9
Maino Lohiana
1 A hisihisi ese e gugubaiava hahinena na vabura ai basinela. Nega gunana ai ia ese Sebulun bona Napatali tanodia na hedadarai gabudia ai e halaodia; a nega gabena ai ia ese davara dalana, loridane sinavaina unukahana tanona, bese idau-idau edia Galilea, baine hahairaia.
2 Dibura ai e rakava taudia ese
diari badana vada e itaia;
dibura masemase tanona ai e nohova taudia latadiai
diari vada e tata dae roha.
3 Bese vada o hahutumaia,
bona ena moale vada o habadaia;
idia na oi vairamu ai e moalemu,
taboro imoalelaina na heto,
eiava vada e dadi kohudia e harimu taudia edia moale na heto.
4 Badina be ena maduna metauna,
bona ia paḡana auna,
bona ia ihahisina tauna ena ikwadi auna,
oi ese vada o hakwaidu Midian ena dina ai na heto.
5 Badina be tuari herou-herouna ai e rakamu taudia edia tamaka iboudiai,
bona rara ai vada e hekuikuilai dabuadia iboudiai,
bae gabudia, lahi audia na heheto.
6 Badina be meromero ta vada e vara, ita eda;
mero ta vada e henida.
Taunimanima ireḡudia na ia paḡana ai baine heato,
bona ladana bae hatoa:
Hahealo Tauna Herea-daena, Siahu-bada Diravana,
Tamada hanaihanai, Maino Lohiana.
7 Ena heregu ihabadana bona maino daladia
na basie doko,
David ena terono bona ena basileia latadiai,
baine haginia bona baine ha-aukaia totona,
mai hahemaoro ḡoevaḡoeva bona mai kara maoromaoro ida,
hari ina nega ela hanaihanai.
Ina na Iehova Sabaota ena ura-kwalimu ese baine karaia.
Iehova ena badu Israel latanai
8 Ḡaubada ese hereva ta vada e siaia, Iakob ihadikana;
ia na Israel latanai baine kau.
9 Bena taunimanima iboudiai bae diba,
Efraim bona Samaria inoholaina taudia na
edia heaḡi ai bona edia hekokoroku ai e herevamu,
e tomu:
10 E tunu nadidia vada e heḡiḡi dobi,
a e utu nadidia amo ruma baia haginia;
suke audia na vada e hagaridia,
a sida audia baia hadodia idia gabudia ai.
11 Taunabunai, Iehova ese idia ihadikadia taudia e hatoredia isimu,
bona inaidia na e hagaradiamu.
12 Suria taudia laurabada kahana ai bona Filistia taudia lahara kahana ai ese
ududia e hagadiamu, Israel e hadonoamu.
Ina idoinai vada e vara, to ena badu do se keru;
ia imana na doini e hetoi roromu.
13 E rahudia mase tauna na taunimanima ese asie haḡerea,
Iehova Sabaota asie tahua.
14 Taunabunai, Iehova ese Israel kwarana bona iuna e utu oho,
reta bona geda, dina tamona lalonai.
15 Tau badana, e matauraiamu tauna, na kwara,
bona koikoi herevadia e hahedibalaimu perovetana na iu;
16 badina be ina bese taudia e hakaudia taudia ese e hakaudia kereremu,
idia ese e hakaudiamu taudia na e hadonodiamu.
17 Taunabunai Ḡaubada ese edia eregabe taudia se moalelaidiamu,
bona edia ihareha bona edia vabu se bogadia hisimu;
badina be iboudiai na Dirava asie matauraiamu,
iboudiai na kara dika taudia,
bona udu iboudiai na e hereva kava hereva kavamu.
Ina idoinai vada e vara, to ena badu do se keru;
ia imana na doini e hetoi roromu.
18 Badina be kara dika na e aramu, lahi na heto;
ava ḡiniḡini bona au ginigini e aradia oremu.
Uda audia hedoma-hedomadia e aramu,
kwalahudia na e daemu.
19 Iehova Sabaota ena badu ḡaraḡara dainai
tano na e aramu;
taunimanima na au rakuraku na heto,
asi tauna ta ese tadikakana e bogaia hisimu.
20 Idiba kahana ai e dadidadimu, a doini e hitolodiamu;
lauri kahana ai e anianimu, a bogadia asie kunumu;
ta ta ese dekena tauna dekena tauna hidiodia e animu.
21 Manase ese Efraim e aniamu, bona Efraim ese Manase e aniamu,
bona raruosi ese Iuda e hadikaiamu.
Ina idoinai vada e vara, to ena badu do se keru,
ia imana na doini e hetoi roromu.