19
Te Devitgo asęani balia po me deli dao.
Godigo nigali tigidali naigo aga genuai nogi dabolo ola mabo dao
1 Dagalugo dabolo ola mabo dao,
God agai bomo dali,
genuai nogi dali si mu elalubao.
Awe, tigidali nai dagalu ugwadu
elalubo naigo dabolo te Godigo digi augwali nigai,
te hania ola mabo dao.
2 Tigidali bidibo sogo te nai dabego po
naga hanilama, po wabo dao.
Tama tigidali be hulibo sogo,
augwaligo dabolo te po ma wabo dao.
3 Ulade me, be hulide dali,
te dagalude elalubo nai dabego
pedauwali meni yai dao,
tama tiyu, po me wagobeo.
Dago te ulade me hulide dali
te nai dabego dogonide
po me wabo dago odobo menio.
4 Tiali goli, ulade me, hulide me,
te nai dabego da tigidali tǫde we bidi
te Godigo bomo dali,
genuai nogi dali si ola mabo dao.
Tama augwaligo po tigidali
buluba pelama, usu mu ebo dao.
Tama dagalude Godigo giligago
ugwa be me deli sę yai tiwai elalubao. [Ro 10:18]
5 Siago buluba teda soai, te bidi we siyu,
dwagi yai ebo gilama,
tama aga bidibo be tagalama, buluba teda soai.
Giligago aga dwagi yai homu eyu,
aga pabo tų wali pabo dao,
te bidi udawainogo sisi elama,
dolalubo tiwai ebo dao.
6 Sia ge pedalobo te dagalu sesege badu pedalobo dao,
tama gasa badu pabo dao,
tama magi nai me agai posolo ebo
digi me duala sogobeo.
7 Genuai Bidi Godigo bomo yai po
te tigidali dolo mu naga ebo dao,
tama dabolo bidibo bomo yai ula mabo dao.
Genuai Bidi God agai pode dago bomo yai
homu agabolo dąų olama, muyu da,
te usu mu yaibao.
Te pogo dwagi yai homu kolesaga
agai po kuna konesiąwani bidi polo agai mabo dao.
8 Genuai Bidigo dabolo dwagi yai po mu ola mabo dao.
Te pogo dago homu kolesaga
dwagi yai pemene mu ebo dao.
Genuai Bidigo tama tiao wabo po te dwagi yai mu dao,
tama dabolo dwagi yai koneabo homu kolesaga
mabo dao.
9 Bidigo Genuai Bidide wi eyu,
aga dologode bidibo bidi,
agai dwagi yai meda isiąwai kolesaga mu ebo dao.
Tama te kolesaga sesemane sogo
elalua peyu, mu elalua paibao.
Genuai Bidi Godigo dago yabo
kolesaga po tigidali wabo dao,
tama te mu po tigidali dolo mu ebo dao.
10 Te tobage pogo te wiegi yai nai go te aiyaba elaluai,
awe, te meda isiąwai te gol,
te me te pogo aiyaba mu elaluai,
tama dago agai te po mu godolo yao.
Genuai Bidi God agai bomo yai po te pusu mu yai,
tama te megego pusu ebo aiyaba elaluai.
Agai te dwagi yai pusu mu ebo mege
ąį tubo te aiyaba mu elaluai dao.
11 Nago bomo yai pogo naga sę bidi
eno koneabo homu kolesaga mabo dao.
Eno nago bomai po wali pobaso,
tama nago ena dulalubo digi dwagi yai ilibo da.
12 Tialima, niwai bidigo aga yali dwai sę koneaibawe?
Eno dwai sę meba yali te eno kuna konebeo,
tama nago eno te dualai dwai sę yali
pęą sąlama, ma sela sąyao.
13 Ena nago sę bidi dao,
nago ena bugagia tonaluao,
tama eno hagoma homu eyu, nago po sela sąyu,
dwai sę ma idali weyu yao.
Nago eno dwai kolesaga ebo nago sulama tonalugio.
Tama tiyu, ena dolo bugagia bidiyu,
eno dwai sę genuai me egobeo.
14 Genuai Bidi, eno homugo eno po dali,
eno homu kolesaga dali,
te nago gedude usu emainogo te homu yai.
Genuai Bidi, nage bidibo digi ena duala selama,
tama nago ena tau siyu, ma dobola sabo bidi dao.