No Libro A Mikyas
No Pakatonngan so Paytābwan no Nya Libro
Si propīta Mikyas, ki nakayapo do asa idi a masngen do Jerosalem do tana a Joda a akin abagātan a pagāryan no Israel. Iyaw nya Mikyas, ki rārayay ni propīta Isayas do dāwri a chimpo. Inpakatoneng ni Āpo di Mikyas a masngen dana magtōok tawotawo do Joda do ītwaw a didigra a akmas inpadto ni propīta Amos a pasaren dan tawotawo do akin ammyānan a pagāryan no Israel. Iyaw paynamotan no kapangdōsa no Dyos dyira, ki machiyengay do dyi daw a kaipatongpal so kosto a kinalinteg. Aran komwan, malawag minsāhi ni Mikyas, kan maboyaw pangilasīnan a arinchiw namnāma do masakbayan (4:1-4).
Myan saw masisīta a birsikolo do dya a libro a machita nyo a chichiban a maganay a akma so kaipaboya no kapya do intīro a lōbong a maynamot do kapagtoray no Dyos (4:1-4); iyaw padto maynamot do mabīleg a āri a yapo do kapoonan ni Dabid kan mangyangay so kapya do nasyon a Israel (5:2-5a). As kan do 6:8, myan paytābwan no kārwan a inbahey da no propīta do Israel a binata da a kon da, “Nyaw akdawen na dyaten: parinen taw malinteg, ipaboya taw no dya mabdibdis a kadaw, kan maybibyay ta a sipapakombaba a machichasa do Dyos ta.”
No Naychakarwan no Nya Libro
No kaokom no Israel kan Joda, kan no kaipapabidi dana no kapya (1:1-2:13)
No gatos kan kasoli no Dyos a maynamot dyirad pangolwen dan taga Israel (3:1-5:15)
No kāso ni ĀPO a maikontra di Israel, as kan iyaw minsāhi a pakaballaāgan kan pangnamnamāan (6:1-7:20)
Mikyas
1
1 Nyaw minsāhi a inpakatoneng ni ĀPO di Mikyas a taga idi a Moreset* 1:1 No idi a Moreset, ki myan do abagātan a laōden no Jerosalem do tana a Joda. a maynamot do kaokom no Samarya kan Jerosalem.† 1:1 Samarya, ki sintro no pagāryan a Israel, as kan Jerosalem, iyaw sintro no pagāryan a Joda. Naboya naw nyaya do chimpwaw a nakapagāri da Jotam, Ahas, kan Hesekyas do Joda.
No Dongdong-aw Para do Samarya kan Jerosalem
2 Mangadngey kamo, inyo a tabo a tawotawo.
Adngeyen nyo nyaya, inyo a tabo a omyan do tanaya!
Si Āpo a DYOS, mangsaksi so maibōsor dyinyo.
Adngeyen nyo, ta maychirin a yapo do masantwan a timplo na.
3 Chiban nyo! Īto dana si ĀPO a yapo do masantwan a yanan na.
Gomchin anchi kan lasagan na sanchiw matotohos saya a tokotokon do tanaya.
4 Siraw katokotokonan saya, ki malonag sa
a akmas nadangdangaw a alid do apoy.
Maloyo sanchi do payahosongan saya‡ 1:4 Mana “Siraw payahosongan saya, ki mayakchid.”
akmay ranom a gomtos do aphas.
5 Tabo nyaya, maparin anchi maynamot ta nagribīldi saw kapotōtan Jakob.
On, maparin nya a maynamot ta naygatos saw kapotōtan Israel.§ 1:5 Jakob kan Israel, ki mayengay sa.
Āngo iyaw gatos dan kapotōtan Jakob?
Iyabawriw karahet dan tawotawo no Samarya?
Dino sintro no pagdaydayāwan so didyosen do Joda?
Do Jerosalem abawri?
6 Bata ni ĀPO a kāna, “Dawa, payparinen konchiw Samarya a bonton
a yanan a paymohan so kaobāsan.
Paychabadebadedehen konchiw bato na saw do payahosonganaw
tan magparang saw pondasyon na.
7 Mapsapsa sanchiw didyosen na.
Tabo mapapateg saw a nakpeh na do timplo, ki masosohan sanchi so apoy.
Rārayawen ko sanchi a tabo bolto na saw.
Maynamot ta nakpeh saw nya a yapo do tangdan daw no maglaklāko saw so asi,* 1:7 Sigon do chapatak da, ki dayāwen daw didyosen da an maychoknod sa do maglaklāko so asi do timplo da.
tangdan dananchi a mirwa no matarek a maglaklāko so asi do matarek a nasyon.”
8 Binata ni Mikyas a kāna,
“Maynamot do dyaya, magāsog kan magdongdong-aw ako.
Mayam ako a abos tokap kan silalābos.
Maydawo ako a akmas bolawaw a chito,
kan maylilyak ako a akmay gokgok.
9 Mapya pabaw bigaraw no Samarya,
kan nayadis dana do Joda.
Nakarapit dana do rowanganaw no syodad dan tawotawo ko
a aran do Jerosalem a mismo.”
No Kasōngad Da no Kabōsor do Jerosalem
10 Ibahey nyo aba do kabōsor ta saya do syodad a Gat† 1:10 Gat, ki asa syodad no Pilisteo a nahay dana kabōsor no Joda. iyaw nakaābak ta.
Maychahoho kamo abas aran asa katedted.
Inyo a tawotawo do idi a Beth-leapra,
maydipodiporis kamo do ahbek do ladingit nyo.
11 Inyo a tawotawo do idi a Sapir, maakaw kamonchi a mabahod,
kan mayam kamonchi a silalābos a masnek so kayayan.
Inyo a tawotawo do Saanan,
makahtot kamo paba do idi nyo.
Anchan madngey nyo kapagdongdong-aw da do idi a Bet-esel,
matonngan nyonchi a abaw kamāngan daw.
12 Siraw tawotawo do idi a Marot,‡ 1:12 Marot, ki kaon-ōni na do Hebreo a chirin iyaw makpad.
manghahaw sa so kapakalong-aw da,
ta iyaw didigraya a yapo di ĀPO,
ki narapit narana a manda do rowangan no Jerosalem.
13 Inyo a tawotawo do idi a Lachis,
isagāna nyo kabalyo nyo do logan nyo a pachigobat.
Inyo nangisongsong so Jerosalem a naygatos,
ta tinahatahan nyo gatos daw no Israel.
14 Dawa, manoroh kamos sagsāgot a pamakāda do idi a Moreset-gat.§ 1:14 Moreset, ki idi ni Mikyas (1:1), kan kaon-ōni na do Hebreo a chirin, ki nobya. No dadakay dan Jodyo, ki torohan no inyapwan saw so sāgot a pamakāda do balāsang daw an mangabahay as komaro dyira. Naipariho saw taga Moreset-gat do nobya a īto a komaro. On, ta īto danaw kawara da no kabōsor da a mangakaw sira.
Iyaw idi a Aksib,* 1:14 No chakey na batahen Aksib, ki “kapangallīlaw”. ki inallīlaw na saw āri saya no Israel.
15 Inyo a tawotawo do idi a Maresah,† 1:15 Maresah, ki kaon-ōni na do Hebreo a chirin iyaw “mangsākop”. Jos. 15:44
manoboy si ĀPO so mangsākop so idi nyo.
Siraw pangpangōlo no Israel,
mangay sanchi a tomayo do aschip no Adollam.
16 Inyo a tawotawo do Joda, chischisan nyo oho nyo do kapagmamayo nyo
maynamot dyirad anak nyo saw a chadaw nyo.
Chischisan nyo oho nyo a akmas oho naw no kangkang
maynamot ta maakaw sanchiw anak nyo a sibabahod.
*1:1 1:1 No idi a Moreset, ki myan do abagātan a laōden no Jerosalem do tana a Joda.
†1:1 1:1 Samarya, ki sintro no pagāryan a Israel, as kan Jerosalem, iyaw sintro no pagāryan a Joda.
‡1:4 1:4 Mana “Siraw payahosongan saya, ki mayakchid.”
§1:5 1:5 Jakob kan Israel, ki mayengay sa.
*1:7 1:7 Sigon do chapatak da, ki dayāwen daw didyosen da an maychoknod sa do maglaklāko so asi do timplo da.
†1:10 1:10 Gat, ki asa syodad no Pilisteo a nahay dana kabōsor no Joda.
‡1:12 1:12 Marot, ki kaon-ōni na do Hebreo a chirin iyaw makpad.
§1:14 1:14 Moreset, ki idi ni Mikyas (1:1), kan kaon-ōni na do Hebreo a chirin, ki nobya. No dadakay dan Jodyo, ki torohan no inyapwan saw so sāgot a pamakāda do balāsang daw an mangabahay as komaro dyira. Naipariho saw taga Moreset-gat do nobya a īto a komaro. On, ta īto danaw kawara da no kabōsor da a mangakaw sira.
*1:14 1:14 No chakey na batahen Aksib, ki “kapangallīlaw”.
†1:15 1:15 Maresah, ki kaon-ōni na do Hebreo a chirin iyaw “mangsākop”. Jos. 15:44