Aneꞌ
IIBURU-nupoong
Narung Kara-okovui-nkai Daarievuruꞌnaneꞌ
Dootuuꞌnupoong Juꞌnupoong-kooning
Kara Baavootunanka Aneꞌkooning
1:1 Jiisuuꞌ Tee Koosinunanka-koo Dau Basi
3:1 Jiisuuꞌ Tee Moosesi-koo Dau Basi
4:14 Jiisuuꞌ Tee Piristiꞌ Pankaing Deemparing Nerakung Naroong-anta Tarevui
11:1 Niiꞌke Kumponing Masikaꞌantavampiri Bauring-koo Imaꞌmariai
Jiisuuꞌ Tee Koosinunanka-koo Dau Basi
1
(1:1–2:18)
Kumponinge Bauring-koo kuunge karamuruꞌnaꞌ
1 Tero urikamuꞌ tee Kumponing niumaraang-koo okiꞌnooꞌnaꞌ taung avuntevunge karokoꞌ amutemuꞌke bakaning nakaro-nupoong˜ karantavurima˜. 2 Teka aing-koo asiꞌning doong-koo tee Bauring-koo karoma karamurimatoieeng niiꞌ, tee eeꞌnung ookara kapooꞌnanka nkovuuꞌnung Kumponinge nauvuko, eeꞌnoko tee tee eeꞌnung ookara kapooꞌ barenkunanka okovuuꞌnaang miruꞌuuꞌnung. 3 Bauringe tee Kumponing bakaang meenasi aaꞌnaꞌ arakavari siraꞌpukooꞌ eeꞌnoko tee tee Kumponing siuraampi˜, eeꞌnoko ookara kapooꞌ tee bakaang karai purintoꞌke kompui otong. Tenang teie niikaning orakaꞌ nkonanka-ita kiiroraaꞌanta-koong nko-nko nkovuraiꞌ nange Kumponing-koo Tee Aaꞌnaꞌ Pankaing-koo tampanaang-koo baꞌnamparuꞌ aꞌdeiꞌke ovorimpari otooꞌnaang.
Kumponing Bauring Koosinunanka-koo Tee Dau Basi
4 Tee tee aaꞌnaꞌ pankaing masikung deemparuꞌ koosinunanka-koo dau basie. Eeꞌnoko Bauring deempari otoko teie bakaang miringe pankainge nariꞌ siraꞌpui otong, aaꞌnaꞌ tampara masikung teing koosinunanka biikaang-koo. 5 Aiꞌ urikamuꞌ Kumponinge tee Bauring tampuma aaꞌpuuꞌ Daari Meekung-koo,
“Daꞌ tee nnuring, eꞌmung tee ninge daaꞌdansing.” (2 Samuelaꞌ 7:14)
Niiꞌnang ee Kumponinge koosinunanka-koo narung teeꞌ minkuvuuꞌ? Otoaꞌ. 6 Napoꞌ teeꞌke tenang teie tee Bauring kirokai aꞌ kansiꞌkoo botovuuꞌnang nauvurima aaꞌpuuꞌ,
“Ookarai koosinunankai Kumponing bakaninge tee eeꞌnung dootuuꞌaavaing.” (Boto 32:43)
7 Teka koosinunanka-koo Kumponing bakaang kara eeꞌ daariari otong,
“Teie koosinunanka, bakaning botovotonaaꞌnanka doving eeꞌnoko urung-pinaꞌ aampariꞌantavurimaung.” (Kena 104:4)
8 Teka Bauring-koo napoꞌ eeꞌ daariari otong,
“Dakanooꞌ ovorintari baꞌnaniꞌdoma tee teeꞌ nariꞌ otomatoainooꞌ daꞌ Kumponing, eeꞌnoko dake tee dakanamuuꞌ koontoꞌnaꞌ taaꞌniꞌantarari tanataveri otoainge.
9 Dake tee aarumo koontoꞌ piaavemaung eeꞌnoko aarumo boto-totoꞌ munteꞌekooꞌ, teeꞌkoo daꞌ Kumponing dakaang Kumponinge duunie dotu-anta-koonge sisiꞌduuꞌ pakoꞌpariꞌduma daꞌmaikoriꞌkoo dau basi otooꞌnaang.” (Kena 45:6,7)
10 Eeꞌnoko napoꞌ Bauring-koo eeꞌ daariari otong,
“Daꞌ tee Ovoring aung kansiꞌ ookutunung tutuntoma-ita nkoveuꞌnung, eeꞌnoko paning dakaang birenge nkoveuꞌnunge.
11 Teing teing paaꞌareaining, teka daꞌ teeꞌ nariꞌ otoko.
12 ‘Napoꞌ urikaꞌpareai baarong-pinaꞌ eeꞌnoko tee-pinaꞌ mononopaꞌpinaꞌ kaiꞌaamanaꞌ kaiꞌera paarieai, teka daꞌ teeꞌ nariꞌ otoi otoaing, eeꞌnoko dakaning mareꞌnanka botu basiaravaukaꞌnunge.” (Kena 102:25-27)
13 Eeꞌnoko napoꞌ Bauring-koo miruꞌuma aaꞌpuuꞌ,
“Ning-koo tampavine-koo baꞌnaniai bera dakaning kare-nupoong daꞌkoo kauꞌkoo boonavete-koo siparampainooꞌke basi.” (Kena 110:1)
Teka koosinunanka-koo teeꞌ minkuvuaꞌ. 14 Aiꞌ teing teing koosinunanka tamung pakupaku-nupoong tanuaananka teing barenku okovuri domampariaining paku-koo.