unnila e-gwagegi, ibmar-isgana-imakedginbi binsadii daed.
Bane-bane urwed-onodii daed.
3 Naibe-nued-gangueyobi, e-gwabin-duku gued.
Naibe-nued-e-gichi-boniyobi, e-sunmaked sedimalad.
4 Bab-Jehová, dule-isganamar-e-gangued-idu be an-odukue.
Sabesur-dule-imakmaladgi be an-ollor-imake,
ar an-ogalakuedgi binsadidamalad.
5 Dule-san-dummarba-imakmalad, an-yardakmalaga, an-idu dub nasiksamalad.
An-idu igargi saki nasiksamalad.
An-nanaedgi an-idu yardakleged-galu osismalad.
6 An Bab-Jehováʼga sogsad: “Be an-Bab-Dummadid.
Bab-Jehová, wilesakwaa an bese-goledi be an-itoge.”
7 Bab-Jehová-Dule-Dummad, be an-Bab-Dummad-bur-gandikidid.
Bila-onolegedgi be an-bendakedid.
8 Bab-Jehová, dule-isganamar e-ibmar-imakbiedi, melle imakega be imake.
Melle na san-dummarba-itomalaga be imake,
melle e-igarmar-nasgumai be imake.
9 Bab-Dummad, dule-an-balegindimalad, an-wiogega-igar-isgana-amismalad
egi dukin-aibinega be imake.
10 Wemargine, sogun-ginnitibiid babatega be imaksun.
Soo-yagine balimelledega be imaksun.
Melle bar noega yaa-matusulidgi-argwanega be imaksun.
11 Dule-geg-gwabin-duku-bargaed, napneggi gudigu guosulid.
Sabsur-dule-imakmalad, boni-dummaganse obelolesun.
12 An wisid, Bab-Jehová, dule-wile-itodiidga igar naboged,
dule-ibmarbina-sogdimalad, Bab-Dummad bendaked.
13 Dule-nuegan, be-nug-odummomaloed.
Dule-innikimalad be-walik-gudii gumaloed.