10
कानुननिकाव चलनर हुन्या पाँए ओसाँ ज़
1 मोसाए ओकानुननिकाव चलन भरी साचो ओक्याँ माताद छींनीकाव हुन्या पाँए ओसाँ वाज़ ओतावए नो सालकाव एकम्न्या याराचरैःज़्याव माररानी नो चरैःज़्यावरालाई छैंव माराजैव। 2 ननी ज़ परमेस्वरए ओङ़ाक छैंवर याताव ताकिन ङ़ादाङाव यादोव पापत उथुपुल माताद पापनी सछैंसिन्या मार सैःन्या ब ऱास्खेरहो। 3 खाली नो मारर सालकाव याराचरैःज़्यावनी झन ज़ यापापए य़ाका दोज़्यार। 4 काराव ल्यो ताकिन नो बहरर स़ोनो बोकाराए याझीनी खर्क ज़ मिँलाई पापनी छैंव माजैधुव।
परमेस्वरए ङ़ादाङाव बाचालाई तुपैक्यो
5 है जैद ख्रीस आव संसारल मिँ मिन्सिद उहुक ओल उजूँनी धर्मसास्त्रलाव सर्सिउ पाँ ज़ पाँके। नो पाँ आव ज़,
“अ ङाबाबु परमेस्वर,
नँलाई मारर सैःद चरैःन्यानी नयुँ होलाँ माताए।
बुरू ङालाई मिँ ज़ नजैनाके।
6 मेंःनी सघान्या पुजानी स़ोनो पाप क्याल्न्या पुजानी नयुँ होलाँ माताए।
7 है जैद अ परमेस्वर,
किताव ङाजूँनी ङ़ादा ज़ धर्मसास्त्रल सर्द ननैज़्याव
हिताव ज़ नयुँलाव मिताव य़ेन दाना ङा हुद ङाले।” 10:5-7 भज ४०:६-८
8 कानुन मितावनी चरैःन्यार उलिदी ब, ख्रीसए उस॰कत, “चरैःन्या माररानी, मेंःनी सघान्या पुजानी स़ोनो पाप क्याल्न्या पुजानी नयुँ होलाँ माताए,” है लिद, 9 फरी, “नयुँलाव मिताव य़ेन दाना ङा हुद ङाले,” है ब दोक्यो। ननी ज़ परमेस्वरए ङ़ादाङावलाई तुपैद छींनीकावलाई थ·रैक्यो। 10 परमेस्वरए उयुँ छींनीकावनी ओतावए गेजूँनी येसु ख्रीसए तखेप्त ज़ उजिउ चरैःद ओयासिउनी ज़ गे परमेस्वरए ओङ़ाक उयुँलाव मिताव छैंवर ताद गेले।
11 नो कानुननिकाव पुजारीर परमेस्वरए ओसेवा यादोक एकम्न्या तोबो नास्याकाव पुजार वाज़ यादोज़्याव। ननी सुलाई ज़ पापनी छैंव माराजैर। 10:11 प्रस २९:३८ 12 ख्रीसए ते मिँराए यापापए जूँनी ओक्याँलाई तखेप्त ज़ एकम्न्याकावए जूँनी चरैःद, परमेस्वरए ओवोर्दा च़ुसिनाके। 13 हाःकिन उसुतुर भरिलाई परमेस्वरए उखँ धूँल झाःद ओमाएवा पै नक ज़ कींद नैव, 14 काराव ल्यो ताकिन ख्रीसए तोबो मारनी ज़ छैंव तानाज़्यावरालाई एकम्न्याकावए जूँनी याखत माल्योर याजैक्यो।
15 ख्रीसए निताव य़ेन ओदोव गेलाई छैंव पुरूसनी धर्मसास्त्रल ब सतैंसिउ लिज़्या। नलाव सर्सिउ आव ज़,
16 परमेस्वरए है लिज़्या,
“छींनी तछा नोरास इताव साःरो बाचा ङानैरिज़्या,
ङाकानुन यायुँल झाःद्याद, ङापाँर यायुँल सर्द ङाराएरिज़्या।” 10:16 यर ३१:३३
17 स़ोनो,
“यादोव पापर फरी य़ाका ज़ दान्या ङामाले।” 10:17 यर ३१:३४
18 है जैद गेपाप भरी परमेस्वरए तोबो मारत ज़ खेम्द ओयासिउ प़ाइँना फरी छुत मार काराव ओचाहिउ?
साःरो येम फैसिउ
19 गेनैं गेमेंर, येसुए उजिउ झाःद उझी सोभोद ओयासिउनी परमेस्वरए ओङ़ाकाव प़ाइँरानी चोखो पोल पसिन्या गेलाई काताए ओछ्यास ब माले। 20 नो ङ़ादाङाव बारिसिउ पोल पसिन्या साःरो येम फैसिउ लिज़्या। नो येम येसु उसिउनी ज़ फैद नैद्यासिउ। 21 परमेस्वरए उझ़िम चलैन्या नाःल्दिउ गेपुजारी उलिज़्यावए, 22 गेयुँ सुहुप्द माचाव य़ेनर ऱास्द गेयुँ चोखो जैद उमिनत ऱील सछैंसिद धुक्कस परमेस्वरए ल्योदा गेबाया। 10:22 लेबी ८:३०; इज ३६:२५ 23 गेयुँ हुप्द कींद गेनैज़्याव आस ओमायो·वा पै ग्याल गिल माताद थ॰रिद ल्यो ताके। गेलाई ओय़ाका याज़्यावए सत माहारिउ। 24 बुरू कातानी गे गेल खैद समारिसिन्या स़ोनो चाव य़ेन दान्यात जाँगर हाइसिन्या खिमो ताके। 25 गेनी ख्वाराए परमेस्वरए उमिनत दुप्सिन्या याऱासो मिताव गे ते दुप्सिन्या खर्क ज़ माऱासो ताके। बुरू ख्रीस उहुन्या छ्याम नजिक नजिक उहुनावए झन ज़ गे गेल सा हाइसिउ ताके।
साःरो येमलाई ऱास्द गेबाकिन ओछ्यास लिज़्या
26 गे परमेस्वरए ओपाँ थ·रैद मनी सैंज़्यावत सैंज़्यावत पाप गेदोकिन परमेस्वरस खैन्या येम कातानी गेदैरिज़्याव? 27 बुरू परमेस्वरए उसुतुररालाई जैद ओरायो छे छे ङम्सिउ उरिसलाव मेंःल बान्या आस वाज़ लिज़्या। 10:27 यसै २६:११ 28 भाःकाव मिँर ब मोसाए ओकानुन ऱास्द तँदा याबाकिन नोराए याउपर्त ऩेब्लो स़ोम्लो साचीर यापुलुस्किन नोरालाई मासैःद यामाराऱास्ज़्याव। 10:28 ब्य १७:६; १९:१५ 29 नोकिन झन जोए परमेस्वरए ओज़ालाई उखँ धूँलाव हिला तकल जैज़्याव, होए झन किताव सजा दैवके? नितावए उजिउ झाःद उझी सोभोद परमेस्वरए ओङ़ाक छैंव जैज़्यावलाई माछैंव जैक्यो। उयुँ य़ाल्ज़्याव छैंव पुरूसलाई मनी बीज्यात ज़ जैक्यो। 10:29 प्रस २४:८ 30 गे ज़ गेसैंज़्या, परमेस्वरए, “निताव पोल खिस फेरैज़्याव ङा ज़,” है लिद ले। स़ोनो उमींरालाई फाल्ज़्याव ओल ज़ लिज़्या लिन्या ब गेसैंज़्या। 10:30 ब्य ३२:३५-३६ 31 इताव सजारानी जींदो परमेस्वरए उकुइत परिन्या बनै छे छे ङम्सिउ लिज़्या।
परमेस्वरए ओय़ेन दान्यात युँ सज़िम्न्या माःक
32 परमेस्वरए ओपाँ उस॰कताव जेदैव बेला चेतैच्यो। हो बेलाक परमेस्वरए ओपाँ चावस थ·रैद कुधु दुखर जेसहिके। 33 ख्वार प़ाइँराए ङ़ाक हसैद बरे·सी ऩिन्या ब जेताके। ख्वार प़ोसी ऩिन्या ब जेताके। ख्वाराए फरी माछे·द नितावरालाई धुरिद्यान्या ब जेताके। 34 झ्यालखानाल परिउरालाई ब चावस ज़ जेराचिऊके। कैताक यालुतिचिक ब ‘आवकिन झन चाव खर्क ज़ माखेम्न्या गेधन सम्पती स्वर्गत लिज़्या’ लिद रेंद ज़ जेसहिके। 35 है जैद जेयुँ तासज़िम्च्यो। नो य़ेननी घ्योःव बाजी जेदैरिज़्या। 36 जेलाई सहिद थ॰रिन्या युँए ओचाहित लिज़्या। निताव युँ जेस उलिकिन परमेस्वरए उयुँलाव मिताव सयो·द ओय़ाकालाव पाँर जेदैरिज़्या। 37 धर्मसास्त्रल इताव सर्सिउ लिज़्या,
“चाँदो ज़ ङाहुरिज़्या है लिज़्याव परमेस्वर
धिलो मादाद हतप्त ज़ हुरिज़्या।
38 हो छ्याम उयुँ हुप्द परमेस्वरस खैव मिँ वाज़ बाँचिन्या ले।
ओल्योनी याछींदा ओल्द बाज़्यावर ते उयुँलाव मितावर मातार।” 10:37-38 हब २:३-४
39 खाली गे ते नो ओल्योनी ओल्द नास तान्याल बाज़्याव स्यासोर ते गेमाले, गे ते गेयुँ सुहुप्द परमेस्वरए ल्योङाव अजम्बरी जुनील बाज़्यावर ची।