55
Runguy rok Got
1 Be ga’ar SOMOL,
“Mired, ni gimed gubin e pi’in ke yib e belel ngomed,
ba’aray e ran!
Mired e pi’in ndariy e salpiy romed,
mu chuw’iyed e grain ngam koyed!
Mired, mu chuw’iyed e wayin nge milik,
dariy puluwon ni ngam pi’ed! Rev 21:6; 22:17
2 Mang ni kam n’iged e salpiy ko n’en ni dab mu fosgad ngay?
Mang ni ka mu wereged puluwmed kem’ay ma dawor mu fosgad?
Mu telmed ngog mi gimed rin’ e tin nggog,
me yag ngomed e tin th’abi fel’ e ggan.
3 “Gimed e girdi’ rog, mu telmed, mi gimed yib ngog;
mired ngog, me yag e yafos ngomed!
Bay gu ngongliy ba m’ag u thildad ni bay i par ni dariy n’umngin nap’an,
mu gu pi’ ngomed e pi tow’ath ni gu micheg ngak David.
4 Gu gagiyegnag nge yog e thin me tay murung’agen e pi nam,
mu daken e gu dag ngorad riy gelngig.
5 Bay mu pininged yugu boch e nam ni ngarbad;
bay ba ngiyal’ ni ur pired ndar nanged gimed,
machane chiney e bay ra milgad i yib ni ngar cheaggad ngomed!
I Gag SOMOL ni Got romed, ni fare Got nib thothup nu Israel
e bay gu gagiyegnag urngin e pin’ey nge yodoroy;
bay gu gagiyeg nagmed ngu’un tay famed me gilbuguwmed.”
6 Mu sulod ngak SOMOL ngu’um meybilgad ngak
e chiney ni kab chugur ngomed.
7 Pi’in kireb e ngongol rorad e ngar paged,
miyad thiliyeg rogon e leam ni yad be tay.
Miyad sul ngak SOMOL, ni Got rodad;
ya ri ma runguy e girdi’, ma ba gur ni ma n’ag fan ban’en u wan’.
8 Be ga’ar SOMOL, “Leam rog e de bod e leam romed,
ma tirog e kanawo’ e ba thil ko tiromed.
9 Rogon feni tolang lanelang u puluwon e fayleng ngalang,
e aram feni thil e tirog e kanawo’ nge leam rog ko tiromed.
10 “Thin rog e bod e ayis nge n’uw
nma aw u lang nga but’ ya nge tarannag e but’.
Nge ayuweg e woldug nge ga’;
me yib awochngin ni ngan yung nge ggan ni ngan kay.
11 Ku aram rogon e thin nma yib u l’ugunag,
ndabiyag ni nge dabi rin’ e tin nike m’ay i leamnag rog;
ya ra rin’ urngin ban’en ni kug l’oeg ni nge rin’.
12 “Bay mu chuwgad u Babylon u fithik’ e felfelan’;
bay ni pow’iymed nga wuru’, e re binaw nem u fithik’ e gapas.
Pi burey nge yochi burey e bay ra tanggad,
ma pi gek’iy e bay ra tolul niged e felfelan’!
13 Yungi n’en ni go’ pan ni bay rachangalen e bayi tugul e gek’iy ni cypress riy;
gek’iy ni myrtle e bayi tugul ko yungi n’en ni immoy e pan riy ni bay rachangalen.
Ren’ey e ba pow ni bay i par ndariy n’umngin nap’an,
ni ban’en ni ngi i puguran e pin’en ni Gag SOMOL e kug rin’.”
DRAFT VERSION — Proofreading in progress