4
Te Israel bage augwali Genuai Bidi pageba ma geasa asao po
1 Genuai Bidigo te tama po wai,
“Dage Israel, te dage ma begasa asabo homu ebaso da,
teda dage enaba naga asiąo.
Dagego te dwai kugumini yai tibo god
eno gedude mubo te sela sąyao.
Tama dagego ena sesemane sogo wali asiąo,” wai dao.
2 “Te dagego wabo po dąų waliyu, te tama po obao,
‘Te sesemane sogo bidada pabo Genuai Bidigo nogide
mu da,’ po wainogo eyu da,
teda dagego mu po tama naga weyu,
te wiegi yai doloba pai kolesaga wali peyu,
te po wao.
Te dagego tama tibaso da,
teda gasa hani dabego enaba hanalu,
te eno augwaliba wiegi yai sę ebaso,
te augwaligo enaba genuai nogi mawaibao,”
te po wai.
3-4 Genuai Bidigo te Juda me Jerusalem augwaliba te tiwai po wai,
“Dagego te dwai kolesaga tagalama, te enaba ma aselama,
te gesi homu kolesaga sagasiyu,
te bidigo gesi noma gi tǫ elama,
te nai bulubo tiwai yaibao.
Tama dagego te nai te sesane bono
elalubo digi tomode me bulugio.
Dage Juda me Jerusalem,
te duga poloba badia pai dwai homu kolesaga sela
sąnama,
te eno we bidi dabe dolo pedelao.
Te dage tama me tisąbaso da, teda ena te dagego dwai
homu kolesagade haliga sębę eyu,
te dageba dwai dene mawaibao.
Eno haliga sębę te genuai sia dabo tiwai eyu,
tama te bidi mego sula sąwainu ebaso, usu me
egobeo,” wali. [Hos 10:12]
Te boi bidi dabego Juda dabe dali hwįainu yali
5 Genuai Bidigo enabolo te po weyu, te Juda dabeba
me, Jerusalemba me, te po pusao wali. Agai po e tiwai,
“Dage pelama, te tigidali tǫ habu kantri pedaiba
te biugel bu ola biligi pao,” wali.
“Te we bidi dabeba te tiwai i omainu yao,
‘Dage sisinagaselama,
te dage bomai obo elalubo taunba
geme duala sigi piąo,’ wai dao.
6 ‘Te we bidi dabe te Saionba pomainu po walobo
plak ugwa ugwaba sao,’ wali.
‘Dage me bidigio. Dage wi pelama, duala sigi pao.
Magi baso meni, eno digi te tǫ boi bidi dabe not badu
bidali tagalama,
te dage mu dolagasomainu ebao,’ wali.
7 Te boi bidi dabe augwa bulu tagalama asali,
te laiongo aga geme dualaluali pesage taga soabo
tiwai yali.
Augwali te tǫ kantri hauwa dolobo bidi dabe da,
te augwali asiyu, dagego tǫ kantri dolagasaibao.
Te dagego taun dabe mu dolaibao,
tama te taun dabede te bidi me bidigobeo.
Ena Genuai Bidigo eno te po wai dao.”
8 Tama tialima, dage te homu dene ebo sogo gudubo
ugwa dabe munama,
te gela weyu, hobede ebo tęąbi po waiyąo.
Magi baso meni, Genuai Bidigo dade haliga sębę umabo
eyu,
tama agai te haliga sębę ebo me tagalobeo.
9 Genuai Bidigo e tiwai po wali,
“Te sogo, te king dali aga ofisa dabe
te wi umabo mu eyu,
tama te pris dabe dali, te profet dabe me,
dwai noma mu saibao.”
10 Tialima, eno te po obao, “God, Genuai Bidi, nago te Juda me Jerusalem we bidi nago te augwali bugagia bidaibao po wali sogo, te nago augwaliba tibo po wabo tiwai yai dao,” te po wai. “Tiali goli, megi da, te boi bidi aselama, te da ela muainu ebao,” te po wali.
Boi bidi dabe te posolai wali tiwai asaibao
11 Te boi bidi dabe asobo sogo, Genuai Bidigo te Juda me Jerusalem we bidi dabeba te tiwai po mawaibao wali, “Te posolai wali dabe te tǫ wa pai bulu du dabede hogodaibao, tama wali te eno we bidi dabeba asaibao. Tialima, te wali asobo te dwai kolesaga sela sąwainogo naga me asobeo, te waligo te wit pobele bage hogomu sela sąbo tiwai me egobeo. Menio. 12 Te wali te bomai wali, tama te waligo augwali mu dolaibao. Ena digi eno po obaso, te wali asaibao, magi baso meni, eno te we bidi dabe po tų ilama, te megi da eno augwaliba dwai dene mawaibao,” wali.
13 Tialima, ena Jeremaia, eno te we bidi dabeba te po wali,
“Suao. Te boi bidi dabe te pǫ husugu yai tiwai mu yaibao.
Te ami bidi dabego karis udada pabo te pobege ebo wali
asobo tiwai yaibao,
te augwaligo hos dabe te ba kemodage bola asobo
tiwai asesa asaibao.
Hobede mu dao. Megi da mu tama dolainu ebao waibao.
14 Dage Jerusalem bage,
mena sogo dagego te tobage dobo homu kolesaga
tagalaibawe?
Te dagego duga dwai kolesaga tigidali tagalama,
te dage wiegi yai pedalubaso,
teda Genuai Bidigo dage ma saibao.
15 Te taun Dan me te Efraimgo bulu du elaluali te taga
soali bidi dabego te genuai sęgę pedelalio wabo po
sela soalio.
16 Genuai Bidigo te bidi dabeba te tiwai po wali,
‘Dagego te gasa tǫ kantri bulu bidi dabeba wayąo,
te boi bidi dabe te tǫ kantri Judaba pedelali,’ po
wao.
Te Jerusalemba tama tiwai po me walao,
‘Te boi bidi dabego bulu digibulu taga solama,
te Juda dabego taunba hwįagasainu asali,’ wao.
‘Augwaligo te taun bagua sagaselama,
te i hai bomonama weyu,
te we bidi dabeba po dągą genuagia mu waibao,’
wali.
17 Dage Jerusalem dabego ena Genuai Bidide hagoma
yali.
Tama tibaso, boi bidi dabego te Jerusalem bagua
sagaselama,
te tonalubo bidi dabego te gi bagua sabo tiwai
yagasaibao, te po wali.
18 Dagego te dwai kolesaga eyu,
dage te dwai sunumidu bilibaso,
tama dageba te pedalubo sęgęgo page dabe te dao.
Te duga dwai sęgęgo digi duga te dene tolobao,
tama te duga homu enelawe togwalubo dao,” wali
Jeremaia aga hani dabede hobede mu yali
19 Eno haliga dwai mu ebao.
Eno te genuai dene tologobeo.
Agai ena aiyaba mu elalubao,
te eno homu kolesaga tigidali me dologobeo.
Eno pedauwali me pania sogobeo, magi baso meni,
eno odali, te ami bidi dabego te bu wabo
biugel bu weyu,
te i bomonama wabo odobao.
20 Augwaligo te tigidali tǫ kantri badu te we bidi dabe
mu dolama,
te tǫ kantri dwai mu pedelali.
Polo mu tama, augwaligo te dago ugwa be dabe dolai
dao.
21 Nisu sogo te boi bidi dabego da tagalama,
te augwa buluba ma begasa peyu,
tama dago te niba walobo ugwa plak ugwaba sabo
kolesaga me, te biugel bu wabo me tagalaibawe? * Te boi asobo subaso, augwa te plak ugwa ugwaba selama, te biugel bu weyu, te we bidi dabeba po waliyu, te wi pelama, te bomai obo elalubo taunba geme duala sigi pao wali. Te e wali dąį tigidalide te lain 5 me 6, tede te po elalubo suao.
22 Genuai Bidigo tama po wali,
“Eno we bidigo homu kolesaga wiegi yai me elalubeo.
Augwaligo ena me konebeo.
Augwali te homu kolesaga konesiąwai wai puluba tiwai
elalubao, te augwali umuna pai elalubao.
Augwaligo te dwai sę ebo mu konea pai elaluali,
tialima augwaligo te wiegi yai kolesaga
ebo me konebeo,” wali.
Jeremaiago te nade subo nai tiwai suali
23 Ena Jeremaia, eno te tǫ dolai olo mu tama elalubo
suali.
Te eno dagaluba tonono ebadi, te magi me deli ula me
ebo subeo.
24 Te eno suali, te bulu du dabe gęǫ page mu elama,
te augwa tobolu ugwa peyu, eda asu yalio.
25 Te eno tonono bilibadi,
te bidi me deli bidibo me subeo.
Te ba dabe tigidali mu pela silai yalio.
26 Eno suai, te tigidali tǫ pedai te tǫ ili elaluali,
tiali goli megi da, te olo masigi kemi tǫ naga elaluali.
Te tǫde tigidali elaluali taun, augwali te dolai yalio.
Genuai Bidigo haliga sębę umabo mu eyu,
te sę dabe pedalumainogo ilali.
27 Genuai Bidigo te tama po wai,
“Te tǫ tigidali te olo nai tama pedelaibao,” wali,
“tiali goli, te eno aga tigidali mu me dologobeo.
28 Te pagede naga tama, te tǫgo hobede ebo tęąbi
weyu,
te dagalu husuga sai pedelaibao.
Eno homu kone palama, te sę emainu yali,
te eno homu me hasegelabo homu me egobeo.
Mu menio,” wali.
29 Ena Jeremaia dao, eno suali,
te ami bidi dabe te hosde
ene sesemoni tolalu dulalubo suali,
te tigidaligo Judaba hwįagasali.
Te we bidigo augwali asobo odolama,
te augwa taun tagalama, te wi paibao.
Me badu te bulu buside duala siyu,
me badu te masigi ola bede duala sali.
Te taun tigidali olo elalueibao, tama te taun dabede
te bidi menia sai mu elalueibao.
30 Jerusalem, nage dolobo sogo da,
te nago magi yaibawe?
Te wiegi yai mama ugwa muani tagalao,
te nagade digi te golgo nigai beli au yali.
Te naga gedu au ilibo tagalao.
Te tobage au ebogo nage tau me sogobeo.
Magi baso meni, te naga abagi dabego
nage godolo homu munu ma isiąma,
te nage ela muabo homu naga yaibao,
te po wai dao.
31 Eno odali, te wego wai ame nainogo
te gela wabo tiwai odali.
Te wego hasia wai ame nabo sogo,
te aga genuai dene yaibao.
Te taun Saiongo gela obao.
Aga homu hę mu weyu, te aga nogo bomo sainu debalu
te tiwai po waibao,
“Hobede mu dao, ena mu dolobao.
Te boi bidi dabego ena elama,
ena isainu ebao,” wai dao.
*4:21: Te boi asobo subaso, augwa te plak ugwa ugwaba selama, te biugel bu weyu, te we bidi dabeba po waliyu, te wi pelama, te bomai obo elalubo taunba geme duala sigi pao wali. Te e wali dąį tigidalide te lain 5 me 6, tede te po elalubo suao.