61
Wara Miisena moyamoyakidi kiiravidiye
God yana wiivinevinegha tamariyina iwona bo,
1 “Yawe God Maragata Kirakiina kanumina iveregu,
touna ivineyigu da wara miisena anadimeni
wawaya moyamoyakidi biiyadi.
Bi idarugu da wawaya iiyawogha wiiwiinuwaberodi aniyawiidi.
Wawaya iiyawogha siburavidi bi sikou patupatumidi
na anakaradeba da toudi sirupamatavedi siyawa,
bi wawaya biwa gawarina kamone na anawonedi
da gawara wiididibarina sinakanibutaveni.
2 Bi idarugu da wawaya anawonedi da raghanina ipiika
da Yawe God miisena inabera toudi biiyadi.
Gabudarina mmakatanina da kana aviya biiyadi kana biwa inasarobi,
bi idarugu da wawaya iiyawogha saduudu na aniyororoyidi.
3 Bi wawaya tupadi Jerusalem kamone
iiyawogha sinuwabero kirakii na aniwiitedi,
bi yapukare gayamidiye wasadi na
tagu kepamara pinavina anaveredi.
Toudi oilma gayamidi sinighoudi da yadi nuwamiise kana matakira
bi gemuriye sinadou maghana.
Bi nuwavisi wasadi, na kabepepa ayidi ware kadi gara naboni.
Yadi bera na parapa rotomanidi,
toudi ware kii miisedi bi maragasidi;
Yawe God touna wosina kiidi iwawa da wawaya iyiyevevedi
da yana miisena iwaratete awaki patana.
6 Wawaya sinakwatuvemi da, ‘Yawe God yana prist’
bi ‘yama God yana bagibagi tomotomoyidi.’
Tami mmko kuburina debane dam tupadi
yadi gararabama sawara miimiisedi kunayouna
bi yadi mourae na kuna kabigeegeeyem da tam kumoura.”
Yawe God iwona bo,
8 “Tagu bera rotomanidi iinuwayuyunedi
bi kabiyouna da bera riwariwadi iisinighiighiiyana.
Basuna tagu wiinuwayuyunigu na yagu wawaya yadi miisana anaveredi
bi yagu wiiwaghasina maragasina makewaghawaghasina toudi biiyadi anabera.
9 Dam tupadi mma kubura debane na yagu wawaya nosinosidi sinakovidi
bi sinakabikarawayedi.
Wawaya tupadi sinakitadi na sinawona bo,
‘Yawe God vikodi dam parapa ivimiiseyedi!’ ”
Isrel iwona bo,
10 “Tagu parapa nuwasisira ikabigu
basuna Yawe, yagu God yabera da iinuwamiise kirakii.
Na iviyawiigu, bi iberagu da rotomana berabera wawayina touna naboni,
bi noko wiiyawiina da bera rotomanidi na ware kagu gara naboni!
Na tagu ware tomogha raghanina yanayi na naboni
gayama kounagha waratetena yakotenina naboni.
Bi ware wasike raghanina yanayi na
posaru da kakatema yakounagha na naboni.
11 Wasina ware tanawa yabera da kii matagha sagogo sageena,
bo ware kwabu yabera da pei sagogo sageena naboni,
na noko naboni Yawe God, inabera da bera rotomanidi da kabepepa
sinatubugha dam tupadi biiyadi kubura debane
bi yana berabera rotomanidi nokodi gawaridiye sinarumaghatara.”