1 Abrahamu'a maka feno ma'ane kumara atreno, Negev kaziga Gerar umani'ne. Ana kumara Kadesine, Surine amunompi me'ne. 2 Abrahamu'a nenaro Seranku amanage huno zamasmi'ne, ama nensaro mani'ne. Abimeleki Gerari kumate kini ne'mo ana naneke nentahino, eri'za vahe'a huzmantege'za Serana ome avre'za Abimeleki eme ami'naze. 3 Hianagi kenage Anumzamo'a ava'nafi Abimeleki amanage huno asmi'ne, Kva huo! Ara vereti a' avre'za eme kami'naze. Hankinka frigahane huno asmi'ne. 4 Abimeleki'a Sera'enema ovase'negu huno amanage hu'ne. Ramoka mago ke'a omne'nesia vahera knare amne kuma'ane naga'anena zamahe fanane hugahano? 5 Abrahamu agra'a nasmi'ne, ama ara nensaro'e nehigeno, Sera'a Abrahamunkura nenfu'e hu'ne, tarega'moke hu'na'e. E'igu Serama avre'za eme nenamige'na nagra nagu'areti ene antahi antahini'areti ene hu'na knare fatgo avu'ava hu'noe hu'na nagra nagesa antahi'noe. 6 Anumzamo ava'nafi amanage huno asmi'ne, tamage, Nagra antahi'noe, kagra fatgo antahintahi antahinenka, anazana hu'nane. E'ina hu'nanke'na Nagra kase hugantogenka Serana avako osu'nane. E'igu kefozana osu'nane. 7 Hianagi ama a'mofo neve'a kasnampa (profet) ne' mani'neanki, huntegeno neve hirega vino. Nevnigeno negeno, kagrama fri'zankura nunamu huno kza hino. Hanki hunte'nankeno ovniana, kagrane maka'a naga kanena frigahaze. 8 Nanterame Abimeleki'a maka'a kva vahera ke hige'za eme atru hzageno, Anumzamo'ma ava'nafi asmi'nea nanekea huama huno zamasmi'ne. Nezmasmige'za nentahi'za, tusi'za hu'za zamagogogu hu'naze. 9 Abimeleki'a Abrahamu ke higeno egeno amanage huno antahige'ne. Kagra naza hurantenane? Nagra kagrira mago'a kumi hugante'nogenka amanahu havizana kumaniane vahe nianena hurantane? Ama zana ra kumi eri fore hane. 10 Abimeleki'a amanage huno Abrahamu asmi'ne. Kagra na agafare amanahu'zana hane? 11 Abrahamu amanage hu'ne, Na'ankure nagra amanage huna nagesa antahi'noe, ama kumapina Anumzamofonku koro nosazankiza, zamagra a'niareku hu'za nahegahaze. 12 Hanki ami ara nensaro mani'ne, nenfa mofa, ana hu'neanagi nenrera mofa omninegu huno a'ni'a mani'ne. 13 Hanki Anumzamo'ma hunatege'na nenfa noma netre'na amanage hu'na Seranku asmi'noe, amai soe kvukva hunantegahane, hakare'a kaziga vanuana, nagriku'ma hanunka nenfu'e hunka huo. 14 Abimeleki'a sipisipine, eri'za eri kaone (oksen), vene a'ene miza e'ori eri'za vahe'ene, avreno Abrahamu nemino, nenaro Sera avreno eme ami'ne. 15 Abimeleki'a amanage hu'ne, ko, ama nagri mopa me'ne, kvesinirera amne umanio. 16 Serana amanage huno agra asmi'ne. Negfuna, Abrahamuna menina wan tauseni'a silva zgoa nemue, kagri kagazema eri kami'nogu ama miza amue. E'ina nehnuge'za mika vahe'mo'za negeza, nagrikura havi zana osu'ne hu'za hugahaze. 17 Anumzamofonte nunmu higeno Anumzamo Abimelekine, nenarone, kazokzo eri'za mofane ane zamazeri soe higeza mofavre ksente'naze. 18 Na'ankure Abrahamu nenaro Seranteku Ra Anumzamo Abimeleki naga'mofo a'ne zamarimpa erigine.