1 Inau tu talua nigua na ghanaghana ni pilupilu itatana Lord.

Na pukuna keri, e ghua ge o bosa vaniu,

“Ko tona tana lei ghotu na va polopolo iga!

2 Rana tangohahi tara lohighi didira na baghe

mara talui didira na kuali tana nilohi.

Ma gaira tara vania va tana ungaungadira

ara hei tara gonia na uto.

3 Na banatana na vetena mana arelavaghi te parihai.

Mana hava kara nea rana maemane?

4 Ma Lord te ghaha tana valena te Tabu;

ma Lord te tona haliu so na huhuli ikokou.

Ma gaia te vatogha dutuvighi so na lei totobo

me tabotaboa sopasopa sakai tana maramana.

5 Ma Lord te tabotabora rana maemane maia rana tangohahi.

Ma gaia te nira sika arahei tara dolovia na dika.

6 Agaia te kovala horua inaghodira

te ruruhu ivuvungadira rana tangohahi,

me vahaghitailira nia na lake

te ruruhu mana ruruhuni na lei ghuri.

7 Na pukuna Lord te maemane;

Keri ge agaia te dolovia na maemane.

Agaira arahei tara gonia na maemane,

kara righia na matana.