1 Ngictau Sisa Tiberio, ye hifa 15 dameng inguc biyac gawec. Dameng iwa ngic monic, wacine Pontius Pailat, yedi Yudeya himongte gawana gawec. Gaemewa Herode ye Galilile damong, nga gbaine, wacine Filip, yedi Ituraia nga Trakoniti himongte damong, nga Lisania ye Abilenele damong, inguchac gaibong. 2 Inguc gaebongka Annas nga Kaifas yeke depec-baba ngic micne gaiboc. Dameng yogowahac Sekariyale madec Yohane ye himong kisiwa gacgume Wapongte yowadi yela kwesiwec. 3 Kwesime Yohane ye Yodan misa neboc nga neboc himong falegac, iwa lolickelu misa lowaebongka kwelengineng hefaliyeme bikicngineng miyac ainale mime yegengkeyelewec.✡ Sale 13:24 4 Yowa yogo Wapongte sinaic mimi Yesaiyadi miwec, yele hibiwa yanguc kwelengkeicne fagac,

7 Inguc aime ngic-ngigac homacnedi Yohanela hikelu misa lowayelenale edobong, Yohanedi yanguc miwec, “Hemale gbolifocine, ngenge Wapongtacni ameine kwesinale aigac, iwacni nalic hikeningte madi sawang-yowa edocngebawec?✡ Mat 12:34; 23:33 8 Ngenge, kwelengineng hefaliyeme ilec silicina noine bafuwadaingte. Aime ngenge yangucteyac ‘Abraham ye ngambononggeng,’ i mi ngagedabiyeng. Wapong ye hoc yago nalic mime Abraham ngambofocine fikeyackedaingte.* Bocyac yengi yanguc ngagelu gaibong, “Abraham ye ngambononggeng yogolec gaga-sanang badabelengte.” Aime Yesudi edocebawec, ‘Yogo andoine mi aigac.”✡ Yoh 8:33,39 9 Aime naka monic ye biyac yoc fungina fagacte, yoc gocne noine madicne mi aidaingte, yoc yogo sasawa welu dacka wikecebadaingte.”✡ Mat 7:19

10 Inguc mime ngic-ngigac yengi uwacnoibong, “Inguc aime nonge wenuc aidabelengte?”

11 Mibong yowangineng yanguc bafaliyeyelewec, “Monicti ngakpiine yaeckang bagagac, ye monicine hemoctolu monic ye ngakpiine mikac gagac, ye bafickedaic. Nga monic ye noba-nosingkolec gagac, ye aibaba ihac aidaic.”

12 Mime takes-baba gocne yengi inguchac wele misa lowayelenale miibong, “Wewedu, nonge wenuc aidabelengte?”✡ Luk 7:29

13 Mibong yanguc edocebawec, “Ngenge moneng baningte mingeleicne, moneng silicina badaing, moneng ewalilu mi badaing.”

14 Mime hudu-baba ngic gocne yengi inguchac Yohane uwacnoibong, “Aime nonge wenuc aidabelengte?”

Mibong yanguc miwec, “Ngenge losi-aibaba me kwesacka ailu migbedicka monickacni moneng mi badaing. Ngenge bolenginengte fuli bacaigaing, yogo sugu ngagebong andoine aidaic.”

15 Aime ngic-ngigac yenge Mesiale wangec gaibongte ailu “Yohane ye hocne Mesia ngama.” Kwelenginang inguc ngageibong. 16 Inguc ngageibongte Yohanedi yowangineng yanguc bafaliyeyelewec, “Na misa lowangelegabac, ngic lobena weledaicte, yedibac Tili Asu nga dackolec lowangeledaicte. Ailu yeicne kucti nale kuc ewaligac, na ingucnedi yele hige-ebecte witicine lukebe nalic mi madickedaicte.✡ Sale 13:25 17 Ye fokine sugucne molewa bawelelu wit yafoineholec baic-baicte sobengka fame, yogo filalu baucepalu yafoine baickelu noine yogo bakpaduc ailu nosing-macina lolu yafoine pelengkelu dac hoba-hobaine mikac, iwa wikeme feme lobedaicte.” 18 Yohane ye yowa silicine ingucne bocyac milu ngic-ngigac mimiloc aiyelelu siduc madicne edocebalu gawec.

19 Aime ngictau Herodedibac gbainele ngigac, wacine Herodias, hise balu aibaba sowacne gocne bocyac aicnolu gawec, aime Yohanedi aibaba sowacne yogolec sawang-yowa Herode edoyackewec.✡ Mat 14:3-4; Mrk 6:17-18 20 Edome Herodedi aibaba sowacne hatacmac taockelu, Yohane ngaba aicnolu muc-macka lowec.

21 Aime ngic-ngigac sasawadi misa lowaebongka, Yesu ye inguchac misa lowawec. Lowalu Wapong milockelu domaemewa honocmeng angkeme 22 Tili Asudi tudiling nangole silic ingucne ailu Yesula wame, honocmengkacni mic-yowa monic yanguc fikewec, “Ga nale angac-madecne, na ga ngani-angac aigelecaigabac.”✡ Yoh 1:32

23 Yesu ye hifaine 30 aiyemewa boleine fungkewec. Aime ngic-ngigac yenge yanguc ngageibong: Ye Yosefele madec.