1 Dutun te kedlised ku, mid-umew ku is Nengazen

ne midtavak e zin.

2  Nengazen, libriya a te kezeetan he edhimuwen te menge teruen wey menge limbungan.

3 Sikiyu is menge limbungan, hengkey vuwa is idsilut te Megbevayà keniyu?

4 Edsilutan kew zin pinaaǥi te kegkepenaa keniyu te sundaru te midlangga he vesut.

5 Mekehizuhizu a su nekeubpà a zuma keniyu te iring kezaat te menge meǥinged diyà te Meshec wey Kedar.

6 Neuǥet en is ked-ubpè ku zuma keniyu te menge etew he kenà egkesuat te kelinew.

7 Egkesuat a te kelinew piru emun edhisgut a mehitenged kayi, ne tebek mulà is keniyu he egkesuatan.