1 «ﭑ شَنُنتٍنيِ، ﭑ بَرَ سٌ ﭑ مَ سَنسِ يِرٍ.

ﭑ شُنيَ، ﭑ بَرَ ﭑ مَ سُرَيِ مَلَن،

ﭑ بَرَ كُمِ دٌن،

ﭑ بَرَ وّنِ نُن شِحّ مِن.

ﭑ بَرَ عَ قَلَ ﭑ بٌورٍيٍ بّ عٍ قَن شَ عٍ مِن،

عٍ شَ شَنُنتٍيَ كٌلٌن.»

2 «ﭑ نُ نَ شِقٍ، كْنْ ﭑ بْحّ مُ شِشِ،

عَ ﭑ شَنُنتٍنيِ شُي مّشِ،

نَشَن نُ بَرَ نَادّ كْنكْن.»

«ﭑ مَافِنّ، ﭑ دْشْفِنّ، نَادّ رَبِ ﭑ بّ.

ﭑ مَ تْوكّ فِنّ، نَشَن شَ تٌقَنيِ مَنِيّ مُ نَ.

شِنِ بَرَ ﭑ شُنيِ شِنبٍلِ،

عَ بَرَ ﭑ شُنسّشّ بُندَ.»

3 «ﭑ حَن نُ بَرَ ﭑ مَ دُفِ بَ،

قٌ ﭑ مَن شَ عَ رَفٌرٌ ﭑ مَ؟

ﭑ حَن نُ بَرَ ﭑ سَنيِ مَشَ،

قٌ ﭑ مَن شَ تِ بْشِ مَ؟

4 ﭑ شَنُنتٍنيِ نَشَ عَ بّلّشّ رَ سٌ نَادّ لٌنفٌرِ رَ،

عَلَكٌ عَ شَ عَ رَبِ.

ﭑ بْحّ نَشَ سّيوَ عَ شَ قٍ رَ.

5 ﭑ نَشَ كٍلِ عَلَكٌ ﭑ شَ نَادّ رَبِ ﭑ شَنُنتٍنيِ بّ.

لَبُندّ نُ نَ ﭑ بّلّشّ مَ،

تُرٍ نُ نَ ﭑ بّلّشّسٌلٍيٍ مَ.

نَ بِرِن نَشَ لُ نَادّ رَبِ سٍ مَ.

6 ﭑ نَشَ نَادّ رَبِ ﭑ شَنُنتٍنيِ بّ،

كْنْ عَ حَن نُ بَرَ سِفَ.

ﭑ بْحّ نَشَ سُننُن.

ﭑ نَشَ عَ قٍن، كْنْ ﭑ مُ عَ تٌشِ.

ﭑ نَشَ عَ شِلِ، كْنْ عَ مُ ﭑ مَ شِلِ رَتِنشِ.

7 تَا كَنتَمَيٍ تٌ ﭑ تٌ،

عٍ نَشَ ﭑ سُشُ، عٍ ﭑ بْنبْ،

عٍ ﭑ مَ شِنبٍلِ دُفِ مُحَ.»

8 «دَرِ سَلَمُ فِنّدِ مّيٍ،

ﭑ بَرَ وٌ مَيَندِ،

شَ وٌ بَرَ ﭑ شَنُنتٍنيِ تٌ،

وٌ شَ عَ قَلَ عَ بّ عَ شْلِ بَرَ ﭑ سُشُ شَنُنتٍيَ شَ قٍ رَ.»

9 «فِنّ تٌقَنيِ قِسَمَنتٍ،

عِ شَنُنتٍنيِ قَن عَ بِرِن بّ؟

عِ بَرَ مُشُ مَيَندِ

بَرِ مَ عَ قَن عَ بِرِن بّ؟»

10 «ﭑ شَنُنتٍنيِ كِرِ قِيشّ، عَ رَفبٍيلِ.

عَ كٌلٌن حْشُن نَ شّمّ وُلُ قُ يَ مَ.

11 عَ شُنيِ لُشِ نّ عَلْ شّيمَ قَنيِ،

عَ شُنسّشّ عِقْورْشِ عَلْ شَشَ قْورّ شَبٍ.

12 عَ يَيٍ رَيَبُ عَلْ فَنبّ نَشٍيٍ تِشِ شُرٍ دّ رَ،

عٍ قِيشّ عَلْ شِحّ، عٍ يَنبَمَ عَلْ دِيَمَن.

13 عَ شّرّيٍ لُشِ نّ عَلْ لَبُندّ يَءِلَندٍ،

عَ دّ كِرِ مَنِيَشِ سَنسِ قُفٍ تٌقَنيِ نَن نَ،

عَ شِرِ حْشُن.

14 عَ بّلّشّ تٌقَن عَلْ بّلّشّسٌلٍرَ سٌي شّيمَ دَاشِ،

دِيَمَن نَ نَشَن مَ.

عَ قَتٍ لُشِ نّ عَلْ سِلِ حِنيِ قِيشّ،

فّمّ تٌقَنيِ مْولِ ندٍ، يٍيٍ مَسٌشِ نَشَن مَ.

15 عَ سَنيِ سّنبّ فبٌ عَلْ قَنيٍ قِيشّ،

نَشَن تِشِ شّيمَ قَرِ.

عَ تٌقَن عَلْ لِبَن،

عَ عِتٍ عَلْ سّدِرِ وُرِ بِلِيٍ.

16 عَ دّ عِحْشُن، عَ شَ قٍ بِرِن قَن.

دَرِ سَلَمُ فِنّدِ مّيٍ، ﭑ شَنُنتٍنيِ نَ نَ كِ نّ،

ﭑ دّ قَن بٌورٍ نَن عَ رَ.»