1 Jekopu'a kantega nevigeno, Anumzamofo ankeromo'za fore humi'naze. 2 Nezmageno Jekopu amanage hu'ne, ama Anumzamofo nonkumare. Nehuno anantekura agi'a Mahanaimie huno ante'ne. 3 Jekopu'a ke erino vu vahe huzmantege'za vugote'za nefu Iso mani'nere Idom moparega Seir vu'naze.

4 Mago'ene huzmanteno, Amanage huta ranimofo Isona asmiho, eri'za ne' ka'amo Jekopu anage hie, nagra Labani mopafi mani'noreti menina neoe. 5 Nagra Bulimaka afuki, donkigi, memene, sipisipi kevuzgane, eri'za veanine zamare'na ne-ena negasmue. Negasmi sugenka kasunku'ma hunante sunka, ranimoka kagra antahi nmisanku hunezmantoe. 6 Ke eri'za vu'naza vahe'mo'za ete e'za Jekopuna eme asmi'naze, Negfu Isona ome asamunanagi kantega tutagiha hugantenaku ne-ege'za, 400ti'a vahe'mo'za avega hu'za neaze. 7 Jekopu'na tusi amano vazigeno agu'amo tare hu'ne, miko'a zama'a vahe'ane, Bulimaka kevufi, memene, sipisipi kevufi, kemorifi, tarefi refko huno kevu hu'ne, 8 anahu agesa agra antahi'ne, Iso'ma mago kevu zamahe'naku esnigeno'a, mago kevu'amo fresnaze, huno tare kevu ante'ne.

9 E'ina nehuno amanage huno Anumzamofo agihanta vazine, o nenageho Abrahamu Anumzana, nfanimofo Aisaki Anumzane, Ra Anumzamoka, Kagra nasmi'nane, etenka kagra mopakarega nagaka'arega vugena, kazeri ra hugantaneno hunane. 10 Nagra knare osu vahe mani'nogenka ksuntaginantenka, kavesi nenantenka, antahinaminka Kagra eri'za vahekamo'na naveri'nane, nagra magoke azompa eri'nena Jordani tina tkahena vu'noe. Hanki menia nagra tare kevu eri hu'na neoe. 11 Nagu vazinka nza huo, nagra nunamu nehue, nenfu Iso azampinti, koro nagesa nehie, na'ankure eme nenaheno mofavre ni'ane, zamarerane zamahe'zankure. 12 Hianagi Kagra ko hunante'nane, Nagra kazeri ra neha'nena kagehe'za hage rinkena ksepankna hnage'za hampri hana huga osugahaze hunka hunante'nane.

13 Higeno ana kerage anante maseteno, kotigeno otino mika'za erino e'nefinti ase'ma hu'neama'a refko huno muse'za nefu Iso ami'za eri atru hu'ne. 14 200ti'a memenki, 20ti'a ve memenki, 200ti'a sipisipigi, 20ti'a ve sipisipi zamarenteno, 15 30ti'a ami ri rati kemori afu'ene ksefa ve anenta'zmine, 40ti'a bulimaka'one 10ni'a buli afuki, 20ti'a a' donkigi, 10ni'a ve donki afuki huno zamarente'ne. 16 Eri'za vahe'amokizmi huzmantege'za afu'zga refko hute'za zamente zamente erizogiza zamagri'aku zamagri'aku zmavre'za nevzageno amanage huno zamasmi'ne, Vugoteta nevuta rure rure huta zamareta viho, 17 huno nezmasmino, kota vu'nemofonku amanage huno hanave ke asmi'ne, Nenfu Isoma eno emenegageno, Igati vahe'moka, iga nevane, aza afu'zga zamaregotenka neane? huno kantahigesigenka, 18 amanage hunka asmio, Eri'za vahekamofo Jekopu afutmine. Muse'za ramofo nefu Iso ami'zane, hagi agra henka tmage'a ne-e. 19 Hanave kefintike amefi'a vnamokizmine afu kevu zamariri'za vanazane, anankege huta kantegama Isona kesuta asmiho, 20 tamagra anage hiho, antahio, eri'za vaheka'a Jekopu'a agra tamefiga'a ne-e. Anage huno agra antahi'ne, kote'na museza ami'nenkeno so'e hunantesie. Henka avufi negesugeno, nenageno huso'e hunantegahie. 21 Anage huno agesa nentahino huzmantege'za ana afu zamaregote'za vzageno, ana kenagera nonkiza msenare (kemifi), anante agra mse'ne.

22 Ana kenage amu'nompi Jekopu otino a' trema'ane, eri'za mofatrene, 11ni'a mofavre'ane zamareno Jabok osi tina kagata hu'nere ome zamatrege'za takahe'za vu'naze. 23 Zamareno ome zamatrege'za maka afu fenoma'ane eri'za vu'naze. 24 Anante Jekopuna agrike atre'naze, mago ne' anante ege'ne oretufe aretufe nehakeno ko' atu'ne. 25 Ana ne'mo keama Jekopuma agate'ma oreno'a, oretufe aretufe hapi amumzinare arigeno amumazinamo avazu hurami'ne. 26 Kotu'za hianki natregena va'neno huno ana ne'mo hu'ne, Jekopu'a ana neku hu'ne, A'o, nagra katranena ame hunka ovugahananki, asomu hunantetenkage vugahane huno higeno, 27 ana ne'mo kagi'a azage huno antahigegeno, nagra Jekopu'ne huno asmi'ne. 28 Mago'ene kagrikura Jekopu'e hu'za osugahaze, huno ana ne'mo asmi'ne, hagi menina Israelige, na'ankure Anumzane, mopafi vahe'ene mraguza netinka hanavetinka nagatere'nane. 29 Anante Jekopu antahige'ne, Muse (plis) hugantoanki kagi ka'a nasmio, huno antahigegeno, Na'anku Nagri nagigura nantahi negane? Nehuno anante asomu hunte'ne. 30 Na'ankure Jekopu'a ana kumakura Penieli'e hu'ne. Huama huno nagra Anumzamofo avufi amate nege'na mani'noe. 31 Penieli kumara agteretegeno, zgemo'a hnati anamifi tegeno, revazmu revazmu huno vu'ne. Na'ankure amumzinamo ampu henegeno'e. 32 Ana hu'negu menina Israeli mofavre'moza amumzinamofo aregri zferinafi eme hampri'nea agnuna ageza'fintira nonaze, na'ankure agra, Jekopu amo'mofo amumzina avako'ma hu'nea zanku hu'za nonaze.