6
Zeelaga vai
1 Dòun zunu, ni è ɓɔɠɔ ɠɛɛʋɛ ga zeelagai è-wɔɔlai ta maaɠuye vai zu,
2 ni è ɓɔɠɔ ɠilia ga è-laawooiti,
ni è ɓɔɠɔ ɠɛa ga kasoɠa nu ga è-laawooiti maaʋele,
3 naa ma, nii ɗa kɛ dòun zunu, ɓɔɠɔ vie,
tɔɔzei è loa è-zeiɲɔɠɔi yeezaama,
li è ɓɔɠɔmaayei bɛ, è ɓɔi da ga maanɛɛnɛi.
4 Mina va bu, ɲiimɛnii ʋa lɔ è-ɠaazu,
ɓaa è-ɠaazuɠɔlɔgiti ti ʋa pɛɛ ma mɛɛ.
5 Ɓɔɠɔ vie ga dopai ɠɛʋele, é ɠulazu dosoiti zea,
eɠɛʋelei wɔnii a ɗa kɛ la, é ɠula wɔni zo nui ná-tumɔi zu.
Ɲaka nui ná-fai
6 Ɗɛi è ga ɲaka nui, li lɛɛ pupuiti pɔ bɛ, è ti ʋɛtɛ,
ti ziɛ ʋeleiti sumɔ, è ɠigi zɔlɔɔ.
7 Ta-wɛlɛma nu la ná,
ta-ɠalamɔn la ná, ta-ɠundiɠi la ná,
8 ta ɗa ti-ɠɔnɔgi ɓɛtɛ, foɠo undaaɠulazuʋɛ,
ti ti-laamianigi ɠaalɛ ba molo leʋe ziɛgi zu.
9 Ɲaka nui, ɗa yɛsu laani, eyɛsu yeelɛ?
Siɛgi ɓɛgele ɠa è wuzeɠezu la, è ɠula ɗa-ɲiimɛnii zu?
10 È lago ɲi, è lago ɠaazuʋɛɛ ma,
è yeeiti da ɓɔɠɔ ma, è lago zaamale,† Wɛlɛ ʋɛ: 24:33-34.
11 kɛlɛ naama ziɛgi zu, baladai ɠa ɠula è viliba eɠɛ siɛziɛ nui,
nimizai zeeli è ma eɠɛ kɔɔɠɔ nui.
Yaava nui ná-fai
12 Nu ɲakai ɠa ga telebotala nui,
toɠa a ɗa li ga zɛɛ ɓɔɛiti boga,
13 é ɗa ɠaazuʋɛ loo ma, é ɗa ɠɔɠɔiti gaaloɠa,
é ɗa poogiti kɛ ga yeeɓeɠaiti,
14 yaava ɠisiɛi nɔ ɠa é ziimaʋɛ,
faa ɲɔi nɔ ɠa a ɗa ɠisiɛ su yeenɔpɛ,
é ɗa kpɔɛleʋe vai ɠɛ.
15 Naa ɠa é ba, koloɠolo fai ɠa ɠɛ ga kulafilibai,
naa ɠa ba ɠila nɔ, é ɠoloɠolo, ma zale la ná.‡ Wɛlɛ ʋɛti: 1:26; 24:22; Zɔɓ 34:20.
Nii Ɠɔoɠɔ GALAGI wɔinzeɠezu
16 Faa lɔzita ɠa ná, nii bɛlɛɠulaai Ɠɔoɠɔ GALAGI ʋɛ,
toɠa vɔlɔ ga dɔfela, niiti ti ga maaɲɛɛi:
17 gaazulɛɛ ɠaazui, zɛɛ wo nɛgi,
nui sɔ ge la ba, nuiti ti naa ma ɲamai ʋuuzu ga ti-yeeiti,
18 nu yii nii é ɠisiɛzu telebotala vaiti su,
nu ɠɔɠɔiti ti zuvilaai ɓizɛzu faa ɲɔu ɠɛɛzuʋɛ,
19 zɛɛ zeelei, é zɛɛ zeele wooi wosu,
ta zɔi é kpɔɛi leʋezu ɠɛɛɠɛlointi zɔɠɔzu.
Wɛɛnziɛgi zakpe pelei
20 Dòun zunu, ɠizɛ è-ɠɛɛ ná-deveiti su,
mina è-lee ná-tɛnɛ gooiti too ya!
21 Makɛ ti ma yeenɔpɛ è-yiimaʋɛ,
ti zɛlɛ ɠɔbu.
22 Ta lo è luɠɔ ɗa-ziɛi zu,
ti è makɛ è-laazuʋɛ,
ti yɛpɛ è ʋɔ, ɗa wuunna.
23 Mazɔlɔɔ devei ɠa ga lanboi,
kalagi ɠɛ ga wozakalagi,
zelilogi ta maaɠoloi, ta ga pelei é lo zɛnvui ʋa.
24 Ta è makɛ wɛɛnziɛ anzanui ziɛ ʋelei ma,
ta è-zeiɲɔɠɔi anzai ná-kpɔɛ nɛɛnɛgi ma.§ Wɛlɛ 5:3 zu, ta suɠulazuʋɛ.
25 Mina ɠaazuɠula ná-pagi ʋa è-yiimaʋɛ,
mina ɓɔɠɔ yɛ ná, é ʋa è zeɠe ga gaazuɠɔlɔgiti.
26 Mazɔlɔɔ koloɠolo anzanui maaʋele ma, ɗa ʋala ɗa-ɓulu ɓuɠai nɔ ma,
kɛlɛ anzanui é zini bɛ, ɗa ɠɛ è ʋala è-yɛnvui pɛ ma.
27 Nu ɠa zoo nɛi é abui lɔ ná-zuvai zu,
é la ná-seɠeiti kpein gala ɓaa?
28 Nu ɠa zoo nɛi é ziɛ abulekai ɠa,
é la kɔɠɔiti gala ɓaa?
29 Zenɔ ɠana é la, ga naama nui nii é ʋilɛsu seiɲɔɠɔi anzai ʋolu,
a vɔɔɠuna ba, salalalai la yɛga.
30 Nu la unma nui ʋɛlɛʋiliga, nii é unmai wosu ga é kogi zulaave,
tɔɔzei ani la zea, nii a mi.
31 Anɛɛ naa ʋe, ni ta sona, maanɛɛʋɛ é potogi ve ga seizu lɔfela,
ani ʋagɔi kpein é ná-pɛlɛi wu, toɠa naa pɛ fe.* Nii ʋoluʋɛ ɠa ga kɛni ma nu potogi ve. Tɔgi ná-devei ɠɛni ga ma nu potogi ve ga ma ʋɛɛda felegɔ, ɓaa naanigɔ, ɓaa ni gola zu ɠa ɓaaɠona, ma nu ma ʋɛɛda lɔɔlugɔi ve (Ɛgz 22:1-16).
32 Kɛlɛ zɔi é wɛɛnziɛgi ɠɛɛzu anzanui ʋɔ, naa ʋalagɛ faaɠaaɠai ma,
ɗa naa ɠɛɛna, ɗa ɓɔɠɔ ɠoloɠolosu, ɗa ɓɔɠɔi.
33 Toɠa kpɔlɔi zɔlɔɔ ta ɓaaɠulamai,
ná-unfegi la ɓega eyɛsu ɠɔ.
34 Mazɔlɔɔ toloi ɠa ɗa anzazinigi yiiɠula,
é la maawɔinɠa ɠɛa, yeei é potokulai ɠɛɛzu la.
35 É la unmɔɔ gani nɔpɛ soga,
é la vaa bu ɲɛgɛlɛin, anɛɛ ni ɗa lobɛani mɔinmɔin teʋesu.
*6:1 Zeelaga vai wola ɠɛni Izelayɛle nuiti saama, nii a kɛ ti ɓaa ta-naavoloiti maazu, ni kuye zeɠe nui la kuyei ɠulani, zeelagai ɠa é ɓena kula, é ɓena kpɔunmai leve ga kɔligi ta, ɓaa ná-nui ta (Zen 43:9; 44:32; Eza 38:14; Guy 119:122). Naa ɠɛɠala vai ɠa Tɛnɛ Faalaalii Zɛʋɛi pɔ, é tɔgi zei ma (11:15; 17:18; 20:16; 22:26; 27:13).
†6:10 Wɛlɛ ʋɛ: 24:33-34.
‡6:15 Wɛlɛ ʋɛti: 1:26; 24:22; Zɔɓ 34:20.
§6:24 Wɛlɛ 5:3 zu, ta suɠulazuʋɛ.
*6:31 Nii ʋoluʋɛ ɠa ga kɛni ma nu potogi ve. Tɔgi ná-devei ɠɛni ga ma nu potogi ve ga ma ʋɛɛda felegɔ, ɓaa naanigɔ, ɓaa ni gola zu ɠa ɓaaɠona, ma nu ma ʋɛɛda lɔɔlugɔi ve (Ɛgz 22:1-16).