26
Iyyoob
1 Iyyoob akkana jedhee deebise:
2 “Ati nama humna hin qabne hammam gargaarte!
Irree laafes hammam jajjabeessite!
3 Nama ogummaa hin qabneef gorsa akkamii kennite!
Beekumsa guddaa akkamiis argisiifte!
4 Akka ati dubbii kana dubbattuuf eenyutu si gargaare?
Hafuura eenyuutu afaan kee keessaa dubbate?
5 “Warri duʼan, warri bishaanii gadiitii fi
kanneen bishaan keessa jiraatan hundii ni hollatu.
6 Duuti fuula Waaqaa duratti qullaa jira;
badiisnis waan isa dhoksu hin qabu.
7 Waaqni iddoo duwwaa irra samii kaabaa diriirsa;
lafas iddoo duwwaa irratti rarraasa.
8 Inni duumessa isaatiin bishaanota hidhee qaba;
duumessi sunis bishaanota jalatti hin dhoʼu.
9 Inni duumessoota isaa itti uffisuudhaan
fuula jiʼaa ni haguuga.
10 Inni fuula bishaanotaa irratti,
ifaa fi dukkana gidduu daarii dhaabe.
11 Utubaawwan samii ni hollatu;
dheekkamsa isaatiinis ni rifatu.
12 Inni humna isaatiin galaana ni raasa;
ogummaa isaatiinis Raʼaabin ni ciccira.
13 Hafuura baafatuun samiiwwan qulqulleesse;
harki isaas bofa shawwisaa waraane.
14 Wantoonni kunneen hojii isaa keessaa qarqaruma qofa;
hasaasni nu waaʼee isaa dhageenyu hammam xinnaa dha!
Yoos kakawwee humna isaa eenyutu hubachuu dandaʼa ree?”