A BUK TADAV RA TARAI EBRAIO
1
A tinata kai God tai Natuna
1 God i ga tata amana ma ra ngie i ra umana propet ta diat ra umana patuana mangoro na pakana ma ta ra do na mangamangana, 2 ma ta go ra e, i mur kakit, i tar tata ta dat tai Natuna, nina i ga kure ba na kale pa ra lavur magit par, ma ure nina bula i ga vaki ra lavur tataun par; 3 nina ba ra talapar i kana minamar, ma ra malalar i ra maukuana tuna, ma i tukal ra lavur magit parika ma ra tinata i ra dekdekina, ma ba i tar pait ot pa ra varvagomgom ure ra varpiam, i ga ki ta ra lime tuna ra King arama liu kakit.
Natuna i lia ta ra umana angelo
4 Ma i ga lia muka ta diat ra umana angelo, tago i ga tar kale vake ra iang i manga boina vurakit ta go diat. 5 Tago i ga biti ta nuve ta diat ra lavur angelo ta tika na bung dari:
“U natugu,
Iau tar vangala pa u gori”? ba dari:
“Iau Tamana ma ia natugu”?
6 Ma ba i tar kap vaarike mule ra luaina natuna uti ta ra rakarakan a gunagunan i biti dari: Boina ba ra lavur angelo kai God diat a lotu tadav ia. 7 Ma i biti ure diat ra lavur angelo dari:
“Nina i ga vaki kana umana angelo upi diat a da ra vuvu,
Ma kana lavur tultul upi diat a da ra biro na iap.” 8 Ma i biti ure Natuna dari:
“Kaum kiki na king, God, i tur vatikai ma pa na mutu;
Ma kaum buka na king i takodo, ma ia ra buka ure kaum varkurai.
9 U ga mari ra mangamangana takodo, ma u ga milikuane ra varpiam;
Ma kari go God, kaum God, i tar tap u
Ma ra dangi na gugu, upi una lia ta diat ra umana talaim tana.” 10 Ma dari:
“U Luluai, ta ra turpaina u ga vungvung ra vunapai ra rakarakan a gunagunan,
Ma ra bala na bakut ia ra kau na limam:
11 Diat a tareng boko; ma u tur vavatikai;
Ma diat a maulana boko da ra mal;
12 Ma una pipin diat da ra mal na tubatuba,
Ma da pait vaenana diat.mulai da ra mal;
Ma u, pa u enana ta tika na bung, ma kaum kilala pa na mutu.”
13 Ma vingaia i ga biti ure nuve ta diat ra lavur angelo dari:
“Una ki ta ra limagu tuna, tuk ta nam ra bung ba ina vadiop kaum lavur ebar upi ra ruarua na kakim”?
14 Vakir vang diat par a umana tulungen na maramaravut uka, di ga tulue diat, upi diat a papalum maravut ure diat dia kale boko ra nilaun tukum?