1 Avat a pite pa ra Luluai.

Ina pite pa ra Luluai ma ra balagu par,

Ta ra kivung kadiat dia dovot ma pire ra kor na tarai.

2 A umana papalum kai ra Luluai dia ngala,

Ma diat dia gugu ta diat dia vartovo tana.

3 Kana papalum a kaliana tuna, ma i mamar na kaia;

Ma kana mangamangana takodo i tur padikat pa na mutu.

4 I vanuk tar kana lavur enana papalum;

Ra Luluai a tena varmari, ma i buka ma ra varmari tuna.

5 I tar tul tar ra magit na nian ta diat dia ru ia;

Na nuk vatikene pa kana kunubu.

6 I tar vaarike ra dekdek i kana lavur papalum pire kana tarai,

Ba i ga tul tar ra gunan kai ra umana Tematana ta diat.

7 A lavur papalum na limana dia dovot ma dia takodo,

Ma kana lavur togotogo dia dovot.

8 Dia tur padikat pa na mutu,

Di tul tar diat ma ra dovotina ma ra mangamangana takodo.

9 I ga tulue ra valavalaun tadav kana tarai;

I ga kure tar kana kunubu pi na tur vatikai.

A iangina i lia, ma i topa ia ba da ru ia.

10 A variru tadav ra Luluai ia ra vunapai ra kabinana;

Ma diat dia mur ia diat a matoto bulu.

A pite varpa pirana na tur tukum.