76
Bab-Dummad gege-galakued
Asaf, we-namaked narmaksad. Namakmalad-e-iduedga-sogleged:
We-namakleged, Neginotʼba namaklegoye.
1 Judá-yalagine, bela Bab-Dummad magar-dakmalad,
Israel-yalagi, e-nuga dummarba gued.
2 Ese-goled-neg Salemʼgi siid,
e-meged-neg Sión-yalagi siid.
3 A-yalagine, Bab-Dummad warsi-e-sigumar bibichisad,
sigu-abgamalad bibichisad,
es-suidmar bibichisad,
bila-onolegedgi-ibmar-ebulemalad, bela obelosad.
4 Bab-Dummad, bedi dule-gandikidid,
bedi yalamar-degisadegu-bukwadba bur gandikidid.
5 Dule-bulegan omilede gusmalad, burgwismalad.
We-dule-bulegan gannale bar gwisguosurmalad.
6 Be, Jacob-e-Bab-Dummad, egi be gwichigusgua,
e-moli-urmar, e-molimar geg bar nanae gusad.
7 ¡Bebi, unnila be-dobmalad!
Be uludegwale, ¿doa be-asabin gwisguoe? Suli, dule gwen gwisguosuli.
8 Bab-Dummad, be nibneg-akale igar-nabosad.
Bab-Dummad, napneggi san-bipi-imakdimalad-abonogega,
9 be gwichiguargusgu, napnega dobee itosad,
napnega bogi nagusad.
10 Dule-begi-urwedimalad aka be-nug-ogannogoed.
Dule-begi-urwedimalad-besmaladi aka bega iba-dummad onomaloed.
11 Be-Bab-Dummad-Jehováʼba, ise-ibmar-sogar be imakmar,
ega sogedba be ibmar imakmarbalo.
Bela yarmar-anmar-neggwebur-dikarba-bukwadi, Bab-Dummad-gandikidga ibmar-ukleged sedamalo.
12 Ar Bab-Dummadi, dule-dummagan-negdakmamaid obelogedid,
napneggi reymar-mamaid-odobguedid.