nyʋɣʋ tʋ yontunɑɑ tɑɑ tɔɣɔlɔ.

2 Tɑcɑɑ wulɑʋ lɑŋlɛ hɛɛnɑ nyɑ́ tomɑ sɔsɔɔnɑ kɛ́.

Nɑ ɩ́ ŋmɑɑləɣənɑ nyɑ́ wɑɑsʋɣʋ pə fɛɩnɑ.

3 Mpi ɩ luɣu sɔɔlɑɑ tɔɣɔ n hɑ-ɩ,

n tɑ pɛmɩ-ɩ ɩ kʋsələməm.

4 N koolɑ-ɩ kʋpɑntʋ kɛ tuutuumɑ.

N temɑ-ɩ wʋlɑ ntenuɣu.

5 Ɩ sələmɑ-ŋ weesuɣu nɑ ń hɑ-ɩ,

nɑ kʋ tɑɣɑlɩ teu.

6 N wɑɑsɑ-ɩ nɑ ɩ teeli tɔɔ sɔsɔm.

Nɑ ń suu-ɩ teu nɑ sɔsɔɔntʋ.

7 N kooliɣi-ɩ kʋpɑntʋ kɛ tɑm tɔɔ kɛ́,

nɑ ń wɛ ɩ kiŋ nɑ ɩ lɑŋlɛ hʋləməɣɩ.

8 Wulɑʋ pɛtɑ ɩ təɣɩ Tɑcɑɑ kɛ́.

Nɑ ɩsɔtɑɑ Ɩsɔ Sɔsɔ kʋpɑntʋ tɔɔ,

pə kɑɑ cɛŋlɩ-ɩ.

9 Hɑɩ, wulɑʋ, nyɑ́ niŋ ɩ wɛɛ nyɑ́ kolontunɑɑ

nɑ mpɑ pɑɑ cɑɑ-ŋ tɔ pɑ tɔɔ.

10 Kʋyɑŋku n kɔŋ tɔ,

n kɑ́ tʋ-wɛɣɛ kɔkɔ sɔsɑɣɑ tɑɑ kɛ́.

Tɑcɑɑ n kɑ́ kpiisi-wɛɣɛ nɑ pɑ́ɑ́nɑ́,

nɑ kɔkɔ nyɑɣɑ-wɛ.

11 Nɑ ń kpiisi pɑ lʋləŋ tənɑɣɑ

tɛtʋ tɑɑ yəlɑɑ tɑɑ.

12 Pɑɑ hɔkɔ ɩsɑɣɑtʋ sɩ pɑ lɑkɩ-ŋ,

ɩlɛ pɑ kɑɑ pəsɩ.

13 N kɑ́ tɔ-wɛɣɛ nyɑ́ nyəmɑ́

nɑ ń tɔɣɔnɩ-wɛ nɑ pɑ́ se.

14 Tɑcɑɑ hʋlɩ nyɑ́ toŋ sɔsɔɔŋ.

Ɩlɛnɑ tɑ́ɑ́ yoo-ŋ yontu nɑ tə́ sɑ nyɑ́ toŋ tɔm.