30
Mec daŋgeŋa teŋ
1 O Apômtau, aê gabe aoc êôc aôm gebe gôjam aê kêsi.
Ma kôkêŋ aêŋoc ŋacjo têtu samuc kêtu aê gajaŋaŋa atom.
2 O Apômtau ŋoc Anôtô, aê gamôêc gêdêŋ aôm gebe ônam aê sa.
Ma aôm kômoasiŋ aê, tec aê ŋajam kêsagoc.
3 Apômtau, aôm tec gôwê ŋoc katuc aŋga lamboam kêpi gêmêŋ.
Aôm gômôêc aê tôŋ mêŋkôkêŋ aê matoc jali kêsa kêtiam gebe jaêc su jasêp sêlêlôm jana atom.
4 Amac lau mansaŋwaga, awem êôc Apômtau.
Ma alanem ênê ŋaê dabuŋ.
5 Gebe eŋ têtac ŋandaŋ olaŋ-olaŋ atom.
Ma nê moasiŋ ênêc endeŋ tôŋgeŋ.
Êmbêc tataŋ taŋiboa
ma eleŋ ôliŋ êpi-êpigeŋ.
6 Aê tec taêc gêjam e gwala kêpa su
gebe “Oc jaku atomanô.”
7 O ŋacmoasiŋ Apômtau, aôm kôwaka aê sa gaŋgôŋ ŋoc malac ŋajaŋa.
Ma gôsaŋ laŋômanô auc gêdêŋ aê e katakê.
8 O Apômtau, gêdêŋ tonaŋ aoc gêjac aôm
ma kataŋ gêdêŋ ŋoc Anôtô.
9 “Aê embe jamac êndu ma jasêp sê jana,
oc êmoasiŋ aôm amboac ondoc.
Kekop oc etoc aôm sa
ma êwaka nêm lêŋ to nêm biŋ ŋaŋêŋ sa êtôm me.
10 O Apômtau, ôkêŋ taŋam aê to taêm walô aê.
O Apômtau, ôtu ŋoc ônam-aê-sawaga.”
11 Aôm gôjam ŋoc gêŋwapac ôkwi kêtu wê.
Aôm kôkac ŋoc abec su ma kôkêŋ têtac ŋajam aê kajandiŋ.
12 Amboac tonaŋ aê janam tauc tôŋ atom. Aê jalambiŋ aôm.
O Apômtau, ŋoc Anôtô, aê gabe janam daŋge aôm endeŋ tôŋgeŋ. * Dawidnê pesalem, taŋ gêga gêdêŋ sêjac kawi lôm dabuŋ naŋ.