74
E-isdarmaladgi-bendaklegega Bab-Dummadse gornaid
Asaf, we-namaked-Masquilʼye-nugad narmaksad.
1 Bab-Dummad, ¿ibiga be degisadegu anmar-obacha?
¿Ibiga be anmarse nue-urwe?
Ar be-sibad-wawaadyob-danar-bukwadse, ¿ibiga be nue-urwe?
2 Be-dulamar negasailaun be susadi, mer be iego.
Be-dulamar begadga-guega be bendaksagusadi, mer be iego.
We-Sión-yar-siid be-negga be imaksadi, mer be iebalo.
3 We-neg bela-bibichis-bukwadse be dage,
ar dule-be-isdarmalad, bese-goled-neg bela-bibichismalad.
4 Bab-Dummad, be-isdarmalad be-onmakedneggi oimakbukwad,
nakwis-itomaladba e-bandermar digsamalad.
5 Dule sapurba-sapi-sikmaladyob, ibmar-olananai gusmalad.
6 Bela ibmar-urgogi-sobarmalad, e-akangi bibichismalad.
Mardomargi bela bibichismarbalid.
7 Be-neg-siid soogi ogumaksamalad,
bela swiri imaksamalad.
8 Dule-isdarmalad na e-gwagegi sogsamalad:
“¡Bela anmar we-dulemar-obelogo!”
¡Geb we-yargi bese-goled-negmar-bukwad bela ogumaksamalad!
9 Anmar, anmar-bander gwen memermaknai bar-daksulid,
dule-Bab-Dummad-e-gayaburba-barsogedbela bergusbalid.
Anmar we-ibmargunaid-e-ibagan-bergudapoed gwen wissurbalid.
10 Bab-Dummad, ¿sanadse dule-isdarmalad begi dododii guoe?
¿Sanadse dule-isdarmalad be-nug oichodii guoe?
11 ¿Ibiga be sabsur-odurdaksuli?
¿Ibiga be bai-gwen-daksuli?
12 Bab-Dummad, bedina bato-sailanagi an-reyga be maid.
We-napneggi bendakleged-igar be oyomaid.
13 Be-garganguedgi be demar egasbalid,
be ibdulamar-dummagan-diakinmalad-e-nono marisad.
14 Be ibdula-dummad-diakined Leviatánʼye-nugad-e-nono ubigwar be imaksad.
Ibdurgan-negsulidganba-gudimalad Leviatán-e-san-gunmalaga be imaksad.
15 Dii-sailagan-ariogega be imaksad,
dianmar-megega be imaksad,
diwar-dummagan-mamaid-dinguega be imaksabalid.
16 Be neg-meegwad nasiksad, mutikid be nasiksabalid.
Be nii nasiksad, dad-ibeler be nasiksabalid.
17 Napneg-naid-e-abingunanaid be mesisad,
Be dii-wied-iba nasiksad,
yolagued-iba be nasiksad.
18 Bab-Jehová, nue be ebinsao: Be-isdarad begi ulusad.
Dule-galagwensurdamalad be-nug isdar-daksamalad.
19 Be-dula-belagwa-gudimalad mer be ibdurganga urmake.
¡Be-dula-wiledimalad mer be iego!
20 Bab-Dummad, be-dulaga-be-igar-mesisad be ebinsao, mer be iego.
Ar we-napneggi bela neg isgusnaid, bela neg-urwed naid.
21 Dule-boniganba-galitodiid, melle be obingegsao.
Dule-boniganba-galitodiid,
dule-ibmar-abediid, be-nug-odummogega be imake.
22 ¡Bab-Dummad, be-gargangued be oyoge!
Be, dule-binsaedsuligudimalad bane-bane begi-urwedimalad, mer be baisurdake.
23 Be-isdarmalad-begi-oimaknanaid, mer be baisurdake.
Ar begi-yoledimalad nue-mergumamaid.