yontunɑɑ tɑɑ tɔɣɔlɔ.

Atɛ yəlɑɑ mɛ́,

mə́ tənɑ ɩ́ wiliti Ɩsɔ nɑ lɑŋhʋlʋmlɛ.

2 Ɩ́ yoo ɩ hətɛ sɑmtʋ yontu,

nɑ ɩ́ tʋ-ɩ teeli nɑ mə́ sɑmtʋ.

3 Ɩ́ heeli Ɩsɔ sɩ:

Nyɑ́ təmɑ kɛ sɔsɔɔnɑ.

Kolontunɑɑ nɑɑkɩ nyɑ́ toŋ sɔsɔɔŋ,

ɩlɛnɑ pɑ́ yeki kɑlɑmpɑɑnɩ.

4 Tɛtʋ yəlɑɑ tənɑ həntɑ nyɑ́ nɔɔhɛɛ tɛɛ kɛ́,

nɑ pɑ́ yooki lɑŋhʋlʋmlɛ yontu nɑ pɑ́ sɑŋ nyɑ́ hətɛ.

5 Ɩ́ kɔɔ nɑ ɩ́ nɑ́ Ɩsɔ təmɑ,

ɩ lɑkɑsɩ kɛ sɔsɔɔnsɩ kɛ́.

Yəlɑɑ tɑɣɑ ɩ lɑkɩ-sɩ.

6 Ɩsɔ yelɑɑ nɑ teŋku lʋm nyɔɔ,

nɑ pə́ yele tɛtʋ puɣulɑɣɑ nɑ yəlɑɑ tɔ nɔɔhɛɛ.

Tənɑɣɑ tɑ́ lɑŋɑ hɛɛnɑ-ɩ.

7 Ɩsɔ tomɑ kɛ ɩ ŋmɑkələnɑ tɑm tɔɔ.

Nɑ ɩ́ feŋiɣi piitimnɑɑ nɑ ɩ ɩsɛ

sɩ tɔɔ kʋllɑɑ ɩ́ tɑɑ tɑsɑ ɩ tɔɔ kɛ́ kʋlʋɣʋ.

8 Yəlɑɑ mɛ́ ɩ́ sɑ tɑ́ Ɩsɔ,

ɩ́ sɑmɩ-ɩ nɑ mə́ nɔɔsɩ nɩɩ.

9 Ɩsɔ hɑɑnɑ-tʋɣʋ weesuɣu,

nɑ ɩ́ kentiɣi tɑ́ tɔɔ sɩ pə́ tɑɑ co-tʋ.

10 Hɑɩ, Ɩsɔ, nyɑ́ mɑɣɑsənɑ-tʋ nɑ ń tɑɣɑnɩ-tʋ,

ɩsɩɩ pɑ wɔkʋɣʋ liɣitee nyəɣəlʋɣʋ sɩ kʋ té tɔ.

11 Ɩsɔ n yelɑɑ nɑ wɑhɑlɑ mɑɣɑnɑ-tʋ,

nɑ ń yele nɑ lɑŋwɑkəllɛ kəlɩ-tʋ.

12 Ɩsɔ yelɑɑ nɑ yəlɑɑ tɔɣɔ tɑ́ tɔɔ,

tə tɔmɑ kɔkɔ nɑ lʋm pə tɑɑ.

Ɩlɛnɑ Ɩsɔ ń ləsɩ-tʋ nɑ ń tɑnɑ-tʋɣʋ təpɑntɛ tɑɑ.

13 Mɑɑ sʋʋnɑ nyɑ́ təyɑɣɑ kɛ kɔtɑsɩ

nsi kɔkɔ lusɑ sɩ tənɑ tɔ,

nɑ mɑ́ lɑ́ nɔɔsɩ nsi mɑɑ sɩɩ-ŋ tɔ.

14 Nsi mɑɑ kulɑ nɔɣɔ kɛ mɑ wɑhɑlɑ wɑɑtʋ nɑ mɑ́ sɩɩ tɔ.

15 Mɑɑ lɑ-ŋ kɔtɑɣɑ ŋkɑ kɔkɔ lusɑ

kɑ tənɑ tɔɣɔ heeŋ nim nyəŋ,

nɑ ɩwɑɑŋ,

nɑ lɑtəcɛnɑɑ nɑ pəŋtʋlʋŋ.

16 Mə tənɑ mpɑ mɛ ɩ́ nyɑŋnɑ Tɑcɑɑ tɔ,

ɩ́ kɔɔ nɑ mɑ́ kɛɛsɩ-mɛɣɛ mpi Ɩsɔ lɑpɑ-m tɔ.

17 Mɑ mɑpɑ kɑpukɑ nɑ Ɩsɔ tɔɔ nɑ mɑ nɔɣɔ,

nɑ mɑ́ sɑmɩ-ɩ nɑ mɑ nsəmlɛ.

18 Ye mɑ tɑɑ kɑ wɛ ɩsɑɣɑtʋ

Ɩsɔ tɑɑ nɩɩnɑ-m.

19 Amɑ Ɩsɔ nɩɩwɑ mɑ nɔɣɔ

nɑ ɩ́ ké ŋkpɑŋŋ nɑ ɩ́ nɩɩ mɑ wiinɑʋ.

20 Ɩsɔ kɛlɛ sɔsɔ,

ɩ tɑ lɔ mɑ sələmʋɣʋ,

pəyele ɩ tɑ pɛ-m kʋpɑntʋ.