32
1 “Fayleng nge lanelang, mu telmew ko thin rog,
mu uthumew telmew ko tin nggog.
2 Machib rog e bayi aw ni bod e n’uw,
me ngal’ ni wa’angachal u but’ ni kadbul.
Thin rog e bayi aw ni bod e n’uw ni aw ko woldug ni ka fini tugul,
ma bod e n’uw ni be sa’aw’aw nga ran’ e pan ni kab mererey.
3 Bay ug pining e sorok nga fithingan SOMOL,
ma girdi’ rok e bay ur weliyed feni sorok.
4 “I SOMOL e ba gel ma bay i par ni manaf romed,
ir e ba yal’uw ma bmat’aw urngin e tin ma rin’.
Got romed e ba yul’yul’ ma der ma ban,
ngongolen e bfel’ ma ba yal’uw.
5 Machane gimed e damur yul’yul’gad, dariy rogomed ni ngam manged girdi’en,
ya gimed girdi’en ba nam nib sug ko denen nge sabanban.
6 Mog, arrogon ngongolmed ngak SOMOL,
gimed e pi balyang nir ni dariy e gonop romed?
Ir e chitamangimed, me ir e sunumiymed,
me ir e gagiyeg nagmed kam manged ba nam.
7 “Mu leam niged e som’on, ko fangiyal’ ni kakrom,
mu fithed e chitamangimed nge weliy ngomed murung’agen e tin ni m’ug e ngiyal’nem,
mu fithed e pilibthir nge weliy ngomed murung’agen e kakrom.
8 En ni Th’abi Tolang e ir e pag e f’oth ko but’ nge pi’ ko pi nam;
ir e duwgiliy e gin ngi i par e girdi’ riy.
Ra reb e nam me l’oeg reb i chon e tharmiy ngay,
9 Ma pi’in owchen Jakob e ir e mel’eg ni ir e nge par rok.
10 “I piri’egrad ni yad be yanyan u daken e ted ni desert,
ni bangi ted nder par be’ riy ma ba gel e nifeng riy.
Me par ni ir e ke mang yoror ngorad ma be ayuwegrad,
ni bod feni t’uf lan mit rok.
11 Bod ba eagle ni be fil e changag nga pifak,
ni i focholiyrad nga pon nike pithig nde buch ban’en rorad,
I SOMOL e i ayweg yu Israel ndar mulgad.
12 Yigo’ SOMOL e i pow’iy e girdi’ rok i yan,
nde yib yugu reb e got u reb e nam i ayuweg.
13 “I pagrad ngu’ur gagiyeg niged e yungin th’abi tolang,
mu ur ked e pin’en ni be tugul u daken e pi flang,
ur pir’eged e honey ni bay u thilthilin e war;
ma yu ke olive rorad e i tugul ni bfel’ rogon ko but’ ni pire’ e malang riy.
14 Pi garbaw nge kaming rorad e u ra pi’ed e milik nib yo’or;
tirorad e saf nge kaming nge garbaw e th’abi fel’ ni immoy,
ma ku er i tay e wheat nge wayin rorad.
15 “Girdi’ rok SOMOL e i pire’ ban’en rorad, machane ba gel e togopluw ni ur ted;
ra sugsuggad ya pire’ e ggan ni yad be kay.
Miyad pi’ keru’rad ngak Got ni ir e sunumiyrad,
ma en ni ta’ayuw rorad nib gel gelngin e ra pi’ed keru’rad ngak.
16 Me damumuw SOMOL ngorad ko kireb rorad,
i talyeg nagrad ya ra chealgad ngu’ur tedfan e pi liyos.
17 Ma yad be pi’ e maligach ngak pi got ni go’ bogi ban’en,
bogi got nda i meybil yu Israel ngorad,
ma da i fol piyu Israel rorad. 1 Kor 10:20
18 Ra paged talin e Got rorad, nib gel gelngin ni i ayuwegrad u pa’ e pi to’ogor rorad,
ni en ni pi’ e yafos ngorad.
19 “Fa’ani guy SOMOL ni aram rogon, me damumuw,
me n’ag pifak ni pumo’on nge ppin.
20 Me ga’ar, ‘Ri dab kug ayuwegrad,
nga ayug guy e n’en ni bayi buch rok
e pi girdi’ ney ni gel laniyan’, ma darir yul’yul’gad.
21 Tayfan ni yad be tay ko pi liyos rorad e ke karing e puwan’ ngog,
gu damumuw ni bochan e yad be meybil ngak yug boch e got ni gathi yad e got.
Ere bay gu gagiyegnag ba nam nib balyang girdi’en ngar k’aringed e puwan’ ngorad,
ba nam ndariy rogon e girdi’ riy e bay gu maruwel ngorad ngar damumuwgad ni bochrad.
22 Damumuw rog e bayi daramram ngalang ni bod e nifiy
nge urfiy urngin ban’en u fayleng.
Ra yan i taw ko bin nu ar e fayleng
me ful’ enggin e pi burey.
23 “ ‘Bay gu yumeynag e riya’ ngorad
mu gu pag gubin e gan e gat’ing rog ngorad.
24 Bay ram’ad ko bilig nge m’ar ni gawel u dakeney;
nge pi liliy ni ubchiya’.
Bay gu l’oeg e gamanman ni malboch ngi i cham ngorad,
nge porchoyog nib yub nge k’adrad.
25 Mael e bayi li’ e girdi’ ngarm’ad u lan e yupa’ i kanawo’;
marus ni tinowey e bayi aw ngalan e pi tabnaw.
Pagel nge rugod e bay ram’ad;
mus ko bitir ni kabran nge pilibthir ni dariy bagyad nra magach.
26 Susun e ngar gu thang owcherad
nge dabki leam nagrad be’,
27 machane dabiyag ni gu pag e pi to’ogor rorad ngar ufgad
ni bochan e kar gelgad ngak e girdi’ rog ko mael,
ni fa’an gowa gathi gag e kug pag e gafgow ngorad.’
28 “Israel e ba nam ni dariy e leam rorad;
ni dariy e gonop rorad.
29 De pat ngan’rad ko mang ni kar waergad,
der nanged fan ko mangfan nike yodorom.
30 Mangfan nra ta’reb e biyu’ me gel ta’abe’ ngorad,
ma ri l’agruw e girdi’ me gel ngak ragag i biyu’?
I SOMOL ni Got rorad e ke pagrad;
Got rorad ni ba’ gelngin nib gel e ke n’agrad.
31 Pi to’ogor rorad e manang ni tirorad e got e ba waer,
dar gelgad ni bod rogon e Got rok yu Israel.
32 Pi to’ogor rorad e yad bod feni kireb yu Sodom nge yu Gomorrah,
yad bod e woldug ni grapes nma yib wom’ngin nib mo’oy ma ba yub,
33 ma yad bod e wayin nni ngongliy ko yub ni yima fek u l’ugun e porchoyog.
34 “I SOMOL e manang e n’en ni rin’ e pi to’ogor rorad;
be son ni nge taw ko ngiyal’ ni nge gechig nagrad.
35 I SOMOL e bayi fulweg taban ngorad nge gechig nagrad;
bayi taw ko ngiyal’ ni ngar mulgad,
rofen ni ngan thirifrad u but’ e be chugur. Rom 12:19
36 I SOMOL e bayi ayuweg e tirok e girdi’ u pa’ e to’ogor rorad
ko ngiyal’ nra guy ni kem’ay gelngirad.
Bayi runguy e pi’in yad be pigpig ngak
ko ngiyal’ nra guy ni’in i yad e ke magey.
37 Ma aram e bayi fith SOMOL ngak e tirok e girdi’ ni nge ga’ar,
‘Bu uw fapi got ni i pagan’med ngorad?
38 Um duruw’iyed yad ko mam ko maligach romed,
ma um pi’ed e wayin ni ngar unumed.
Ere ngarbad ngar ayuweged gimed e chiney
ngar milgad i yib ngar chuweged gimed u pa’ e to’ogor romed.
39 “ ‘I Gag, ma kemus ni go’ Gag e Got;
dakuriy yugu reb e got ngabang.
Gu ma thang e pogofan ma gu ma pi’ e pogofan, gu ma maad’ad nigey ma gu ma faseg e maad’ad,
ma dariy be’ nrayag ni nge togopluw ko tin gu ma rin’.
40 Feni riyul’ ni gu be par ni Gag e Got ni gub fos,
e aram rogon ni gu pug pa’ag ngalang mu gu micheg
41 ni bay gu uthum e saydon rog nib galgal ram’en,
mu gu pi’ e gechig nrogon.
Bay gu fulweg taban e kireb ngak e pi to’ogor rog,
ngug gechignag e pi’in ur fanenikayed gag.
42 Pi gan e gat’ing rog e bay i lul’ racha’rad riy,
ma saydon e bayi thang e pogofan rok urngin e pi’in ur togopluwgad ngog.
Dariy ta’abe’ ni i cham ngog ni gu ra pag,
mus ko pi’in kar maad’adgad nge pi’in kan kolrad ko mael ni yad ra yim’.’
43 “Gimed e pi nam, thingar mpininged e sorok ngak e tirok SOMOL e girdi’,
ya SOMOL e ma gechignag urngin e pi’in ra thang e pogofan rorad;
me fulweg ngak e pi to’ogor rok taban e kireb rorad,
me chuweg e kireb ko nam ko girdi’ rok me machalbog nagrad.” Rom 15:10; Rev 19:2
44 Moses nge Joshua ni fak be’ nib mo’on ni Nun fithingan e ra weliyew e thin ko re tang ney, ni nge rung’ag e girdi’ nu Israel.
Tin tomur e fonow ni pi’ Moses
45 Fa’ani mu’ Moses i pi’ e thin rok Got ngak e girdi’, 46 me ga’ar, “Thingar mu folgad u urngin e pi thin ney ni kug pi’ ngomed e daba’. Mu weliyed ngak pifakmed, ya ngar folgad u urngin e machib rok Got u fithik’ e yul’yul’. 47 Pi machib rok Got ney e gathi thin ndariy fan; ya ir e pogofan romed. Um folgad riy mu um pired nib n’uw nap’med u lan e re nam ni bay nga ba’nem e lul’ ni Jordan ni aram e ngam marod mpired ngay.”
48 Rofen nem e ga’ar SOMOL ngak Moses, 49 “Mman ko fare thal i burey ni Abarim ni bay u lan e nam nu Moab, ni ba’y u puluwon e binaw nu Jeriko; ma ga yan nga daken e burey ni Nebo ngam yaliy e nam nu Kanaan, ni aram e nggu pi’ ngak e girdi’ nu Israel. 50 Bay mum’ u daken e re burey nem ni bod rogon walagem i Aron ni yim’ u daken e burey ni Hor, 51 ni bochan e gimew l’agruw ndakum yul’yul’gow ngog u p’eowchen e girdi’ nu Israel ko fa ngiyal’nem ni um med ko fapi alublub nu Meribah nib chugur ko binaw nu Kadesh ni bay u daken fagi desert nu Zin nder tugul ban’en riy; ya dakum tiyew fag u p’eowchen e girdi’ nu Israel. 52 Re nam nem ni bay gu pi’ ngak yu Israel e bay mu yaliy u orel, machane dab mu’un ngay.”
DRAFT VERSION — Proofreading in progress