1 Sehuu fun níi fun mínlíh rë, fun olute biti yee gén ɗë daa ri biti funi affi fun tas Aten ndín, 2 fun yeñ koy-yaafi fun Timoote ɗon na. Ɗi fi baa funi daa boku fun na légéyú a Koope, waarii Uni NebiKiristaa. Fun húmú yeju ri ɗon na oni ron doole, nda ɗon ɓaatti híinndëh ɗon ham ngémë, 3 ow di ɗon na ɓanti yeɗɗoh ndah mokla na moklu ɗon ɗa. Ɗon yúhrúté affon biti sah ƴaa ɓéeɓ non iña waaƴiɗ yen Koope ra. 4 Nagajek, húmú homuu fun ɗon na ra, fun húmú wonute ɗon biti yen ay moklu, te ɗon yúhúté biti daa ri yee lah woteh bee ra. 5 Yii baa daa tah seha⁠ˈ mi níi mi mínléh rë, mi yeñce Timoote ɗon na kénsëhí tígë teem ngémën ɗë. Mi húmú sídë⁠ˈ biti Seytaane fíir rën, iña légéyú fun ɗon na ra ɓéeɓ sooƴ teem ɗaaha.

6 Kola⁠ˈ Timoote ginon nimilte fun na ra, kompe fun unni neɓpe keloh di yii leŋke ngémën a ɗee fahuu ɗon ow ra. Ɗi wonte fun biti ɓal nuffon húmú homa⁠ˈ fun na faraah níi ɗon ñamaasee, te ɗon húmú sesuute oli fun ti di sesuu fun olaadi ron nen. 7 Ɗon fi koy-yaayyi yi ƴeh, yii baa tahte homuu fun filiɓ súfúñ fí fun a filiɓ coono fi fun ɓéeɓ ɗë, fun ɓaatuutee lah doole ndah ngémën. 8 Fun lëeysírúté keeñ leegi hém daa ron habu híin Yíkëe në. 9 Fun ay símée Koope ɗí níi mit ? Ɗon tahute keeññi fun sosse níi sos fíyí⁠ ⁠! 10 Fun dékúu ɗaŋi na⁠ˈ a elek, nda fun mín ɗon tíkëet íl ngëeƴ níi fun mitsiɗ yee tasa⁠ˈ ngémën ɗë.

11 Ɗémíin Koope, ɗi fi Boffi yen, a Yéesú Yíkíi yen pariɗ fun waala yuliɗ ginon ɗa⁠ ⁠! 12 Yíkëe ona ron, ɗon ɓaatee fahanta⁠ˈ hanndal kon níi tígí teem fahanta⁠ˈ, a hanndal ki ɗoni ɓëewë ɓéeɓ ti di fahuu fun ɗon nen. 13 Hen ɗaaha raa, Yíkëe ay ron on doole níi yiin nay aye Yéesú Yíkíi yen, ñéerë⁠ˈ a ɓëewí ɓéeɓ rë, ɗon lan ces níi ɗon lëhíh yii wonun sun fon, ɗon caga⁠ˈ wun fíi Koope, ɗi fi Boffi yen.