8
Hay Nahhun hi Inalin Bildad ay Job
1 Ya tembal Bildad an holag Shuah an inalinay,
2 “Anuud di alpahan nan panapihapitam hinan mi'id di upidna
an ay tuyup an mabi'ah ya naluh?
3 Un mah mabalin an pikuwon Apo Dios nan nahamad an mihumalya?
Ya undan pikuwon nan Na'abbagbagtu nan makulug?
4 Nan imbabaluymu ya unda numbahol ay Apo Dios,
at hiyaat unna minolta dida ta balloh nan nappuhin inatda.
5 Mu gulat ta hi Apo Dios an nidugah di abalinanay pange'kodam
ta Hiyay pumpahpahmo'am,
6 ya gulat ta immannung an mi'id ah numbaholam ay Hiya,
at immannung an igohgohan da'a,
at ipabangngadnan he"a din aatmuh hopapnah nan nunhituwam!
7 At adi miyummat hidin na'ubah an inadangyanmuh din hopapnay
idat Apo Dios ay he"ah udum di algaw hi hukatna!
8 Din tataguh penghana ya nun'ala'engda,
at mahapul diday pangibagam hi pun'adalam.
9 Ti ditu'ud ugwan ya un tu'u pa'itunnu,
at hiyanan manghan di inila tu'u.
Ya heten ihinan tu'uh tun luta ya paddungnay un tu'u ay ngaun un malmaluh.
10 Mu ta"on ya donglom di itudtudun din o'ommod tu'uh din penghana
ta way atom an manginnila.
11 Nan atlibong ya adi humangaw hinan mamagan luta
ti hay humangawana ya nan bumanabaha.
12 Ya gulat ta mamaganan nan luta
at diday mahhun an malangu an ta"on unda agguy natong,
at mi'id di hulbida ti adida ma'usal.
13 Ya umat hinay nitaguan di tatagun aliwandah Apo Dios
ti mun'a'ubah di panahalimidda.
14 Ya nilalahaw nan gegemhonda ya nan pangehdolanda
ti umat hinan buut di a'agwan mapanpana"i,
15 ya matu"in hiyah un miyulhud hinan buut ti mun'apogtang.
16 Nan adi mangunud ay Apo Dios ya umatdah nan nitanom
an niwa'at di lamutnah nan way mamaptangan ya nadadanuman
an nidugah di lamutnan himmale'ad'ad hinan luta.
17 Ya nan lamutna ya umaladap hinan mabatu
ta unudona nan nundengtan nan batu.
18 Mu unat goh mabu'nut ya aliwan nan tataguy himmangawana,
19 at heden nitanom ya na'ubah,
ya nihukat di udumnan himmangaw hidin nabu'nutana.
20 Immannung an adi inganuy Apo Dios nan tatagun mangunud ay Hiya,
mu nan tatagun mangamangat hi nappuhi ya adina badangan dida.
21 At he"a, Job, ya awniat ipa'amlong da'an Apo Dios,
ya pakikiyon da'a,
22 ya bainona nan mamohol ay he"a,
ya mun'a'ubah nan numpunhituwanda.”