59
Ba meybil ni fan ko riya’ ni da biyib* TITLE NI HEBREW: Ba thin rok David u tomuren ni pi’ Saul boch e pumo’on ni ngar yaliyed e nu’an rok David ni bochan e ba’adag ni nge thang e fan rok. 1 Sa 19:11
1 Got rog, mu chuwegeg u pa’ e pi to’ogor rog;
mu yororiyeg rok e pi’in yad be cham ngog!
2 Mu chuwegeg u pa’ e pi’in kireb e leam rorad;
ma ga lagneg u pa’ e pi tathang e pogofan nem!
3 Musap! Yad be son nigeg ni ngar li’edgag nggum’;
girdi’ nma’angach ko cham e kar barba’gad ni yad be togopluw ngog.
Ni gathi bochan e denen rog ara kug rin’ ban’en nib kireb,
4 A SOMOL, ma ku gathi bochan e bbuch e rog u ban’en,
ni aram fan ni kar fal’eged rogorad nga tagil’rad.
5 SOMOL, ni Got ni Gubin ma Rayag Rom, mu sak’iy ngamub mu ayuwegneg;
Got rok yu Israel, mu guy nga owchem!
Mu od ngam gechignag urngin e pi nam,
dab mu pag bagayad e pi’in yad be t’ar liyben e kireb!
6 Ra blayal’ miyad sul,
ni yad be tolul ni bod e pilis
ma yad be gurul u lan e binaw.
7 Mu telim ko yaba’ ni yad be tay nge thin ni yargal.
Balowtharad e bod e saydon u lan l’ugunrad,
ma yad be leamnag ni dariy be’ ni be rung’ag lungrad.
8 Machane, gur SOMOL, e ga be minmin ngorad;
ga be moningnag gubin e pi nam.
9 Gelngim e be pagan’ug ngay;
A Got, i gur e manaf rog.
10 Got rog e gub t’uf rok ma bayib ngog;
mra pageg ngguy e pi to’ogor rog ni kar mo’waergad.
11 Got, dab mu li’rad, ya ri pag e girdi’ rog talin.
Mu weregrad u gelngim ma ga waer nagrad,
A Somol, ni tayoror romad.
12 Denen e bay u dap’il’ugunrad, urngin e tin yad ma yog e ba sug ko denen;
mang e yugu ra awgad ko pi tolngan’ rorad!
Ni bochan e yad ma yibil ni nge buch wa’athan be’ ma yad ma ban,
13 mu thang owcharad u fithik’ e damumuw rom;
mu thirifrad u but’.
Ma aram me nang gubin e girdi’ ni Got e be gagiyeg u lan yu Israel,
ma gagiyeg ni be tay e ke garar u ga’ngin e fayleng.
14 Ra blayal’ me sul e pi to’ogor rog,
ni yad be tolul ni bod e pilis ma yad be gurul u lan e binaw,
15 ni bod e pilis ni yad be deraw i yan ni bochan e ggan
ma yad be tolul ni fa’anra de gaman e tin kar pir’eged.
16 Machane, bay gu tangnag murung’agen gelngim;
gubin e kadbul ma bay gu tangnag ngalang fare t’ufeg rom ni dabimus.
Ya gur e kam par ni rungrung rog,
ma manaf rog ko ngiyal’ nike yib e gafgow ngog.
17 Bay gu pining e sorok ngom, ya gur e ga ma n’ufegeg.
Got e yoror rog,
fare Got ni gub t’uf rok.
*^ TITLE NI HEBREW: Ba thin rok David u tomuren ni pi’ Saul boch e pumo’on ni ngar yaliyed e nu’an rok David ni bochan e ba’adag ni nge thang e fan rok.
DRAFT VERSION — Proofreading in progress