126
Wèè kɔ̃ti kɛ kɔnti diwɛ̀ì ɔ̃ nhò bomɛ̀ dididɛ̀ì mɔ̀nnì
1 Bɛ̀ ɔ̃ ndentì fɛ̀ɛ̀ yɛ̀nfɛ̀ kɛ kɔri Kuyie ncĩ́ɛ̃̀tɛ̀.
Ti Yiɛ̀ nKuyie nwɛ̃̀tɛ kɛ tɛ̃̀ńnɛ́ní dìì mɔ̀nnì Siyɔ̃ɔ̃
bɛ̀ do pĩ̀ḿmú bɛ̀,
dɛ̀ do ti dò ntidɔùntì nti.
2 Kɛ̀ mudɑɑ́ nti kuɔ kɛ̀ ti nyíútí,
kɛ̀ ibotí tɛì nɑ̀ɑ́ nkɛ tú:
Bɛ Yiɛ̀ nKuyie nkuù pĩ mmutɔ̃ndiɛmù bɛ kpɛ́í.
3 Ti Yiɛ̀ nKuyie nkuù pĩ mmutɔ̃ndiɛmù ti kpɛ́í,
kɛ̀ ti bo diwɛ̀ì miɛkɛ.
4 Ti Yiɛ̀ nKuyie nhɑ́ wɛ̃tɛ kɛ́tɛ̃́nnɛ́ní bɛ̀ do pĩmmú bɛ̀,
mɛniɛ nhɔ̃ɔ̃ tɑ mɛ̀ɛ̀ botí kukó nkùù do kũ̀ṹ.
5 Wèè buɔtì nɛ̀ tinɔnniɛti,
ò ɔ̃ ntì dɛ̀ì kɛ dièmmu nɛ̀ diwɛ̀ì.
6 Wèè kɔ̃ti kɛ bo buɔtí tidibotì kɛ kɔnti,
ò ɔ̃ɔ̃ nti dɛ̀ì kɛ́ntɔ kɛ̀ diwɛ̀ì diì ò bo
kòò ìútí kɛ kũnti.