7
इस्राएली आन थर ङा ठेयब मुर
1 मोसामी ग्रुम्तीक ताम्बु सेल्ने थुम्शा, मेको नु आ मारेइ मारेइ आन कली तेल ब्रुइक्ताक्मी। मिनु परमप्रभु यावे आ गेय पचा कली वोइक्तु। मिनु मेकोमी चढ़ेतीक नु आ मारेइ मारेइ तेल ब्रुइश्शा परमप्रभु यावे आ गेय पचा कली वोइक्तीमी। प्रस्थान ४०:९,१०,१७ 2 मिनु इस्राएल ङा थर थर नु खिं खिं ङा खुप्शा हिक्शो मुर आन ठेयब मुरपुकीमी चढ़ेम्तेक्म। 3 मेकोपुकीमी आन चढ़ेतीके परमप्रभु यावे आ ङोंइती चाक्तेक्म। मार चाक्तेक्म देंशा हना, ६ ओटा बग्गी, १२ ओटा ब्यफ, निक्शी थर ङा मुर आन ठेयब मुर आस कली बग्गी का बाक्त। मिनु ठेयब मुर का का पा ब्यफ का का चढ़ेचा कली चाक्तेक्म। मिनु मेकोपुकीमी ग्रुम्तीक ताम्बु आ ङोंइती वोइक्तेक्म।
4 मिनु नोले परमप्रभु यावेमी मोसा कली 5 “मेको आन चाक्शो ताक्को। मिनु मेकोमी ग्रुम्तीक ताम्बु ङा गेय पने चाप्नीम। लेवी आन कली आन आन गेय गारचा ङा पा गेमी” देंत।
6 मिनु मोसामी मेको बग्गी नु ब्यफपुकी ताक्शा, लेवी आन कली गेम्तीमी। 7 मिनु मेकोमी बग्गी निक्शी नु ४ ओटा ब्यफ गेरशोन आ तौ आन गेय कोव़शा, मेको आन कली गेम्तीमी। 8 मिनु ४ ओटा बग्गी नु ८ ओटा ब्यफ मेरारी आ मुर आन गेय कोव़शा, मेको आन कली गेम्तीमी। चढ़ेब हारून आ तौ इथामार मेको आन कली अरेब बाक्त। गन्ती ४:२८,३३ 9 तन्न मेकोमी कोहाथी आन कली मारेइ मगेमी। मारदे हना मेकोपुकीमी परमप्रभु यावे आ मार मार थोव़क कोव़चा नु आन बलाम कुरचा माल्बाक्तेक्म। गन्ती ४:१५
10 मिनु चढ़ेतीक कली तेल ब्रुइक्तीक नु परमप्रभु यावे आ गेय पचा कली वोइक्तीक नाक्त मेको इस्राएल आ थर ङा मुर आन ठेयब मुरुमी यो चढ़ेचा कली मार मार चाक्शा, चढ़ेतीक आ ङोंइती वोइक्तेक्म। 11 मिनु परमप्रभु यावेमी मोसा कली “मेकोपुकीमी चढ़ेचा कली मार मार चाक्चा माल्नीम। मेको चढ़ेतीके आं गेय पचा कली वोइक्तीक नाक्ती इस्राएल आ थर ङा मुर आन ठेयब मुर का कामी नाक्त का कली चढ़ेतीक चाक्चा माल्नीम” देंत। गन्ती १:४-१६; गन्ती २:३-२९
12 मिनु ङोंइती ङा नाक्ती यहूदा आ थर ङा मुर आन ठेयब मुर अम्मीनादाब आ तौ नहशोनमी आ चढ़ेतीक चाक्तु। 13 मिनु मार चाक्तु देंशा हना, सहे का ३० शेकेल ङा चांदी के थाल का ७० शेकेल ङा चांदी के बोस का चाक्तु। मेको शेकेल ग्रुम्तीक ताम्बु ङा शेकेल खोदेंशो बाक्तेक्म। मेको थाल नु बोस निम्फामी तेलम निशो रिम्शो फसीम प्रिंशो बाक्ताक्स। मेको अन्न चढ़ेतीके बाक्त। ताम्बु ङा शेकेल का १२ ग्राम ङा क्येट बाक्ब। बजार ङा शेकेल चहिं ११.५ ग्राम बाक्ब। 14 मिनु १० शेकेल ङा धूपम ब्रीशो सुन के आइक्च बोस का, 15 चोशा चढ़ेचा कली ब्यफ का, सांड का नु बर्स का गाप्शो पाठा का चाक्तु। 16 पाप आ पर्बम चढ़ेचा कली बोका का, 17 दुशा बाक्चा आ पर्बम चढ़ेचा कली ब्यफ निक्शी, ५ ओटा सांड, ५ ओटा बोका नु ५ ओटा बर्स का गाप्शो पाठा चाक्तु। मेको अम्मीनादाब आ तौ नहशोन आ चढ़ेतीक बाक्त।
18 मिनु आ दीसा इस्साकार आ थर ङा मुर आन ठेयब मुर सुआर आ तौ नेथनेलम आ चढ़ेतीक चाक्तु। 19 मिनु मार चाक्तु देंशा हना, सहे का ३० शेकेल ङा चांदी के थाल का नु ७० शेकेल ङा चांदी के बोस का चाक्तु। मेको शेकेल ग्रुम्तीक ताम्बु ङा शेकेल खोदेंशो बाक्तेक्म। मेको थाल नु बोस निम्फामी तेलम निशो रिम्शो फसीम प्रिंशो बाक्ताक्स। मेको अन्न चढ़ेतीके बाक्त। 20 मिनु १० शेकेल ङा धूपम ब्रीशो सुन के आइक्च बोस का, 21 चोशा चढ़ेचा कली ब्यफ का, सांड का नु बर्स का गाप्शो पाठा का चाक्तु। 22 पाप आ पर्बम चढ़ेचा कली बोका का, 23 दुशा बाक्चा आ पर्बम चढ़ेचा कली ब्यफ निक्शी, ५ ओटा सांड, ५ ओटा बोका नु ५ ओटा बर्स का गाप्शो पाठा चाक्तु। मेको सुआर आ तौ नेथनेल आ चढ़ेतीक बाक्त।
24 मिनु मेको आ नित्थ नाक्ती जबूलून आ थर ङा मुर आन ठेयब मुर हेलोन आ तौ एलीआबमी आ चढ़ेतीक चाक्तु। 25 मिनु मार चाक्तु देंशा हना, सहे का ३० शेकेल ङा चांदी के थाल का नु ७० शेकेल ङा चांदी के बोस का चाक्तु। मेको शेकेल ग्रुम्तीक ताम्बु ङा शेकेल खोदेंशो बाक्तेक्म। मेको थाल नु बोस निम्फामी तेलम निशो रिम्शो फसम प्रिंशो बाक्ताक्स। मेको अन्न चढ़ेतीके बाक्त। 26 मिनु १० शेकेल ङा धूपम ब्रीशो सुन के आइक्च बोस का, 27 चोशा चढ़ेचा कली ब्यफ का, सांड का नु बर्स का गाप्शो पाठा का चाक्तु। 28 पाप आ पर्बम चढ़ेचा कली बोका का, 29 दुशा बाक्चा आ पर्बम चढ़ेचा कली ब्यफ निक्शी, ५ ओटा सांड, ५ ओटा बोका नु ५ ओटा बर्स का गाप्शो पाठा चाक्तु। मेको हेलोन आ तौ एलीआब आ चढ़ेतीक बाक्त।
30 मिनु मेको आ सांबु नाक्ती रूबेन आ थर ङा मुर आन ठेयब मुर शेदेउर आ तौ एली-सुरमी आ चढ़ेतीक चाक्तु। 31 मिनु मार चाक्तु देंशा हना, सहे का ३० शेकेल ङा चांदी के थाल का नु ७० शेकेल ङा चांदी के बोस का चाक्तु। मेको शेकेल ग्रुम्तीक ताम्बु ङा शेकेल खोदेंशो बाक्तेक्म। मेको थाल नु बोस निम्फामी तेलम निशो रिम्शो फसीम प्रिंशो बाक्ताक्स। मेको अन्न चढ़ेतीके बाक्त। ताम्बु ङा शेकेल का १२ ग्राम चांदी बाक्ब। 32 मिनु १० शेकेल ङा धूपम ब्रीशो सुन के आइक्च बोस का, 33 चोशा चढ़ेचा कली ब्यफ का, सांड का नु बर्स का गाप्शो पाठा का चाक्तु। 34 पाप आ पर्बम चढ़ेचा कली बोका का, 35 दुशा बाक्चा आ पर्बम चढ़ेचा कली ब्यफ निक्शी, ५ ओटा सांड, ५ ओटा बोका नु ५ ओटा बर्स का गाप्शो पाठा चाक्तु। मेको शेदेउर आ तौ एली-सुर आ चढ़ेतीक बाक्त।
36 मिनु मेको आ नोले ङा नाक्ती सिमियोन आ थर ङा मुर आन ठेयब मुर सुरी-शदै आ तौ शेलुमीएलमी आ चढ़ेतीक चाक्तु। 37 मिनु मार चाक्तु देंशा हना, सहे का ३० शेकेल ङा चांदी के थाल का नु ७० शेकेल ङा चांदी के बोस का चाक्तु। मेको शेकेल ग्रुम्तीक ताम्बु ङा शेकेल खोदेंशो बाक्तेक्म। मेको थाल नु बोस निम्फामी तेलम निशो रिम्शो फसीम प्रिंशो बाक्ताक्स। मेको अन्न चढ़ेतीके बाक्त। 38 मिनु १० शेकेल ङा धूपम ब्रीशो सुन के आइक्च बोस का, 39 चोशा चढ़ेचा कली ब्यफ का, सांड का नु बर्स का गाप्शो पाठा का चाक्तु। 40 पाप आ पर्बम चढ़ेचा कली बोका का, 41 दुशा बाक्चा आ पर्बम चढ़ेचा कली ब्यफ निक्शी, ५ ओटा सांड, ५ ओटा बोका नु ५ ओटा बर्स का गाप्शो पाठा चाक्तु। मेको सुरी-शदै आ तौ शेलुमीएल आ चढ़ेतीक बाक्त।
42 मिनु मेको आ नोले ङा नाक्ती गाद आ थर ङा मुर आन ठेयब मुर दूएल आ तौ एली-आसाफमी आ चढ़ेतीक चाक्तु। 43 मिनु मार चाक्तु देंशा हना, सहे का ३० शेकेल ङा चांदी के थाल का नु ७० शेकेल ङा चांदी के बोस का चाक्तु। मेको शेकेल ग्रुम्तीक ताम्बु ङा शेकेल खोदेंशो बाक्तेक्म। मेको थाल नु बोस निम्फामी तेलम निशो रिम्शो फसीम प्रिंशो बाक्ताक्स। मेको अन्न चढ़ेतीके बाक्त। 44 मिनु १० शेकेल ङा धूपम ब्रीशो सुन के आइक्च बोस का, 45 चोशा चढ़ेचा कली ब्यफ का, सांड का नु बर्स का गाप्शो पाठा का चाक्तु। 46 पाप आ पर्बम चढ़ेचा कली बोका का, 47 दुशा बाक्चा आ पर्बम चढ़ेचा कली ब्यफ निक्शी, ५ ओटा सांड, ५ ओटा बोका नु ५ ओटा बर्स का गाप्शो पाठा चाक्तु। मेको दूएल आ तौ एली-आसाफ आ चढ़ेतीक बाक्त।
48 मिनु मेको आ नोले ङा नाक्ती एफ्राइम आ थर ङा मुर आन ठेयब मुर अम्मीहुद आ तौ एली-शामामी आ चढ़ेतीक चाक्तु। 49 मिनु मार चाक्तु देंशा हना, सहे का ३० शेकेल ङा चांदी के थाल का नु ७० शेकेल ङा चांदी के बोस का चाक्तु। मेको शेकेल ग्रुम्तीक ताम्बु ङा शेकेल खोदेंशो बाक्तेक्म। मेको थाल नु बोस निम्फामी तेलम निशो रिम्शो फसीम प्रिंशो बाक्ताक्स। मेको अन्न चढ़ेतीके बाक्त। 50 मिनु १० शेकेल ङा धूपम ब्रीशो सुन के आइक्च बोस का, 51 चोशा चढ़ेचा कली ब्यफ का, सांड का नु बर्स का गाप्शो पाठा का चाक्तु। 52 पाप आ पर्बम चढ़ेचा कली बोका का, 53 दुशा बाक्चा आ पर्बम चढ़ेचा कली ब्यफ निक्शी, ५ ओटा सांड, ५ ओटा बोका नु ५ ओटा बर्स का गाप्शो पाठा चाक्तु। मेको अम्मीहुद आ तौ एली-शामा आ चढ़ेतीक बाक्त।
54 मिनु मेको आ नोले ङा नाक्ती मनस्से आ थर ङा मुर आन ठेयब मुर पेदा-सुर आ तौ गमालीएलमी आ चढ़ेतीक चाक्तु। 55 मिनु मार चाक्तु देंशा हना, सहे का ३० शेकेल ङा चांदी के थाल का नु ७० शेकेल ङा चांदी के बोस का चाक्तु। मेको शेकेल ग्रुम्तीक ताम्बु ङा शेकेल खोदेंशो बाक्तेक्म। मेको थाल नु बोस निम्फामी तेलम निशो रिम्शो फसम प्रिंशो बाक्ताक्स। मेको अन्न चढ़ेतीके बाक्त। 56 मिनु १० शेकेल ङा धूपम ब्रीशो सुन के आइक्च बोस का, 57 चोशा चढ़ेचा कली ब्यफ का, सांड का नु बर्स का गाप्शो पाठा का चाक्तु। 58 पाप आ पर्बम चढ़ेचा कली बोका का, 59 दुशा बाक्चा आ पर्बम चढ़ेचा कली ब्यफ निक्शी, ५ ओटा सांड, ५ ओटा बोका नु ५ ओटा बर्स का गाप्शो पाठा चाक्तु। मेको पेदा-सुर आ तौ गमालीएल आ चढ़ेतीक बाक्त।
60 मिनु मेको आ नोले ङा नाक्ती बेन्यामीन आ थर ङा मुर आन ठेयब मुर गिदेओनी आ तौ आबी-दानमी आ चढ़ेतीक चाक्तु। 61 मिनु मार चाक्तु देंशा हना, सहे का ३० शेकेल ङा चांदी के थाल का नु ७० शेकेल ङा चांदी के बोस का चाक्तु। मेको शेकेल ग्रुम्तीक ताम्बु ङा शेकेल खोदेंशो बाक्तेक्म। मेको थाल नु बोस निम्फामी तेलम निशो रिम्शो फसम प्रिंशो बाक्ताक्स। मेको अन्न चढ़ेतीके बाक्त। 62 मिनु १० शेकेल ङा धूपम ब्रीशो सुन के आइक्च बोस का, 63 चोशा चढ़ेचा कली ब्यफ का, सांड का नु बर्स का गाप्शो पाठा का चाक्तु। 64 पाप आ पर्बम चढ़ेचा कली बोका का, 65 दुशा बाक्चा आ पर्बम चढ़ेचा कली ब्यफ निक्शी, ५ ओटा सांड, ५ ओटा बोका नु ५ ओटा बर्स का गाप्शो पाठा चाक्तु। मेको गिदेओनी आ तौ आबी-दान आ चढ़ेतीक बाक्त।
66 मिनु मेको आ नोले ङा नाक्ती दान आ थर ङा मुर आन ठेयब मुर अम्मी-शदै आ तौ अही-एजेरमी आ चढ़ेतीक चाक्तु। 67 मिनु मार चाक्तु देंशा हना, सहे का ३० शेकेल ङा चांदी के थाल का नु ७० शेकेल ङा चांदी के बोस का चाक्तु। मेको शेकेल ग्रुम्तीक ताम्बु ङा शेकेल खोदेंशो बाक्तेक्म। मेको थाल नु बोस निम्फामी तेलम निशो रिम्शो फसम प्रिंशो बाक्ताक्स। मेको अन्न चढ़ेतीके बाक्त। 68 मिनु १० शेकेल ङा धूपम ब्रीशो सुन के आइक्च बोस का, 69 चोशा चढ़ेचा कली ब्यफ का, सांड का नु बर्स का गाप्शो पाठा का चाक्तु। 70 पाप आ पर्बम चढ़ेचा कली बोका का, 71 दुशा बाक्चा आ पर्बम चढ़ेचा कली ब्यफ निक्शी, ५ ओटा सांड, ५ ओटा बोका नु ५ ओटा बर्स का गाप्शो पाठा चाक्तु। मेको अम्मी-शदै आ तौ अही-एजेर आ चढ़ेतीक बाक्त।
72 मिनु मेको आ नोले ङा नाक्ती आशेर आ थर ङा मुर आन ठेयब मुर ओक्रान आ तौ पगीएलमी आ चढ़ेतीक चाक्तु। 73 मिनु मार चाक्तु देंशा हना, सहे का ३० शेकेल ङा चांदी के थाल का नु ७० शेकेल ङा चांदी के बोस का चाक्तु। मेको शेकेल ग्रुम्तीक ताम्बु ङा शेकेल खोदेंशो बाक्तेक्म। मेको थाल नु बोस निम्फामी तेलम निशो रिम्शो फसम प्रिंशो बाक्ताक्स। मेको अन्न चढ़ेतीके बाक्त। 74 मिनु १० शेकेल ङा धूपम ब्रीशो सुन के आइक्च बोस का, 75 चोशा चढ़ेचा कली ब्यफ का, सांड का नु बर्स का गाप्शो पाठा का चाक्तु। 76 पाप आ पर्बम चढ़ेचा कली बोका का, 77 दुशा बाक्चा आ पर्बम चढ़ेचा कली ब्यफ निक्शी, ५ ओटा सांड, ५ ओटा बोका नु ५ ओटा बर्स का गाप्शो पाठा चाक्तु। मेको ओक्रान आ तौ पगीएल आ चढ़ेतीक बाक्त।
78 मिनु मेको आ नेल्ल क्येङा नोले ङा नाक्ती नाप्ताली आ थर ङा मुर आन ठेयब मुर एनान आ तौ अहीरामी आ चढ़ेतीक चाक्तु। 79 मिनु मार चाक्तु देंशा हना, सहे का ३० शेकेल ङा चांदी के थाल का नु ७० शेकेल ङा चांदी के बोस का चाक्तु। मेको शेकेल ग्रुम्तीक ताम्बु ङा शेकेल खोदेंशो बाक्तेक्म। मेको थाल नु बोस निम्फामी तेलम निशो रिम्शो फसम प्रिंशो बाक्ताक्स। मेको अन्न चढ़ेतीके बाक्त। 80 मिनु १० शेकेल ङा धूपम ब्रीशो सुन के आइक्च बोस का, 81 चोशा चढ़ेचा कली ब्यफ का, सांड का नु बर्स का गाप्शो पाठा का चाक्तु। 82 पाप आ पर्बम चढ़ेचा कली बोका का, 83 दुशा बाक्चा आ पर्बम चढ़ेचा कली ब्यफ निक्शी, ५ ओटा सांड, ५ ओटा बोका नु ५ ओटा बर्स का गाप्शो पाठा चाक्तु। मेको एनान आ तौ अहीरा आ चढ़ेतीक बाक्त।
84 मिनु परमप्रभु यावे आ गेय पचा कली वोइश्शो चढ़ेतीक कली तेल ब्रुइक्तीक नाक्ती इस्राएल आ थर थर ङा मुर आन ठेयब मुर आन चढ़ेशो मार बाक्तेक्म देंशा हना, १२ ओटा चांदी के थाल, १२ ओटा चांदी के बोस नु १२ ओटा सुन के आइक्च बोस बाक्तेक्म। 85 मेको चांदी के थाल का का पा सहे का ३० शेकेल हेल्शो बाक्तेक्म। मेको चांदी के बोस का का पा ७० शेकेल हेल्शो बाक्तेक्म। मेको चांदी के ग्योंब नेल्ल नाक्शोनु, ग्रुम्तीक ताम्बु ङा शेकेल खोदेंशो पा हजार निक्शी ४ सहे शेकेल हेल्शो बाक्त। 86 मिनु मेको १२ ओटा धूपमी ब्रीशो सुन के आइक्च बोस का का पा ग्रुम्तीक ताम्बु ङा शेकेल खोदेंशो पा १०, १० शेकेल हेल्शो बाक्तेक्म। मेको सुन नेल्ल नाक्शोनु, सहे का २० शेकेल हेल्शो बाक्त। 87 मिनु बी ब्यफ, क्यारश भेडा रे चोशा चढ़ेचा कली १२ ओटा ब्यफ, १२ ओटा सांड, १२ ओटा बर्स का गाप्शो पाठा नु मेकोपुकी नु गारचा ङा पा अन्न चढ़ेतीके बाक्तेक्म। मिनु पाप आ पर्बम चढ़ेचा कली १२ ओटा बोका बाक्तेक्म। 88 मिनु बी ब्यफ, क्यारश भेडा रे दुशा बाक्चा आ पर्बम चढ़ेचा कली २४ ओटा ब्यफ, ६० ओटा सांड, ६० ओटा बोका नु ६० ओटा बर्स का गाप्शो पाठा बाक्तेक्म। मेको परमप्रभु यावे आ गेय पचा कली ला मेको चढ़ेतीक कली तेल ब्रुइक्तीक नाक्ती आ नोले चढ़ेशो बाक्तेक्म।
89 मिनु मोसा परमप्रभु यावे नु लोव़ पचा कली ग्रुम्तीक ताम्बुम ओव़मेनु, मेकोमी कबल पशो सन्दोस सुम्शो शिशी बाक्तीके, करूब निक्शी आस दाते इर रे लोव़ पशो नेंतु। मोपा मेकोमी मोसा नु लोव़ पाप्तु। प्रस्थान २५:१७-२२; प्रस्थान २९:४२; प्रस्थान ३३:७; १सामुएल ३:३-१४