1 Ana maka'zama fore hutegeno, anante Isipi kinimofo tintfente ene nezama'are kegva hu'nea ne' ene, breti kre'zante vugota huna'a ne'tremoke, ra zani Isipi kinimofona rimpa eri haviza hu'na'e. 2 Fero'a tare vugotena'a eri'za netrena, kinimofo tintfente ene nezama'are kegva hu'nea ne' ene, breti kre'zante vugota hu'na'a ne'tremokiznia tusi'a rimpa heznante'ne. 3 Ana netrena kinimofo avate kva hunentea (kepten) ne, nompi Josefe mani'nefi magopi kina ome huznantene. 4 Ra kva ne'mo, Josefe kegva huznante'nogu ome znante'ne, agra kegva kriznantegeke mago'a zaza kna mani'na'e.

5 Isipi kinimofo tinkapure azeri nentea ne'ene breti negrea ne'enena kinafi manineke, tarega'moke ava'na magoke kenege ru ava'na ketere hu'na'e, mago'mofo ava'na gemo rugante rugante hu'ne. 6 Nanterampi Josefe eno eme znageana, znagra zanasu zampi mani'nankeno znage'ne. 7 Fero eri'za netre'moke kva'amofo (masta) kina nompi mani'nakeno znantahige'no, Na'a higetna menina tanasu'zampina mani'na'e? 8 Znagra kenona hu'ne asmina'e. Tagra ava'na ke'noa ava'na magore huno huama hurami vahera omni'ne. Josefe znasmi'ne, huama'ma hu'zana Anumzamofompi me'neanki, Muse (plis) hurnantoanki, nasmi'o.

9 Kinimofo tinkapure vugote'nea ne'mo agra avana ke'a Josefe asmino anage hu'ne, Nagri ava'nafina koana, navuga mago nofi (vain) me'ne, 10 ana vain nofitera taregi magoki azankuna'a me'ne, nehagefintira, rga rehenerfino, atruma hu'nefintira, rgamo'a knare afure'ne. 11 Fero kapumo'a nzampi me'nege'na, vain rga tagi'na eri rati'na Fero kapufi nente'na, ana kapua Fero azampi ome ante'noe. 12 Higeno Josefe anage huno asmi'ne, Ava'nama kana agafa'a anahure, taregi magoki azankuna amo'a taregi magoki zgegne, 13 taregi magoki zgegna varesigeno Fero'a kagaze'za eri amne huganteno ko erizankare kavrentegahie, hanigenka kote'ma nehanaza hunka Fero azampi kapu'a antegahane, agri tinkapure azeri nentanaza ome hugahane. 14 Hianagi knare'ma hunka umanisunka nagriku antahi namio, muse (plis) hugantoanki antahi naminka nagri nagenkea Fero asmigeno ama'i kina kumapintira navre fegi'a natreno. 15 Na'ankure nagrira tamage huza musufa ase'za, Hibru vahe mopafinti navre'za eme nantenage'na, amafima ema mani'nofina magore huna antahi'na kena osu'noa zante navre'za mopa agu'afina hanimoke hu'nefina eme kina hunante'naze.

16 Ana zanke huno kinimofo breti vugoteno negrea ne'mo, Josefe'ma ava'nage knare huno rukrehe humigeno nentahino, anage huno Josefena asmi'ne, Nagranena anazanke hu'na ava'na ke'noe, koana, taregi magoki eka'ekapi (basket) efe breti zogirinte nanunte me'ne, 17 agofetu me'nea eka ekapi ruga'a ruzahu ruzahu breti kave Fero suza me'ne, nmamo'za ana eka'ekamo nanunte me'nege'za agu'afinti ne'naze. 18 Josefe kenona huno asmi'ne, avana kamofo agafamo'a amanahure, taregi magoki eka ekamo'a taregi magoki zgegne, 19 taregi magoki zgegna agteresigeno'a, Fero'a kazeri sga huno kagena akafriteno, zafare hantigantesige'za, nmamo'za kavufga negahaze.

20 Huznasmi'nea kante taregi magoki kna egeno, Fero ksente'nea knare maka eri'za vahe'amokizmi ra ne'za kre zamante'ne, kre nezmanteno vugoteno ti kapu'a erisga hunentea ne'ene, breti'a kre nentea ne'tremokiznia, ranra eri'za vahe'amofo zamure, znavre ama hu'ne. 21 Fero tinkapu'a vugoteno azerisga hunentea nera, erizama'afi avrentegeno agra Ferona kapu'a azampi antente'ne. 22 Hianagi breti kre'zante vugota hu'nea nera, Josefe ava'na keznia zamasmi'nea gante zafare hanti'naze.

23 Hianagi kinimofo kapu'are vugota hu'nea ne'moa Josefena antahi omino, agekni ante'ne.