4
परमेस्वरए उमिनतावर तोबो क्याँ ज़
1 है जैद ङा गेप्रभुए ओय़ेनए जूँनी झ्यालखानाल लिज़्याव कैदीए ङाल्योनी जेलाई है ङादाचिज़्या, जेलाई परमेस्वरए कितावनी खुल्द ओनैचिज़्याव, हितावनी ज़ दाव ताके। 2 मास॰द, तहस लिद, चाव माचाव गाल्द जे जेल युँ नैद सहिसिद ल्यो ताके। 3 स़ोनो जे जेल खैद परमेस्वरए उपुरूसनिकाव ताज़्याव तयुँ जैद लिन्यादा कलँ ब ल्यो ताके। 4 गे भरी तोबो क्याँ ज़ ताद, तोबो पुरूस दैद, प़ाइँ तोबो आसदा ज़ खुल्सिउ गेलिज़्या। 5 प़ाइँए गेप्रभु ब तोबो ज़, गेभैंःव पाँ ब तोबो ज़, गेसछैंसिउ ब तोबोनी ज़। 6 प़ाइँए गेबाबु परमेस्वर ब तोबो ज़ लिज़्या। नो प़ाइँए गेङ़ैत, प़ाइँए गेखार्ल, प़ाइँए गेयुँल ब लिज़्या।
ख्रीसए ओगोइँनी सु सु गेबरदान लिज़्या
7 हैदी ब ख्रीसए गे उमींरालाई ओल ओगोइँव मितावनी ज़ ओय़ेन दान्यात सु सु गेबरदान याद नैसिउ। 8 धर्मसास्त्रल ब अइ लिद सर्सिउ लिज़्या,
“रोत उपुलुसोत
ओराहारैव उसुतुर भरी कैत जैद,
ओल उमींरालाई असिकर भाःद याएक्यो।” 4:8 भज ६८:१८
9 रोत पुलुसोए ओअर्थ आव ज़ — ङ़ादा नामल झरिद नाम जींल मनी पसिउ ज़। 10 नो नामल झरिउ ते स्वर्गताव प़ाइँरानी झेंःवत पुलुस्द नाम नमलावराए याङ़ैताव ख्रीस ज़। 11 ख्रीसए भाःद ओरायो असिकर आवर ज़ — ओलस ओलस बाऱिउरालाई ओसाचीर याजैक्यो। ख्वारालाई फरी अगमबक्तार, ख्वारालाई ओपाँ फींजैन्या, ख्वारालाई मन्दलीलाव लोम्बा य़ेन दान्या स़ोनो परमेस्वरए ओपाँ सिऊन्या याजैक्यो। 12 आव बरदानर गे परमेस्वरए उमींरालाई ओय़ेन दान्यात पाखो जैद मन्दलीलाई* 4:12 ग्रीक खामनी — ख्रीसए ओक्याँलाई। एफि १:२३ चिऊन्या। पाथ पारैन्याए जूँनी यासिउ लिज़्या। 13 हो ताकिन ची गे युँ हुप्न्यात स़ोनो परमेस्वरए ओज़ा येसु ख्रीसलाई सरेस्न्यात खैवर तान्या गेले, स़ोनो पाखो ताद ओल ख्रीस किताव ओल्यो, गे ब हिताव ज़ तान्या गेले।
14 गे माछिप्ताव ल़ुज़ा बाँज़ा स्यासोर लिन्या माःक। निताव मिँए आदा होदाङाव पाँर थैद कैताक अऩाकलाव सिर्जैसिउ पाँरादा बाद बले·ज़्यावराए ल्योनी झुकिद नो मिँ बतासए आदानी होदा ओख्याज़्याव पुल स्यासो ज़ ताज़्या। 15 बुरू गे नैं मेंरास खैद साचो पाँर दाद प़ाइँल ज़ गेप्रभु येसु ख्रीसए ओदोव मिताव गे ब दोनाव ताके। ओल ज़ गेङ़ैताव लिज़्या। 16 गे ओक्याँर फरी ओक्याँत जोरैसिद सु सु गेय़ेन याद ओनैसिज़्याव मितावनी ज़ दाद प़ाइँ खैद ख्रीसए उमिनत लिज़्याव गेक्याँ छिप्द पाखो गेताज़्या।
साःरो युँ रैव ताके
17 है जैद ङा गेप्रभुए उमिननी है ङादाचिज़्याव पाँ चावस थैच्यो, जे परमेस्वरए ओपाँ मासैंज़्यावराए माँःती अऩाकलाव पाँरादा य़ेनरादा फरी ताबाच्यो। 18 नो अऩाकलाव य़ेन दाज़्यावर ते यायुँनी काता ज़ माहुवर परमेस्वरकिन तँदाङावर ताद परमेस्वरए ओल्योनिकाव जिउँनील मागनिसिउर ज़ ताज़्यार। है जैद काता ज़ मासैंन्यार, यायुँ बनै खावर, 19 यालाज माल्योर यातावए, नोर युँ माजामो य़ेन दान्यादा याजिउ च्यो च्यो झाःद प़ाइँत ज़ लोभ दोज़्यार, प़ाइँत ज़ फुरी य़ेन ब दोज़्यार। 20 जे ते ख्रीसए ओय़ेन नितावनी जेपैसिउ माःक। 21 परमेस्वरए ओपाँ जेथैक, येसु ख्रीसनिकाव साचो पाँ इताव ची ओल्यो लिन्या जेसैंखेहो। 22 ङ़ादाङाव जेयुँए मादान्या वाज़ खिम्द ओबले·चिज़्याव। आकिन ते नो मादान्या जेदोज़्याव य़ेनर ऱास्द, 23 साःरो युँ रैव ताके। 24 नो साःरो युँ ते छैंव सतलाव य़ेन दान्यात ओल परमेस्वरए ओगेनी ज़ जैसिउ लिज़्या। 4:24 उत १:२६
दान्या मादान्या य़ेनर
25 है जैद धुत पाँ भरी ऱास्द छुतरास साचो पाँ वाज़ पाँव ताके, काराव ल्यो ताकिन गे प़ाइँ तक्याँ ज़। 4:25 जक ८:१६ 26 कातारात जेरिस ओचोकिन मादान्या य़ेन तादोच्यो। नो जेरिस हो छ्याम ज़ उसिक। 4:26 भज ४:४ 27 जो य़ेनल तादी ब सैतानलाई येम ताएच्यो। 28 कुज़्याव मिँ फरी ताकुक। बुरू उकुइए साचो य़ेन दाद माथैंव मायो·वलाई ओयोक। 29 कोभा पाँर जेयाःनी ताहुक। बुरू थैज़्यावरालाई तान्या चाव पाँ वाज़ पाँव ताके। 30 परमेस्वरए छैंव उपुरूसए उयुँ सघर्द ताएच्यो। नो पुरूसनी ज़ परमेस्वरए गेलाई फाल्न्या छ्याम घबाँचिरक लिद थामिद नैसिउ। 31 जे जेल मासखैज़्याव युँ, रिस चोन्या, युँल नैन्या, थल्न्या, अर्काए उमिन बले·न्या, स़ोनो युँनी कुबातैं हुज़्याव भरी प्याःपी जैद ख्याव ताके। 32 बुरू किताव परमेस्वरए येसु ख्रीसए ओक्याँत मादान्या जेदोव ऱास्द ओयाचिउ, जे ब छुतलाई जेयुँ नाद जेउपर्त मादान्या ओदोव ऱासो ताके।