46
Kot ach lenien op me ach pöchökül
46.1-11
Ngeni ewe mi emweni chon köl: Echö köl än nöün Kora kewe mwän. Ei köl usun ngingin sopran.
1 Kot ach lenien op me ach pöchökül,
a sip le alilis lon fansoun riaföü.
2 Iei mine sisap niuokus are fanüfan epwe wilila,
nge chuk kana repwe kokotiu lealololun matau,
3 are nonon lematau epwe püng o puropur,
nge ekewe chuk repwe chechech ren püngüpüngün.
4 Mi wor eu chanpupu mi awarato pwapwa ngeni ewe telinimwen Kot,
ewe leni mi pin än Ewe mi Unusen Tekia.
5 Kot a nonom lon ewe telinimw pwe esap fokun tala.
Lesosorusich Kot epwe alisi ewe telinimw.
6 Chon ekewe mwü ra fokun niuokus, nge mwün ekewe king ra taroporop.
Iwe, lupwen Kot a akkapwas, fanüfan a telila.
7 Ewe Samol mi Unusen Manaman a etikich,
än Jakop we Kot i ach lenien op mi pöchökül.
8 Oupwe feito o nenengeni än ewe Samol mi Lapalap föför,
usun an ataela fanüfan.
9 A aükätiu maun won unusen fanüfan,
a kupi ekewe likapich o pwülü ekewe siles,
a fisi ngeni ekkei ekewe wokenin maun.
10 A apasa, “Oupwe emwen le maun, oupwe silei pwe ngang echök Kot.
Ngang üa tekia seni chon ekewe mwü,
ngang üa tekia won fanüfan.”
11 Ewe Samol mi Unusen Manaman a etikich,
än Jakop we Kot i ach lenien op mi pöchökül.