N amatlajkuíloli non omoijkuilo para Hebreos
1
Dios technonotiwits itech Ikone
1 Semi ya wejkawitl Dios okintlapowi totatawah miak welta, kualchiwa ika tlájtoli iwa kualchiwa ika itla tejtemikílistli non okinmitaya n profetajteh. 2 Iwa axa itech ninteh iksemi tonatijmeh yotechtlapowi ika itlajtol Ikone. Akin kiaxkatilijtok nochi tlan onka, iwa por Ye okichijchi nochi tlan onka itech ilwikak iwa ipan tlaltíkpaktli. 3 Ikone Ye itlawiltsotlanilis n Dios, iwa inewia otechnextiliko Akin Dios, iwa ika itlajtol weletini kichikajtok nochi tlan onka. Iwa satepa ijkuak yotechchipa de totlajtlakolwah, omotlali ik iyekma n Totajtsi Dios nepa kan ilwikak.
Ikone Dios okachi weyijkatitok ke n ángelteh
4 Ikone Dios yomochiwako okachi weyi ke nochteh n ángelteh, porke Ye okimakakeh Itoka non okachi weyixtok ke yejwah. 5 Porke Totajtsi Dios ayik okili se ángel:
Te ti Nokone
Ne axa onimitschijchi; Sal. 2:7
nion aka ángel okili:
Ne niyetos ita,
iwa ye yetos Nokone. 2 Sam. 7:14
6 Keman okitítlanki non san Ye se Ikone itech tlaltíkpaktli, okijto:
Nochteh iangelwah Dios makiweyilikah.
7 Iwa ijkuak Dios otlajto de iángelwah, ijkí okijto:
Ye kichiwa mayetokah iangelwah espíritus,
iwa itekitwah kintoktia mayetokah tletl. Sal. 104:4
8 Ijkuak kitenewa Ikone kijtoa:
Motlanawatilis Tejwatsi Dios, nochipa yetos;
Tejwatsi kuali tiyektlanawatia ken moneki.
9 Mitspaktia nochi tlan kuali iwa tikkokolia tlan amokuali.
Yika Dios, Modios omitsmák
okachi miak pakílistli ke n oksikimeh non inwah titekiti. Sal. 45:6-7
10 Noiwa kijtoa:
Tejwatsi Toteko Dios keman ayamitla okatka, Tejwatsi otikchijchi n tlaltíkpaktli,
iwa ika momawah otikchijchi n ilwikak.
11 N tlaltíkpaktli iwa ilwikak pojpoliwiskeh, pero Tejwatsi nochipa tiyetos.
Nochi tlan onka wewejtis kemi wewejti n tlakemitl.
12 Tikinkuekuelpachos kemi se tlakemitl,
tikimpatlas kemi aka kipatla itlake.
Pero Tejwatsi amo kema timopatla,
iwa monemilis amo keman tlamis. Sal. 102:25-27
13 Dios ayik okili se ángel:
Ximotlali ik noyekma, asta manikintlali itlampa mokxiwah akimeh mitskokoliah. Sal. 110:1
14 Porke nochteh n ángelteh yejwah san espíritus non tekititokeh inawak Dios, iwa Dios okwalintítlanki para makimpalewikah akimeh kinmakixtiskeh.